Thursday, May 18, 2006

திருடர்கள் ஜாக்கிரதை

குப்புசாமி செல்லமுத்து

"நாய்கள் ஜாக்கிரதை" மாதிரி திருடர்கள் ஜாக்கிரதை எனத் தலைப்பிட்டது பிழையில்லை. ஆனால் இங்கே சுட்டிக் காட்டப் படும் சமூகம் இந்தத் தலைப்பை நியாயப்படுத்துவது போல நடப்பது தான் பிழை.

தன் மகளுக்கு மாப்பிள்ளை தேடும் தகப்பன் ஒவ்வொறு முறையும் ஜோசியக்காரனால் கொடுமைக்கு உள்ளாகிறான். எங்கே ஜாதகம் பொருந்தி அவர்களுக்குப் பிடித்துப் போய் திருமணம் நடந்தால், அடுத்த முறை நம்மிடம் வர மாட்டாரோ என்பதே அவனது நோக்கம். அதனால் தான் பெரும்பாலான ஜாதகங்கள் பொருந்தாமல் போவதும், தோஷங்கள் அதிகரிப்பதும். இங்கே வாடிக்கையாளனாகிய தகப்பனின் நலனும், விறபனையாளனான ஜோசியக்காரனின் நலனும் வேறுபடுகின்றன.

முடி நிறைய வெட்டி விட்டால் நெடு நாள் கடைக்கு வரமாட்டீர்கள் என்பதால் லேசாக வெட்டி விடுவது சவரக் கடைகாரரின் இயல்பு. சில பேர் மொட்டை மட்டுமே போடுவது இவர்களுக்கு இடைஞ்சல் தான். இங்கும் கூட வாடிக்கையாளனின் நலனும், சேவகனின் நலனும் எதிர்மறையானவை.

மதுபானக் கடைகள் தனியார் மயமாக இருந்த போது கிடைத்த வாடிக்கையாளர் சேவை அரசு மயமானவுடன் கிடைப்பதில்லை. நீ குடித்தாலும் குடிக்காவிட்டாலும் அரசாங்கம் அவனுக்கு ஊதியம் கொடுக்கிறது. அதே ஆள் இதே கடை தனியார் இடம் இருந்தால் இப்படித்தானா இருப்பான்? வியாபாரமானால் தான் முதலாளி சம்பளம் தருவார். ஊழியர் நலன், முதலாளி நலன், வாடிக்கையாளர் நலன் என மூன்றும் இங்கே ஒரே கோட்டில் அமைய வேண்டும்.

Incentive based bias என்று ஆங்கிலத்தில் இதைச் சொல்வார்கள். எல்லா நேரத்திலும், எல்லாரையும் நேரடியாகவும், மறைமுகமாகவும் இயங்கச் செய்வது இது. தலையணை மந்திரம் கூட இப்படித் தான். ஓட்டுக் கேட்கும் அரசியல்வாதி, இடு ஒதுக்கீட்டுக்கு எதிராகப் போராடும் மாணவன் என அனைவருக்கும் incentive based bias தான் உந்து சக்தி.

'ஜாக்கிரதை' என்று நாம் எச்சரித்த அந்தச் சமூகம் எது என இப்போது சொல்ல வேண்டும். பரஸ்பர நிதி விற்பனைப் பிரதிநிதிகள்(mutual fund sales rep) இவர்கள்.
நீங்கள் செய்யும் முதலீட்டில் வசூலிப்படும் நுழைவுக் கட்டணமான (entry load) 2.5% த்தின் பெரும் பகுதி இந்த விற்பனையாளர்களுக்குத் தான் போகிறது. 100 ரூபாய் நீங்கள் முதலீடு செய்தால் இவருக்குக் கொடுத்தது போக ரூ.97.50 தான் நிகர முதலீடு. அது போக நிதி நிர்வாக நிறுவனம் தனியாக வருடந்தோறும் 2.5% எடுத்துக் கொள்ளும். அதாவது 5% வீணாகவே போகிறது. முதலீடு 10% வளர்ந்தால் அது அடைந்திருக்கும் நியாயமான வளர்ச்சி 15%. சாதாரணமாகத் தெரியும் இந்த 5% முப்பது ஆண்டுகளும் நீடித்தால் என்ன ஆகும்?

