Thursday, April 12, 2007

'A view from outside' by ப.சிதம்பரம் - ஓர் அலசல்

-செல்லமுத்து குப்புசாமி

அமெரிக்காவின் ஒஹாயோ மாகாணம், கொலம்பஸ் மாநகரில் இருந்து இதை எழுதுகிறேன். இந்த ஊரில் உடன் பணியாற்றும் நண்பர் ஒருவர் பகிர்ந்த தகவல் கவனத்தை ஈர்க்கக் கூடியதாக இருந்தது. அது மத்திய நிதியமைச்சர் ப.சிதம்பரம் அவர்களைப் பற்றியது.

அது 2002 அல்லது 2003 ஆம் வருடமாக இருக்கலாமென்று நண்பர் நினைவு கூர்ந்தார். சிதம்பரம் அந்தக் காலத்தில் ஆட்சியில் இருக்கவில்லை; காங்கிரஸ் கட்சியிலும் இருக்கவில்லை. கொலம்பஸ் நகரில் தமிழ்ச் சங்கம் ஏற்பாடு செய்திருந்த விழாவிற்கு அவரை அழைத்திருந்தனர். பதவியில்லாமல் இருக்கும் அரசியல்வாதிகள் இது மாதிரியான நிகழ்ச்சிகளில் கலந்து கொள்வது சர்வ சாதாரணம். ஹார்வர்ட் பல்கலைக் கழகத்தில் படித்த இந்தப் பொருளாதார வல்லுனரையும் அதே அளவுகோளில் புறந்தள்ளி விட இயலாது. அதற்குக் காரணம் அவரது 'எளிமை' என்று நண்பர் குறிப்பிட்டார்.

சிதம்பரம் இந்தியாவிலிருந்து எக்கானமி கிளாஸ் விமானச் சீட்டில் பயணித்தார். வந்திறங்கியதும் கனெக்ட்டிங் பிளைட் வேண்டுமென்று அடம் பிடிக்காமல் டெட்ராய்ட்டில் இருந்து கொலம்பஸ் வரை மூண்றரை மணி நேரம் காரில் வந்திருக்கிறார். வந்த இடத்தில் ஹோட்டல் ஜாகை வேண்டுமென்று நிர்ப்பந்திக்கவில்லை. மாறாக, நிர்வாகிகள் யாரோ ஒருவர் வீட்டில் தங்கினாராம். நிகழ்ச்சியில் பேசி முடித்த பிறகு ஊரைச் சுற்றிக் காட்டுவதாக ஆர்வலர்கள் அழைத்தார்களாம். இந்தியன் எக்ஸ்பிரஸுக்கு எழுத வேண்டுமென்று கூறி அவர்களது அழைப்பை ஏற்கவில்லையாம்.

உலக வெங்கி போன்ற சர்வதேச அமைப்புகளில் இருந்தும், சான்றோர்கள் மத்தியில் இருந்தும் இடையிடையே வரும் தொலைபேசி அழைப்புகளை எல்லாம் சகித்துச் சமாளித்து விட்டு அதை எழுதி முடித்தாராம். சந்தையை நன்குணர்ந்த இந்த அரசியல்வாதியின் சுயக் கட்டுப்பாட்டுக்கு மிகச் சிறந்த சான்றாக இதைக் கருதலாம். இப்படியாக, ஆகஸ்ட் 2002 தொடங்கி மார்ச் 2004 வரை (இரு வாரங்கள் தவிர்த்து) எல்லா வாரமும் இந்தியன் எக்ஸ்பிரஸ் பத்திரிக்கைக்கு 'பத்தி' எழுதி வந்தார்.

அந்தக் கட்டுரைகள் அனைத்தையும் தொகுத்து, அழகாக பைன்ட் செய்து 'A view from Outside' என்ற பெயரில் 372 பக்கம் கொண்ட புத்தகமாக வெளியிட்டிருக்கிறார்கள். (விலை ரூ500). ஒரு சராசரி இந்தியனுக்குரிய அணுகுமுறையோடு அந்தப் புத்தகத்தைப் பற்றி மேலோட்டமாக ஒரு பார்வை செலுத்த இந்தப் பதிவு முயற்சிக்கிறது.


