Tuesday, May 09, 2006

IPO தில்லுமுல்லு!!

குப்புசாமி செல்லமுத்து

உயர் நிலைப் பள்ளியில் நான் படித்துக் கொண்டிருந்த போது எங்கள் பண்ணை வீட்டிற்குச் சாண எரிவாயுச் சாதனம் அமைத்திருந்தோம். சமையல் எரிபொருள் தேவையை இது பூர்த்தி செய்ததால், பொது விநியோகத்தில் வழங்கப்பட்ட மண்ணெண்ணெயின் தேவை இல்லாமல் போனது. இதே மாதிரி வேறு பல குடியானவக் குடும்பங்கள் எமது குக்கிராமத்தில் இருந்தன.
மேற்குறிப்பிட்ட உபகரணம் இல்லாதோர் எங்கள் குடும்ப அட்டையில் கிடைக்கும் மண்ணெண்ணெயைத் தங்கள் தேவைக்குப் பயன்படுத்தினர். வீட்டு உபயோகத்திற்காக இவ்வாறு அனுசரித்துப் போவது ஒன்றும் பெரிய குற்றமில்லை.

ஆனால், இதுவே பேராசை பிடித்த பெரும் மளிகை வணிகர் நூற்றுகணக்கான போலி குடும்ப அட்டைகளின் மூலம் அத்தியாவசியப் பொருட்களைக் குறைந்த விலைக்கு வாங்கி தனது கடையில் அதிக விலைக்கு விற்றால், அது குற்றம் மட்டுமல்லாது மன்னிக்க முடியாத துரோகமுமாகும்.

சமீபத்தில் வெளிச்சத்துக்கு வந்த ஐ.பி.ஓ (IPO - Initial Public Offer) ஊழல் நம் ரேசன் கார்டு எடுத்துக்காடிலிருந்து அதிகம் வேறுபட்டதல்ல.

ஒவ்வொறு IPO விலும் சிறு முதலீட்டாளர்களுக்கு (retail investor என்பதைச் சில்லரை முதலீட்டாளர் என்று தமிழ்ப்படுத்தினால் அவ்வளவு நல்லா இருக்காது) 35% ஒதுக்கப்பட வேண்டும் என்பது நியதி. ஒரு நிறுவனம் ரூ.1000 கோடிக்குப் பங்குகளை வெளியிடுகிறதென்றால், அதில் ரூ.350 கோடி சிறு முதலீட்டாளர்களுக்குப் போய்ச்சேரும். ஆனால் இந்த பிரிவில் வருபவர்கள் (நம்மைப் போன்றோர்) அதிகபட்சமாக ஒரு இலட்சம் ரூபாய் மதிப்பிலான பங்குகளைத் தான் விண்ணப்பிக்க முடியும்.

ஒரு செல்வந்தர் ரூ.50 இலட்சத்திற்கு IPO வில் வாங்க விரும்புகிறார் என்று வைத்துக்கொள்வோம். அவரால் சிறு முதலீட்டாளர் பிரிவில் விண்ணப்பிக்க முடியாது என்பதால் பொதுப் பிரிவில் தான் விண்ணப்பிக்க வேண்டும். அதில் கிடைக்கும் ஒதுக்கீடு (quota) ஒட்டு மொத்த சிறு முதலீட்டாளர் ஒதுக்கீட்டில் மூன்றில் ஒரு பகுதி தான். நமது உதாரணத்தின் படி ரூ.1000 கோடி வெளியிட்டில் இவர்களுக்கு ரூ.117 கோடி தான். மீதமெல்லம் வெளி நாட்டு நிறுவன முதலீட்டாளர்களுக்கும் (FII - Foreign Institutional Investors), பரஸ்பர நிதிகளுக்கும் (mutual funds) மற்றும் அங்கீகரிக்கப்பட்ட -உள் நாட்டு- நிறுவன முதலீட்டாளர்களுக்கும் (Qualified Institutional Investors) போய்ச் சேரும்.

