Tuesday, December 19, 2006

பெஸ்ட் ஷேர் மார்க்கெட் அனலிஸ்ட்..

- குப்புசாமி செல்லமுத்து

இருப்பதிலேயே பெஸ்ட் ஸ்டாக் மார்க்கெட் அனலிஸ்ட் யாரென்பது தொடர்பாக ஒரு மின்குழுமத்தில் நடந்த ஆங்கில விவாதத்தை ஆங்கிலப் பக்கத்தில் ஏற்றியுள்ளேன்.

Saturday, November 04, 2006

கந்து வட்டிக்கு ஆப்பு அடிக்கலாம் வாங்க!!

- குப்புசாமி செல்லமுத்து

சற்றுத் தாமதமாகவே இருந்தாலும்....தவிர்க்க முடியாத பதிவு..

சென்னை சோழிங்கநல்லூரில் ஒரு சா·ப்ட்வேர் கம்பெனி வாசல். கழுத்தில் ஐடி கார்டைத் தொங்கவிட்டபடி தம் அடிக்க வெளியே வரும் ஒரு இளைஞனை நான்கு நபர்கள் சூழ்கிறார்கள். வெவ்வேறு வங்கிகளில் இருந்து வந்திருக்கும் அந்தப் பிரதிநிகள், "சார் சார் லோன் வாங்கிக்குங்க சார். எந்த டாக்குமென்டும் தேவையில்லை சார். போன மாச சேலரி ஸ்லிப் மட்டும் போதும்" என்று மொய்க்கிறார்கள்.

இன்னொரு காட்சி. அந்த இளைஞனை விட பத்து மடங்கு மாதம் சம்பாதிக்கிற வளரும் தொழிலதிபர் ஒருவர் இரண்டு மாதமாக வங்கிக்குப் படையெடுத்துக்கொண்டிருக்கிறார். எல்லாம் ஐந்து இலட்ச ரூபாய் கடனுக்காகத்தான். தாத்தாவோட பான் நம்பர், பாட்டியோட வருமான வரித் தாக்கல் விவரம் என்று விவகாரமான ஆவணங்களைக் கேட்டு அவரைக் குடைகிறார்கள்.

நகைச்சுவைக்காக சற்று மிகைப்படுத்திச் சொன்னது போலத் தோன்றினாலும் சோகம் இழையோடும் உண்மை இதுதான். இலட்சக்கணக்கில் சம்பாதிக்கும் தொழில் முனைவர்களுக்கே இந்த நிலை என்றால் அன்றாடம் காய்ச்சிகளின் கதி என்ன? பூ வியாபாரிகள், காய்கறி விற்பவர்கள் அன்றைய வியாபாரத்திற்கு ஆயிரம் ரூபாய் கடன் கேட்டு எந்த ஒரு வங்கிக் கிளையையும் நாட முடியாதே! பிறகு, கந்து வட்டிக்காரர்களே கதி என்று சரணடைய வேண்டியதுதான். நாளெல்லாம் உழைத்து கிடைக்கும் சொற்ப இலாபத்தின் பெரும் பகுதியை மீட்டர் வட்டி தின்றது போக மிச்சமிருப்பது இவர்களின் வயிற்றுக்கும் வாய்க்குமே சரியாக இருக்கிறது. ஒரு சில சந்தர்ப்பங்களில் அத்தி பூத்தாற்போல சில வங்கிகள் கடன் கொடுத்தாலும், தவணை தேதி தவறினால் மூன்றாவது நாளே வந்து குரல்வலையில் காலை வைத்து மிதித்து விடுவார்கள்.