முதல் கட்டுரையை இப்படித்தான் ஆரம்பிக்கிறார். "இந்தியா ஏழை நாடாகவே வர்ணிக்கப்பட்டு வந்திருக்கிறது. நான் அதை ஒத்துக்கொள்ள மாட்டேன். பெரும்பாலான மக்கள் ஏழையாக வாழும் நாடு என்று வேண்டுமானால் கூறலாம்"

உலகின் ஏனைய நாடுகளை விட வேகமாக வளரக் கூடிய வல்லமை இந்தியாவிற்கு உள்ளதாக அடித்துச் சொல்கிறார். ஆனால், வளர்ச்சி என்பது முதலீட்டைச் சார்ந்தது. ஆகையால், ஆக்கப்பூர்வமான முதலீட்டிற்குத் தடையாக உள்ள முட்டுக்கட்டைகளை உடைத்தெறிய வேண்டுமென்கிறார். உள்கட்டமைப்புப் பணிகளில் பொதுச்செலவு கூட வேண்டும். அரசு முதலீடுகளைத் துரிதப்படுத்தவும், தனியார் துறை முதலீடுகளுக்குக் குறுக்கே நிற்கும் தடைக் கற்களை அகற்றவும் வலியுறுத்தும் நிதியமைச்சரோடு நாமும் இணைவது அவசியமாகிறது.

பல இடங்களில் தன்னை ஒரு தேர்ந்த அரசியல்வாதியாக சிதம்பரம் நிலைநிறுத்துகிறார்.
பா.ஜ.க. மீதும் அதன் ஆட்சி மீதும் விமர்சனங்களை முன்வைக்கும் இடங்களில் காட்டமும், கிண்டலும் இழையோட விட்டிருக்கிறார். புத்தகத்தில் வெளிவந்துள்ள கட்டுரைகளை எழுதிய காலம் பாரதிய ஜனதா ஆட்சியில் இருந்தது. அந்தக் கட்சியின் இந்துத்துவா கொள்கையையும் சாடுகிறார்.

அன்றைய ஆட்சியாளர்களை விமர்சிக்கும் பல காரணிகள் இன்று அவர் அங்கம் வகிக்கும் இன்றைய ஆட்சிக்கும் பொருந்துமென்பதில் சந்தேகமில்லை. வாஜ்பாய் குறித்து பின் வருமாறு குறிப்பிடுகிறார். "இந்தியாவை இதுவரை ஆண்ட கூட்டணிகளிலேயே மிகவும் பிளபுபட்ட (முரண்பட்ட) கூட்டணியை வழி நடத்திச் செல்கிறார்"

இடதுசாரிக் கட்சிகளுக்கும், தி.மு.க. போன்ற பிற கூட்டணிக் கட்சிகளுக்கும் வளைந்து கொடுத்துக் காலம் தள்ளும் நடப்பு அரசாங்கத்தை என்ன சொல்வது? எதைப் படித்தாலும் அப்படியே நம்பி விடும் மக்களுக்கு பி.ஜே.பி. ஆட்சியில் மட்டும்தான் கருத்து வேற்றுமைகள் நிலவியது போன்ற தோற்றம் ஏற்படலாம். வேறுபாடுகளும், சமரசங்களும் கூட்டணி ஆட்டத்தின் விதிமுறையாகவும், பரவலாக ஏற்றுக்கொள்ளப்பட்ட கருத்தாகவும் உள்ளது. தமிழகத்தில் தி.மு.க. அரசாங்கம் கூட வரலாற்றிலே இதற்கு முன் காணாத வகையில் கூட்டணிக் கட்சிகளின், சிதம்பரத்தின் காங்கிரஸ் உட்பட, நெருக்கடியைச் சந்தித்து வருகிறது.

நிதியமைச்சரின் தொலைநோக்குப் பார்வை மற்றும் பொருளாதாரப் புத்திக் கூர்மை குறித்து நமக்கு எவ்வித ஐயமும் இல்லை. ஒரு தேசத்தின் வளர்ச்சியும், அங்கு வசிக்கும் குடிமக்களின் வாழ்க்கைத் தரமும் அந்த தேசத்தில் தலைக்கும் எவ்வளவு மின்சாரம் செலவழிக்கிறோம் என்ற மிந்துய்வு (per-capita consumption) தீர்மானிக்கும் என்று ஆணித்தரமாக புத்தகத்தின் பல இடங்களில் குறிப்பிடுகிறார். பி.ஜே.பி. மின் துறையைச் சீரமைக்கத் தவறியதையும், நிர்ணயித்த இலக்கின் படி மின் நிலைய உருவாகத்தை நிறைவேற்றத் தவறியதையும், புதிய மெகா மின் உற்பத்தி நிலையங்களுக்கு உந்தம் கொடுக்காமல் விட்டதையும் சுட்டிக் காட்டுகிறார்.