100 ரூபாய் 15% அளவில் வளர்ந்து 30 ஆண்டு முடிவில் கிடைப்பது = ரூ.6621
100 ரூபாய் 10% அளவில் வளர்ந்து 30 ஆண்டு முடிவில் கிடைப்பது = ரூ.1744
நீங்கள் சம்பாதிப்பதை விட இவர்கள் கிட்டத்தட்ட 4 மடங்கு சம்பாதிக்கிறார்கள். அதாவது உங்களது வருவாயில் ஐந்தில் நான்கு பகுதி இவர்களுக்கே போகிறது. இதைத் தான் சிறு துளி பெரு வெள்ளம் என முன்னோர் சொன்னார்களோ என்னவோ.

ஒரே ஒரு நிதித் திட்டத்தில் மட்டும் தொடர்ந்து நீடித்தால், முதல் வருடம் தான் 5% செலவு; மற்ற வருடங்களில் நாம் விற்பனைப் பிரதிநிதிகளுக்கு அழுவதில்லை. ஆனால் பலரையும் ஒரு திட்டத்திலிருந்து இன்னொரு திட்டத்திற்கு மாற்ற ஒரு கூட்டமே இருக்கிறது. இவர்கள் அறிவுரையாளர்கள் (financial advisors). பரஸ்பர நிதி நிறுவனங்கள் விற்பனையாளருக்குப் பணம் கொடுக்கின்றன; விற்பனையாளர் அறிவுரையாளருக்குப் பணம் கொடுக்கிறார். பல சமயங்களில் விற்பனையாளரும் அறிவுரையாளரும் ஒரே ஆளாக அமைவதுண்டு.

என் நண்பர் ஒருவரது உறவுக்காரப் பையன் ஒருவன் பரஸ்பர நிதி விற்பனைப் பிரதிநிதியாக இருக்கிறான்.

"ஒரு லட்சம் எங்கிட்ட குடுத்துருங்க. மாசத்துக்கு 2 தடவை அப்போதைக்குப் பிரபலமா இருக்குற ஃபண்டுல பணத்தை மாத்தி மாத்தி ஸ்விட்ச் பண்ணிட்டே இருக்க வேண்டியது என் பொறுப்பு. ஒரே ஃபண்டுல அப்படியே போட்டு வச்சா ஏறாது" இது அவன் சொன்னது. இந்தத் துறை பற்றி நான் அறிவிலியாக இருப்பேன் என நினைத்து இருக்கக் கூடும்.

"நீயே அப்படி ஸ்விட்ச் பண்ணி, உன் பணத்தை மல்டிபிளை பண்ணிக்கலாமே? எதுக்கு இந்தப் பொழப்பு?" என்றும் ஒவ்வொரு முறை புதிய திட்டத்திற்குத் தாவும் போதும் அவனுக்கு எவ்வளவு கிடைக்கும் என்றும் கேட்டேன். என்ன பதில் கிடைத்திருக்கும் என நீங்களே கற்பனை செய்து கொள்ளலாம்.

மூன்று மாதத்திற்கு நிதித் திட்டங்கள் எல்லாம் அதே நிலையில் இருப்பதாக வைத்து ஒரு உருவகம்......