"சரி.. போனா என்ன? இவரு கோட்டாவுல தான் 117 கோடி இருக்குல்ல?" அப்டீன்னு கேக்காதீங்க. ஏன்னா, இவர விடப் பெரிய பணத்திமிங்கலமெல்லாம் இந்தக் கோட்டவுல தான் அப்ளை பண்ணுவாங்க. அவுங்க மொத்த அப்ளிகேசனே பல ஆயிரம் கோடியத் தாண்டிரும். அதனால விகிதாச்சார அடிப்படைல ஷேர் அலாட் ஆகும் போது, நம்மாளோட 50 லட்சம் அப்ளிகேசனுக்கு 2 லட்சத்துக்குத் தான் ஷேர் கிடைக்கும். (இது ஒரு உதாரணம் தான். இதை விட அதிகமாகவோ, குறைவாகவோ கிடைக்க வாய்ப்புகள் உண்டு)

ஆனால் சிறு முதலீட்டாளர்களுக்கோ ஒரு இலட்ச ரூபாய் விண்ணப்பத்திலேயே ஐம்பதாயிரத்துக்குப் பங்குகள் ஒதுக்கப்படக் கூடும்.
நமது செல்வச் சீமானுக்கு ஒரு யோசனை சொல்லலாமா? அவரே 50 இலட்சத்தையும் போடுவதற்குப் பதிலாக 50 சிறு முதலீட்டாளர்களைத் தேடிப் பிடித்து ஆளுக்கொரு இலட்சமாக அவர்கள் பேரில் விண்ணப்பித்தால், மொத்தம் 25 இலட்ச மதிப்புள்ள பங்குகள் கிடைக்குமல்லவா? தானே மொத்தமாக விண்ணப்பிக்கும் தறுவாயில் 2 இலட்சத்துக்குத் தானே கிடைக்கும்?

நமது பினாமி ஐடியா நன்றாகத்தான் இருக்கிறது. ஆனால் எதற்காக ஒவ்வொரு IPO வின் போதும் இந்தப் பெரிய மனிதர் 50 சொற்ப மனிதர்களிம் கையேந்த வேண்டும்? அதற்குப் பதிலாக, 50 போலி டீமேட் (demat) கணக்குகளைத் துவக்கிக் காரியத்தை முடித்துக்கொள்ளலாமே!!!
அது தான் நடந்திருக்கிறது. 'ரூப்பால் பன்ச்சல்' என்ற அம்மையார் ஒரே முகவரியில் இருந்து 5000 க்கும் மேற்பட்ட டீமேட் கணக்குகளைத் துவக்கி யெஸ் வங்கி (YES bank) மற்றும் ஐ.டி.எ·.சி. (IDFC) நிறுவனங்களின் IPO வெளியீட்டின் பொது விளையாடியிருக்கிறார். இதனால் பல (பன்மை) கோடி ரூபாய் அநியாய இலாபம் பார்த்திருக்கிறார்.

"அது எப்படிங்க முடியும்? ஒரு டீமேட் அக்கவுண்ட் ஆரம்பிக்கவே போட்டோ, அட்ரஸ் புரூ·ப், PAN நம்பர் எல்லாம் கேக்கறாங்க. 5000 பேருக்கு எப்படி முடியும்?" எவருக்கும் எழக் கூடிய கேள்வி தான் இது.

மளிகைக் கடைக்காரருக்கு எப்படி அரசாங்க அதிகாரிகள் துணையுடன் போலிக் குடும்ப அட்டை வாங்க முடிந்ததோ, அதே மாதிரி தான் இதுவும். போலி டீமேட் கணக்குத் துவக்க அந்தந்த அதிகாரிகளின் துணையில்லாமல் எப்படியும் முடிந்திருக்காது.