இந்த விஷயத்தில் நிதியமைச்சரோடு நாம் இணைந்து கொள்ள வேண்டியிருக்கிறது. மின் உற்பத்தியில் நடப்பு அரசாங்கம் உறுதியான செயல்பாடுகள் மூலம் தீர்மானமாக இருப்பதை அறிகிறோம். 2012 ஆம் ஆண்டுக்குள் அனைத்து வீடுகளையும் மின்மயமாக்கும் உன்னதமான இலக்கு வெறும் காகித இலக்காக மட்டுமே நின்று விடாது என்ற நம்பிக்கை உருவாகியுள்ளது.

விவசாயத்தைப் பற்றியும் இந்தப் புத்தகத்தில் தொட்டுச் செல்கிறார். முன்னுரையில் இவ்வாறு தெரிவிக்கிறார்."விவசாயம் குறித்து மூன்று துண்டுகள் (கட்டுரைகள்) மட்டுமே எழுதினேன். எனினும், சொற்பமான முதலீடு, போதுமான கடனுதவி கிடைக்காமை, விளை நிலத்தில் குடியானவனின் பொருளுக்குக் கிடைக்கும் மட்டமான விலை ஆகிய வேளாண்மைத் துறையைப் பீடித்த பிணிகளை அடையாளம் காண முடிந்தது. இப்பிரச்சினைகள் நீடித்தபடியே இருக்கின்றன. ஆனால், இந்தச் சூழ்நிலையைச் சரி செய்வதற்கான முயற்சி தொடங்கி விட்டது"

நமது அரசு நிர்வாக முறையும், அதை இயக்கும் விதிமுறைகளும் எளிமையாகவும், வெளிப்படையாகவும் மாறுவது அவசியம் என்கிறார். ஊழலும், இலஞ்சமும் எப்படி நுழைந்தன என்று அலசி அதன் ஆணி வேரைத் தொட முயற்சித்திருக்கிறார். நம் நாட்டில் அவை அழிவில்லாமல் தொடர்வதற்கான காரணத்தையும் அறிய முடிகிறது. லைசன்ஸ் ராஜ்ஜிய காலத்தில் பிசினஸ் செய்யும் முதலாளிமார்கள் ஆட்சியாளர்களைக் கைக்குள் போட 'நிதி' வழங்கினர்.

அதற்குக் கைமாறாக ஒருதலைப் பட்ச சலுகைகள் கம்பெனிகளுக்குக் கிடைத்தன. அமைச்சர்கள், நாடாளுமன்ற உறுப்பினர்களின் சொற்படி அதிகாரிகள் நேர்மை தவறி நடக்க வேண்டிய நிலைக்கு ஆளாயினர். உயர் மட்டத்தில் தோன்றும் இந்த வியாதி படிப்படியாகப் பரவி ஒவ்வொரு தாலூக் ஆபீசுக்கும் வந்து சேர்கிறது. தேசத்தின் கடைசி பியூன், குமாஸ்தா எனப் பெரும்பாலானவர்கள் ஊருடன் ஒத்துப் போகிறார்கள். இதையெல்லா மாற்றியமைக்க அரசு அலுவலகங்களில் கணிணிமயமாக்கலும், மக்களுக்குத் தகவல் அறியும் உருமையும் நடைமுறைக்கு வந்தாக வேண்டும் என்பதை சிதம்பரம் வலியுறுத்துகிறார். (சந்திர பாபு நாயுடு ஆட்சியில் தலைகீழாக மாறிய ஹைதராபாத் ஆர்.டி.ஓ. அலுவலகம் இதற்கு வாழும் சாட்சி)

காலங்காலமாக நம்மை அலைக்கழித்து வரும் காஷ்மீர் பிரச்சினையில் நமது நிலைப்பாட்டைக் கேள்விக்குள்ளாக்குகிறார். இந்தியாவில் எதாவது பிரச்சினை எனும் போதும் மிகவும் செளகர்யமாக பாகிஸ்தானை நோக்கிக் கையைக் காட்டித் தப்பித்துக் கொள்வதை அரசுகள், (நூலாசிரியர் காங்கிரசை விட பி.ஜே.பி. மிக அப்படமாக இதைச் செய்வதாக உணர்கிறார்), உத்தியாகக் கடைபிடித்து வந்துள்ளன. 'War against terror' என்ற பெயரில் எதற்கெடுத்தாலும் சதாம் உசேனைக் குற்றம் சாட்டிய (சாட்டும்) ஜார்ஜ் புஷ்ஷ¤க்கும், நமக்கும் என்ன வேற்றுமை என்ற சந்தேகத்தைக் கிளப்புகிறார். சிந்திக்க வேண்டிய விஷயம்.