வாரம் 1:
கையிலிருக்கும் பணம் ரூ.100
திட்டம் 1 இல் முதலீடு செய்ய நுழைவுக் கட்டணம் ரூ.2.5
மீதமிருக்கும் பண முதலீடு ரூ.97.50

வாரம் 3:
திட்டம் 1 இல் முதலீடு ரூ.97.50
அதிலிருந்து வெளியேறக் கட்டணம் (exit load) = 2.5% of ரூ.97.50 = ரூ.2.44
கையிலிருக்கும் பணம் ரூ.97.50 - 2.44 = ரூ.95.06
திட்டம் 2 இல் முதலீடு செய்ய நுழைவுக் கட்டணம் = 2.5% of ரூ95.06 = ரூ.2.38
மீதமிருக்கும் பண முதலீடு ரூ.92.68

இப்படியே போனால் 13 வது வாரத்தில் (சுமார் 3 மாதம்) உங்கள் முதலீடு ரூ.72 ஆகக் குறைந்திருக்கும். முதல் திட்டத்தில் மட்டும் விட்டு வைத்திருந்தால் ரூ.97.50 ஆகவும் நீங்களே முதலீடு செய்திருந்தால் ரூ.100 ஆகவும் இருந்திருக்கும்.

இந்தக் கணக்கை அவனிடம் நான் சொன்ன போது, அவன் அதை ரசிக்கவில்லை. எதிர் பார்த்தது தான்.

முதலீடுகள் கொள்கையைப் போல, மனைவியைப் போல இருக்க வேண்டும். கவனமாக ஒருமுறை தேர்ந்தெடுத்தாலே போதும்; அடிக்கடி மாற்றத் தேவையில்லை.

உங்களுக்குத் தெரிந்த யாராவது பரஸ்பர நிதித் திட்டத்தை விற்க முயன்றால், மறுப்பதற்குத் தயங்க வேண்டியதில்லை. "இதனால் உங்களுக்கு என்ன கிடைக்கும்" எனத் திருப்பிக் கேளுங்கள்.

Consumers buy products; investor choose investments. You better be an investor.

திருடர்களிடன் ஜாக்கிரதையா இருப்பது நமது பொறுப்பு!!

வளம் பெறுவோம்.

17 comments:

நன்மனம் said...

நல்ல விழிப்புணர்வு ஏற்படுத்தும் பதிவு.

Buyer beware ஆக இருந்தால் இம்மாதிரி வலையில் இருந்து தப்பலாம்

விற்பனையாளர்கள் விற்பதற்காகவே இருக்கிறார்கள், அவர்கள் நியாயம் தர்மம் பார்த்தால் அவர்கள் சம்பளம் கிடைக்காது என்பதும் உண்மையே.

ஒரே நிதி திட்டத்தில் தொடர்ந்து நீடித்தாலும் சில risk உள்ளது. ஆனால் கண்ணை மூடிக்கொண்டு முதலீடு செய்யாமல் இருக்க பழக வேண்டும்.

Prabu Raja said...

Thanks for providing such good awareness.

But One thing i dont understand Mr. Kuppusamy.

Governement is appreciating in investing Mutual fund and there are so many tax saving funds also.

In all your stories, I find you are forcefully opposing mutual funds.

Instead of giving awareness about theives, If you tell us, the whole procedure on how to choose a fund, and how to invest directly without any agent, that will be a nice motivation for all investor. And nobody will entertain agents if they know the procedure.

It seems you are increasing the fear of MF investor. I hope thats not ur motive.

Please dont think I am degrading your support and service through this blog. I am a continuous reader of your blogs and I appreciate your efforts.

But, raising the awareness about some problems will not be useful on any time. Awareness about the solution is also needed. that is my point.

காசி (Kasi) said...

அருமையான பதிவு!

பொன்ஸ்~~Poorna said...

இப்படி எல்லாம் வேற நடக்குதா.. என்னிடம் ஒருவர் "இணையத்தில் பரஸ்பர நிதிகள் வாங்காதீர்கள்.. எங்களிடம் கொடுத்தால் நல்ல அறிவுரைகளுடன், அதற்கு வரும் கமிஷனில் ஒரு பர்சன்ட் வேறு தருவோம்" என்றார். பேசாமல அவரிடம் கொடுத்து விடலாமா என்று யோசித்துக் கொண்டிருந்தேன்.. இப்போ தான் புரிகிறது... நன்றி குப்புசாமி :)

Kuppusamy Chellamuthu said...