மிக நீண்ட விசாரணைக்குப் பின் ஏப்ரல்-26 அன்று வெளியிட்ட தன் தீர்ப்பில் செபி (Securities and Exchange Board of India - SEBI ஐ தமிழில் 'இந்தியப் பத்திர மற்றும் பரிவர்த்தனை வாரியம்' எனலாம்) கார்வி (Karvy), இந்தியா புல்ஸ் (India bulls) இன்னும் அது போன்ற சில அமைப்புகளையும் தடை செய்தது. பின்பு நீதி மன்றத் தலையீட்டால் அது சற்று தளர்த்தப்பட்டது வேறு விஷயம். இந்த நிறுவனங்கள் தான் போலிக் கணக்கு ஓப்பன் செய்து கொடுத்தவர்கள்.

லஞ்சம் கொடுத்து அக்கவுண்ட் ஓப்பன் பண்றது சரி. ஐந்தாயிரம் பேரின் புகைப்படத்திற்கு என்ன செய்திருப்பார்கள் என்று ஆராய்ந்து பார்த்தோம். நகரின் நெரிசல் மிகுந்த இடத்தில் புகைப் படக் கடை ஆரம்பித்து சில நாட்களுக்கு (கேட்டால் விளம்பரத்திற்காக என்று சொல்லியிருக்கிறார்கள்) இலவசச் சேவை எனும் போது யார் தான் முகத்தைக் காட்டி விட்டுப் போக மாட்டார்கள்? அப்படிச் சேகரித்தது தான் அனைத்து உருவங்களும். உருவங்களுக்கெல்லாம் தனித்தனியே பெயர் சூட்டி, கணக்குத் துவக்கி அழகு பார்த்திருக்கிறார் இந்த அம்மையார்.

'செபி'யின் அறிக்கை வேறொன்றையும் புலப்படுத்துகிறது. அனைவரும் நினப்பது பொல இன்று நேற்று நடப்பதல்ல இந்த ஊழல். ஜுன் 2003 ல் வெளிவந்த மாருதி நிறுவனத்தின் IPO விலும் இந்த கோல்மால் நடந்திருப்பதாகச் சொல்லியிருக்கிறார் நல்ல தீர்ப்பு வழங்க முயற்சித்திருக்கும் நாட்டாமை 'செபி'.

சரி. இது யார் குற்றம்? பணத்தாசை கொண்ட ரூப்பால் போன்ற ஒரு சிலர் செய்த தவறுக்காகத் தண்டிக்கப் பட வேண்டுமென்கிற வாதங்கள் நியாயமானவை. ஆனால், இந்தக் குற்றப் பட்டியல் நீளமானது.
  • ஆயிரக்கணக்கான பொலிக் டீமேட் கணக்குகளைத் தொடக்க ஒத்துழைத்த DP நிறுவனங்கள்
  • வாடிக்கையாளர் யாரென்றே தெரியாமல் (KYC - know your customer விதி மீறல்) சேமிப்புக் கணக்கு ஏற்படுத்திய வங்கிகள்
  • ஒரே முகவரியில் இருந்து இத்தனை ஆயிரம் விண்ணப்பங்கள் வருமா என்றல்லாம் ஆராயாத IPO நடத்திய அமைப்புகள்
  • இத்தனையும் கண்டும் காணாமல் இத்தனை காலம் குறட்டை விட்டுத் தூங்கிய பெரியண்ணன் 'செபி'


என அத்தனை பேரும் இதற்கு ஒட்டு மொத்தப் பொறுப்பேற்க வேண்டும்.