காஷ்மீரையும், அதன் மக்களையும் தேசிய நீரோட்டத்தில் இணைத்துக் கொள்ளத் தவறி விட்டோமென்று கோடி காட்டுகிறார். ஒரு காலத்தில் தனியாகப் பிரிந்து செல்லக் கோரிக் கலகம் செய்த பஞ்சாபிகள் (அதற்குரிய காரணங்களில் நியாயம் இருக்கலாம்) இன்று அனைத்துத் துறைகளிலும் பரவி நிற்கின்றனர். அவர்களைத் தேசிய மேடையில் ஏற்றுக் கொண்டோம். அண்ணா காலத்தில் தனி நாட்டுக் கோரிக்கையை திராவிட முன்னேற்றக் கழகம் கைவிட்டது. இப்போது இந்திய தேசிய அரசியலில் மறுக்க முடியாத இடம் அந்தக் கட்சிக்குக் கிடடித்திருக்கிறது. கலந்துகொள்ளல் பெறுதல் மற்றும் ஈடுபாடு காரணமாக ஒரு மாநிலம் (அரசியல் குடும்பங்களையும் சேர்த்துக் கொள்ளலாம்) எவ்வாறு செழிக்க முடியும் என்பதற்கு இது மிகச் சிறந்த எடுத்துக்காட்டு. கார்ஷ்மீர் மட்டும் உறுத்திக் கொண்டே இருக்கிறது. வட கிழக்கு மாநிலங்களைக் கைபிடித்து மேலே கொண்டு வராமல் விட்டது இந்தியாவின் (பல) அவமானச் சின்னங்களில் ஒன்றாகவே நிலவுகிறது.

தடையற்ற வியாபாரத்திற்கு வக்காலத்து வாங்கும் நிதியமைச்சரின் இந்தப் புத்தகத்தை பெரும்பாலும் அவரது பொருளாதார அணுகுமுறை என்ற ரீதியிலேயே நொக்க வேண்டியிருக்கிறது. புத்தகம் நெடுகிலும் நிறையப் புள்ளி விவரங்களை அள்ளித் தெளித்திருக்கிறார். எதையுமே ஆதாரத்துடன், ஆணித்தரமாகப் பேச வேண்டும் என்ற அவரது வக்கீல் மூளை அடிக்கடி எட்டிப் பார்க்கிறது. பார்வை, விமர்சனம், கருத்து என எல்லாமே இதற்குப் பொருந்தும். (சில நெருடல்களை என்னால் கொள்கை நீதியாகவும், அரசியல் ரீதியாகவும் ஏற்றுக்கொள்ள முடியவில்லை என்பது வேறு விஷயம்) தான் ஒரு சராசரி அரசியல்வாதியல்ல என்று நிரூபித்திருக்கிறார்.

பிரதமர் டாக்டர்.மன்மோகன் சிங் தன் நிதியமைச்சரைத் தலையில் வைத்துக் கொண்டாடுவதில் சந்தேகப்பட ஒன்றுமேயில்லை. வெட்டியாக சும்மா உட்கார்ந்திருக்கும் நேரத்தில் இந்த மாதிரி (எழுத்து, கருத்துப் பகிரல்) உருப்படியாக எதாவது செய்யுமாறு எதிர்க்கட்சிகளுக்கு சிங் ஆலோசனை கூறியதையும் கவனிக்க வேண்டும்.

அரசியல், பொருளாதாரம் என்ற எல்லையைக் கடந்து பல பரிமாணங்களை இந்தப் புத்தகம் அலசுகிறது. குழந்தைத் தொழிலாளர், அரசியல் நேர்மை, குறைவான வருமான வரி - நிறையைப் பேர் வரி கட்டுதல் என்ற சூழ்நிலை, நிதிப் பற்றாக்குறை, அந்நியச் செலவாணியை ஆக்கப்பூர்வமாகப் பயன்படுத்துதல், மகளிர் மேம்பாடு, உலக வர்த்தக நிறுவனம் (WTO), காவிரி நதி நீர்ப்பிரச்சினை, சுற்றுலாத் துறை, அரசுத் துறைப் பங்குகளைப் பொது மக்களுக்கு விற்பது (தனியார்மயமாக்கல்), அந்நிய முதலீடு, விடுதலைப் புலிகள் என்று பட்டியல் நீண்டு கொண்டே போகிறது.