அனைவரின் கருத்துக்கும் நன்றி. அலுவலகத்தில் சற்று வேலை. சந்தை கூட சரசர எனச் சரிகிறது. அதை வேறு ஒரு பக்கம் கவனிக்க வேண்டி இருக்கு. உங்களோட கருத்து, கேள்விக்கேல்லாம் பதில் எழுத கொஞ்சம் நேரம் ஆகும்.

-குப்புசாமி செல்லமுத்து

Kuppusamy Chellamuthu said...

'பங்கு வணிகம்' பதிவு தொடங்கப்பெற்றது முதல் ஊக்கமளித்து வரும் நன்மனத்திற்கு நன்றி சொல்லாமல் இருக்க முடியாது. நீங்கள் சொல்வது போல, தன் கோவணத்தை எலி தூக்கிச் செல்லாமல் அவனவன் தான் பாதுகாத்துக் கொள்ள வேண்டும். பல சமயங்களில் எலி பசப்பு வார்த்தை பேசும். Action of mutual fund salesmen is based on their commission (inventive) at the cost of their own customers, the so-called customers.

பி.கு: அதிகரித்த எழுத்துப் பிழைக்கு வருந்துகிறேன்.

-குப்புசாமி செல்லமுத்து

Kuppusamy Chellamuthu said...

பிரபுராஜா, நன்றாகச் சொன்னீர்கள்.

//பங்கு முதலீடு என்றாலே அஞ்சி ஓடிய பல்லாயிரக்கணக்கான நடுத்தர வர்க்கத்து மக்களையும், அவர்தம் காசையும் திரும்பக் கையைப் பிடித்து அழைத்து வந்திருப்பன பரஸ்பர நிதி நிறுவனங்கள் தான். அதற்காக ஒரு ஸ்பெஷல் வந்தனம். இதுவரை இந்த நிறுவனங்கள் நமது நாட்டிலும், உலகின் ஏனைய பிற தேசங்களிலும் இவர்கள் ஆற்றியுள்ள பணி பொற்றுதலுக்கு உரியது.//
பிரிதொரு பதிவில் நான் எழுதியது இது.

அரசாங்கம் வரிச் சேமிப்பிற்காக பரஸ்பர நிதியில் மட்டும் தான் முதலீடு செய்ய வேண்டும் என்று கட்டாயப் படுத்தவில்லை. வைப்புநிதி சேமிப்பு கூட 80CCC பிரிவில் வருகிறது. (நானும் tax saving mutual fund இல் முதலீடு செய்துள்ளேன்.) சிறு துளி பெருவெள்ளம் போல, இவர்கட்கு சின்னச் சின்னதாய் நீண்ட காலத்திற்குத் தொகை தந்தால் உங்கள் செல்வம் குறையும் என்பது உண்மை. அதைத் தெளிவு படுத்துவது தான் எனது நோக்கம்.

வருமான வரி கட்டச்சொல்லிக் கூடத்தான் அரசாங்கம் ஊக்குவிக்கிறது; எத்தனை பேர் செய்கிறார்கள்? யாரோ சொல்வதால், தூண்டுவதால் மட்டும் எதையும் செய்பவர்களாக நாம் இருக்கக் கூடாது. பரஸ்பர நிதி குறித்து பலரும் உயர்வாகப் பிரசங்கம் செய்வதில் சில முக்கியமான உண்மைகள் மறைக்கப் படுகின்றன. அதை வெளிச்சம் போட்டுக் காட்டவே நான் முயல்கிறேன். ஒரு வீடு வாங்கும் போது என்னென்ன அம்சங்களை ஆராய்கிறோம்? அதே மாதிரி எந்த முதலீடானாலும் ஆராயக் கற்க வேண்டும்.