"பங்குச் சந்தை ஊழல் மிகுந்த இடம். அங்கு நடப்பது முதலீடல்ல; சூதாட்டம் தான்" என்பது போன்ற எண்ணங்களில் இருந்து விடுபட்டுச் சிறு முதலீட்டாளர்கள் மறுபடியும் திருப்பிப் பார்க்கிற நேரம் இது. அப்படிப்பட்ட வேளையில் நம்பிக்கையைக் குலைக்கும் வகையில் விதி மீறல்களும், ஊழல்களும் நடக்குமானால், இந்த மாபெரும் கட்டமைப்பு தன் செல்வாக்கை நீண்ட காலம் தக்க வைத்துக் கொள்ள முடியாது. இனி மேலாவது IPO வெளியீடகள் ஒளிவு மறைவின்றி, ஊழலின்றி வெளிப்படையாக நடக்கும் என நம்புவோம்.


வளம் பெறுவோம்.

6 comments:

Prema said...

1. Good article and I really like your excellent words usage.( starting from heading selection till the end with good flow )
2.Usage of example is too good
3.Use of still more hikkus or kavithais or jokes will enhance the readers interest ( not really needed but still)
4.Reg the content… Whatever u said is exactly true and u can also explain about the impact of banning Karvy, etc..by SEBI
(I mean the current pbm faced by the Karvy,, etc .. account holders and karvy consultants).
5.Adding basic definition about IPO may help for the first time readers.

Kuppusamy Chellamuthu said...

உங்கள் பாராட்டுதலுக்கு மிக்க நன்றி பிரேமா. ஹைக்கூ, கவிதைகள், துணுக்குகள் இவற்றையெல்லாம் இடையிடையே செருகுவது படிப்பவர்களின் ஆர்வத்தை கூட்டச்செய்யும் என்பது உண்மை தான். அதைச் செய்வதற்கு அசாத்தியத்திறமை வேண்டும். அதற்கு நான் கவிஞனுமில்லை, விகடனுமில்லை!! ஆனால் எளிய நடையில் நம் அன்றாட வாழ்வில் சந்திக்கும் சம்பவங்களை மேற்கோள் காட்டி ஒரு செய்தியை விளக்குவது எளிது. அதைத் தான் செய்ய முயன்றிருக்கிறேன்.

உங்கள் கருத்தும், பின்னூட்டமும் மிகுந்த பயனுள்ளதாகக் கருதி மதிக்கிறேன். அடுத்து வரும் படைப்புகளை மேம்படுத்திக் கொள்ள பேருதவியாக இருக்கும்.

-குப்புசாமி செல்லமுத்து

நன்மனம் said...

பிரேமா சொல்வதை வழி மொழிகிறேன்.

நமக்கு தெரிந்ததை கோர்வையாக மற்றவர்க்கு புரியும் விதத்தில் எடுத்து சொல்லிய விதம் அறுமை.

Anonymous said...

great work Mr.Kuppusamy. keep it up

நாகு said...

அழகுத்தமிழில், நேர்த்தியான கட்டுரை. பங்குசந்தை குறித்த சம்பவங்கள், புரி ந்துகொள்ளும் விதத்தில் அமைந்துள்ளது. தொ டர்ந்து எழுதுங்கள்.

Kamesh Jayachandran said...

Ungal padhivugal arumai.

Izhakkadhey is classic by itself(I read Intelligent Investor and Interpretation of Financial statement by Ben Graham. I could see your book tries to provide the similar thoughts with local examples. Truly great effort.)

I wish 'Izhakadhey' remains just like a Ben Graham's classic book Intelligent Investor.

Why I comment in this blog?

This blog mentions about IPO scams. I also got affected by it without knowing that I was affected.

Back in 2004-2006 I applied in many IPO's by applying for minimum lot. I never got anything allotted. Now I stopped doing that as I understood IPO to be 'Initial Public Horror' after reading Ben Graham's book.

In Mid 2010 I got a cheque worth 150Rs from SEBI I guess stating as a compensation for not getting allotment from my IPO participation.

150Rs is not big. 4-5 years delay is not big. What is big is their prompt rememberance of people who failed to get allotment due to this SCAM.

Ungal eluthu pani sirappudan thodara vazhthukkal.

With regards
Kamesh Jayachandran