தான் ராஜீவ் காந்தியின் செல்லப்பிள்ளை என்பதைச் சில இடங்களில் நிரூபிக்கிறார். பல கோடி மக்களின் வாழ்க்கையை மாற்றியமைக்க ராஜீவ் கனவு கண்டார். அதில் நமக்கு மாற்றுக் கருத்து கிடையாது. ஆனால், போபர்ஸ் ஆயுத விவகாரத்தில் ராஜீவை அளவுக்கு மீறிப் புனிதப்படுத்த முயல்வதாகத் தெரிகிறது. "இலஞ்சம் வாங்கினது உண்மை. ஆனா, யார் வாங்கினதுன்னு நிரூபிக்க முடியாது" என்று சொல்லி வாஜ்பாயைக் (அவரே ஒரு வார்த்தை அலங்கார மூர்த்தி) குழப்பியதாகக் குறிப்பிடுகிறார்.

'அறிஞர்' என்ற மயிலிறகைத் தனது தொப்பியில் சூடி, தெளிவாகப் பேசும் இந்த அரசியல்வாதி தனது ஓய்வு நேரத்தினைச் சிறப்பாகப் பயன்படுத்தி இந்த நூலை உருவாக்கியுள்ளார். அதைப் பாராட்டக் கடமைப்பட்டுள்ளோம். கட்டாயம் படிக்க வேண்டிய புத்தகம் என்று தயங்காமல் சொல்வேன். அதே நேரம், "நீங்கள் முன்வைக்கும் விமர்சனங்கள் உங்கள் ஆட்சிக்கும் பொருந்துமா?" என்ற கேள்வியையும் கேட்பேன்.

கூடவே இன்னொரு கேள்வி. பணப்புழக்கத்தை உறிஞ்சுவதற்காக அரசாங்கம் வட்டி வீதத்தை ஏற்றுகிறது. அதே நேரம் டாலருக்கும் நிகராக இந்திய ரூபாயில் மதிப்பு உயர்ந்து போகாமல் இருப்பதற்காக டாலரை வாங்கிக் குவித்து பணப்புழக்கத்தைக் (ரூபாயை) கூட்டுகிறது. வலுவான இந்திய ரூபாயைத் தாங்கி முன்னேறும் சக்தி இந்தியப் பொருளாதாரத்திற்கு இல்லையென்று நிதியமைச்சரும், ரிசர்வ் வங்கியும் நினைக்கிறார்களா?

13 comments:

Raviram said...

Good observation. I'll buy this book. Thanks.

Vino said...

Yes there is no second thought about Chidamparam's talents.But he is tied with so called comrades...who should allow him to work more indpendently...

Chellamuthu Kuppusamy said...

வருகைக்கும், வாசிப்பிற்கும் நன்றிகள் ரவிராம் மற்றும் வினோ.

இளஞ்செழியன் said...
This comment has been removed by the author.
இளஞ்செழியன் said...
This comment has been removed by the author.
இளஞ்செழியன் said...
This comment has been removed by the author.
Anonymous said...

அழகான தமிழிலும் அருமையாக ஆங்கிலத்திலும் பேசுகிற எழுதுகிற ப.சி. அவர்களுடைய எளிமை நம் அனைவரையும் கவர்கிறது. ஆனால், விலைவாசியைக் குறைக்க அல்லது மேலும் ஏறுவதைத் தடுக்க, அவராலோ அல்லது அவர் நம்பி இருக்கிற கொள்கைகளாலோ முடியவில்லை என்பதே எதார்த்தம்.

-இளஞ்செழியன்

இளஞ்செழியன் said...
This comment has been removed by the author.
Anonymous said...

I like your brief comments for P.C's book. Thanks a million.

Rajendran.R
Dublin 20
Ireland

Balaji said...

your comments about this book "A view from outside" shows me "A view what is inside" in that book.
Mr.PC is not only a politician but also a good economist.Want to notice,what is his action now about the things that he had mentioned i.e agricultural reforms,infrastructure reforms,more govt.fund in schemes.

masala said...
This comment has been removed by the author.
masala said...

Your comments about the book A view from outside gives me a "A view ,what is inside in this book".Mr.PC is a exemplary politician.And also want to see how he is reacting in his regime about the problem what he mentioned in this book(i.e agricultural sectors,infrastructure,implementation of govt schemes)
by
Balaji Manoharan

Anonymous said...

Very nice write ups...keep going on