எனது வளத்தில் 70% பங்குகளிலும், பங்குசார் பரஸ்பரநிதியிலும் தான் இட்டு வைத்துள்ளேன். ஆனால் பரஸ்பரநிதி தான் முதலீடு செய்திருக்கும் நிறுவனத்தின் பங்கு விலையை விட உயரமுடியாது. நிறுவனத்தின் பங்கு விலை அதன் வளர்ச்சியை விட அதிகரிக்காது. அவ்வாறே நிகழ்ந்தாலும் நீண்ட காலம் நிலைக்கக் கூடியதல்ல அது.

இனி வரும் பதிவுகளில் பாசிட்டிவான விஷயங்களையும் ஆராய்வோம். சுட்டிக் காட்டியமைக்கு நன்றி.

-குப்புசாமி செல்லமுத்து

Kuppusamy Chellamuthu said...

காசியின் மறுமொழிக்கு நன்றி.

பொன்ஸ்... இணையத்தில் பரஸ்பரநிதி முதலீடு செய்தாலும் உங்களிடம் வசூலிக்கப்படும் நுழைவுக் கட்டணம் அதே தான். ICICI direct தளத்திலிருந்து ரிலையன்ஸ் நிதியில் விண்ணப்பித்தால், ரிலையன்ஸ் நிர்வாகம் ஐ.சி.ஐ.சி.ஐ. க்கு கமிஷன் கொடுக்கும். இதையெல்லாம் தடுக்க முடியாது. ஒரு வகையில் தரகு தேவையான விஷயமும் கூட.

-குப்புசாமி செல்லமுத்து

நாகு said...

அடக்கடவுளே பத்துநாளைக்கு முன்புதான் 5000 ரூபாயை ஸ்டாண்டர்டு சார்ட்டர்டு என்டர்பிரைஸ் ஈக்விடி பண்டில் போட்டேன். என்னாகும் குப்புசாமிசார்?

Kuppusamy Chellamuthu said...

நிறுவனங்கள் முதன் முறையாகப் பங்குகளை வெளியிடும் IPO (Initial public offer) க்களில் முதலீடு செய்வது மட்டுமே தனது நோக்கமெனக் கூறி வந்ததுள்ளது Stanchart Enterprise Equity Fund. "IPO வில் விண்ணப்பித்தால் நிச்சயமான லாபம், அதனால் IPO வில் மட்டும் தான் முதலீடு செய்வேன்" என்ற எண்ணமுள்ள சிறு முதலீட்டாளர்களைக் குறிவைத்தே இது நடந்திருக்கிறது.

பங்குகளை முதன்முறை வெளியிடும் நிறுவனங்கள் தங்களுக்குச் சாதமான சந்தைச் சூழலில் மட்டுமே அதைச் செய்கின்றன. எனவே ஒரு சில தரமான கம்பெனிகளின் IPO தவிர்த்து அனைத்தும் பேராசையின் விளைவால் முளைப்பவை. குறுகிய வாய்ப்பேயுள்ள இந்தத் தளத்தில் முதலீடு செய்வதாக வந்த இந்தத் திட்டத்தை நீங்கள் தவிர்த்திருக்கலாம். வேண்டுமானால், 10 லட்சத்திற்கு மேல் அதில் முதலீடு செய்தவர்களின் எண்ணிக்கையை எடுத்துப் பாருங்கள். நிறையப் பணம் செலுத்துபவர்கள் நிச்சயம் சிந்திப்பார்கள் என நம்புவோம்.

5000 ரூபாய் என்பது தங்களுக்கு எவ்வளவு பெரிய தொகை எனத் தெரியவில்லை. முதன் முறையாக பரஸ்பர நிதியில் முதலீடு செய்பவர் என உங்களை நினைக்கிறேன். அப்படிப்பட்டவர் வரிச்சேமிப்பு (tax saving) திட்டம் எதிலாவது சேர்ந்திருக்கலாம், அதிலும் சரியும் சந்தையில் கூடத் தாக்குப் பிடித்த வரலாறு படைத்த நிறுவனங்களைத் தேர்ந்தெடுக்கலாம். Franklin templeton, SBI, Reliance etc..

இன்று மட்டும் SENSEX 850 க்கும் மேலான புள்ளிகளை இழந்திருக்கிறது. ஒற்றை நாளில் அதிகமாக விழ்ந்ததாக இது ஒரு சாதனை. எனது வளம் ஒரு வாரத்தில் கிட்டத்தட்ட 6% வரை ஒரு வாரத்தில் ஆவியாகிவிட்டது. இந்தியா மட்டுமின்றி மற்ற நாடுகளின் சந்தையும் இதே மாதிரித் தொடர்ந்து சரிந்தால் IPO க்களின் எண்ணிக்கை சொற்பமாகும். உமது திட்ட நிர்வாகி முதலீடு செய்யும் வாய்ப்பு அருகிப்போகலாம். அதே போல இறங்கு முகமான சந்தையில் list ஆகும் முதல் நாளன்று விலை அதிகரிக்காமல் போகலாம். Stanchart Enterprise Equity Fund ன் பாதகமான அம்சங்கள் இவை.

ஒரு வேளை நான் சொன்னது நடக்காமலே கூடப் போகலாம். Stanchart Enterprise Equity Fund சிறப்பான லாபத்தை உங்களுக்கு ஈட்டித்தரலாம். யார் கண்டது?

இனிமேல் பங்கு வாங்கும் போதோ, பரஸ்பர நிதி வாங்கும் போதோ மளிகை வாங்கும் மனநிலையுடன் இருங்கள்; வாசனைத்திரவியம் வாங்கும் மனநிலையுடன் அல்ல. அப்போது தான் அதன் மதிப்புத் தெரியும்; அதற்கு நீங்கள் கொடுக்கத் தகுந்த விலை புரியும்.

நாம் அனைவருமே கற்றுக்கொள்கிறோம். மனிதர்கள் நடக்க, பேச, எழுத, சைக்கிள் ஓட்ட, நீச்சலடிக்க, காக்கைக் குஞ்சு பறக்க (மீன் குஞ்சுக்கு நீந்தக் கற்றுக்கொடுக்க வேண்டாமென்ற வீண் வாதம் வேண்டாம்) என அனைத்திற்கும் கால அவகாசம், தவறுகளில் இருந்து திருத்திக்கொள்ளும் process தெவை. பங்கு முதலீடு என்பது ஒரு தனித் துறை; அதில் முதல் அடி எடுத்து வைத்திருக்கும் உங்களுக்கு எனது வரவேற்பு.

-குப்புசாமி செல்லமுத்து

Prabu Raja said...

//பங்கு முதலீடு என்றாலே அஞ்சி ஓடிய பல்லாயிரக்கணக்கான நடுத்தர வர்க்கத்து மக்களையும், அவர்தம் காசையும் திரும்பக் கையைப் பிடித்து அழைத்து வந்திருப்பன பரஸ்பர நிதி நிறுவனங்கள் தான். அதற்காக ஒரு ஸ்பெஷல் வந்தனம். இதுவரை இந்த நிறுவனங்கள் நமது நாட்டிலும், உலகின் ஏனைய பிற தேசங்களிலும் இவர்கள் ஆற்றியுள்ள பணி பொற்றுதலுக்கு உரியது.//

இந்த பதிவை நான் முன்பே படித்துள்ளேன். மிக நல்ல பதிவு. ஆனால் எனக்கு மறதி கொஞசம் அதிகம் :-)

kural said...

cool

kural said...

நல்ல விழிப்புணர்வு

Anonymous said...

நல்ல விழிப்புணர்வு
அனைவரின் கருத்துக்கும் நன்றி

Anonymous said...

அனைவரின் கருத்துக்கும் நன்றி

Anonymous said...

அனைவரின் கருத்துக்கும் நன்றி

bose said...

is there any mf which does not collect entry load?i understand one or two funds are offering such funds for their own employees.i dont understand why they collect entry loads even when they are bought online.anyway your article was very informative.note this is my first visit to your blog.i will come back to you many more times since i need lot of advise in investing.