சாமானிய மனிதனுக்கான நியாயமான சிறு நிதித்தேவைகள் இப்படியெல்லாம் புறக்கணிக்கப்படுகிற சூழ்நிலையில் வசிக்கும் நமது கவனத்தை பங்களாதேஷைச் சேர்ந்த பொருளாதார மேதை முகமது யூனுஸ் பெற்றுள்ள நோபெல் பரிசு 'அட' போட்டு ஈர்க்கிறது. பங்களாதேஷ் மக்களோடு கூடச்சேர்ந்து நமது மேற்கு வங்காள மக்களும் 'எங்கள் பெங்காளி' என்று கொண்டாடும் இவர் 'மைக்ரோகிரெடிட்' எனப்படும் குறுங்கடன்களின் தந்தை என அறியப்படுகிறார். ஏழ்மைக்கு தானமோ தர்மமோ முடிவல்ல. அது மேலும் சோம்பேறித்தனத்தை வளர்க்கும். அதை விட, சுயமாக உழைத்து தன்மானத்துடன் பிழைக்க வைப்பதே வழி என்று உறுதியாகச் சொல்பவர் அவர்.

ஒரு சினிமா கதாநாயகனைப் போல யூனுஸ் வாழ்க்கை ஆரம்பித்தது. அவர் அமெரிக்காவில் டாக்டர் படிப்பு மேற்கொண்ட போது மேற்கு பாகிஸ்தானை எதிர்த்து இந்தியாவின் ஆதரவோடு பங்களாதேஷ் விடுதலைப் போராட்டம் நடந்தது. அமெரிக்காவில் இருந்து கொண்டு போராட்டத்திற்கு ஆதரவு திரட்டியது, கிழக்கு பாகிஸ்தான் ஊழியர்களை தூதரகத்தில் இருந்து ராஜினாமா செய்ய வைத்தது என்று புகழ்பெற்றார். அதன் பிறகு அங்கு பார்த்த பொருளாதாரப் பேராசிரியர் வேலையை உதறிவிட்டு தாய்நாடு வந்து சிட்டகாங் பல்கலைக் கழகத்தில் அதே பணியை ஏற்றார்.

அந்தச் சமயத்தில் களப்பணியின் போது மூங்கில் கைவினைப் பொருட்கள் செய்யும் ஒரு கிராமப் பெண்ணைச் சந்தித்தார். அந்தப் பெண் 5 டாகா(பங்ளாதேஷ் நாணயம்) பணம் கடன் வாங்கியதால் வட்டிக்கடைக்காரருக்குக் கிட்டத்தட்ட அடிமையாகவே மாறியிருந்தார். மேலும் விசாரித்த போது அதே போல 42 பெண்கள் அந்த ஊரில் இருந்ததைக் கண்டார். அவர்களின் ஒட்டு மொத்த 856 டாகா (27 டாலர்) கடனை எல்லாம் தானே அடைத்து அது வரை அவர்களைப் பீடித்திருந்த அநியாய வட்டியில் இருந்து விடுவித்தார்.

பிறகென்ன? கைவினைப் பொருளில் கிடைத்த இலாபத்தைக் கொண்டு வெகு சீக்கிரத்தில் அவர்கள் அந்தப் பணத்தைத் திருப்பிச் செலுத்தி விட்டார்கள்.
இந்த எளிமையான தத்துவத்தின் அடியொட்டி அவரது கிராமின் வங்கி நிறுவப்பட்டது. இப்போது 65 இலட்சம் பேர் அதில் கடன் வசதி பெறுகிறார்கள். அதில் 96 சதவீதம் பெண்கள். 98.5 சதவீதம் கடன்கள் திருப்பிச் செலுத்தப்படுகிறது. ஏய்ப்பதெல்லாம் இல்லை. தவணை செலுத்த முடியவில்லை என்றாலும் கூட என்ன பிரச்சினை என்று ஆராய்ந்து அடுத்த முறை செலுத்துமாறு ஊக்குவிக்கிறார்கள், மிரட்டுவதில்லை. தேவையானால் மேலும் மேலும் கடன் தருகிறார்கள். ஆனால் தள்ளுபடி மாத்திரம் இல்லை.

பணக்காரர்கள் மேலும் பணக்காரர்கள் ஆகிறார்கள். ஏழைகள் மேலும் ஏழைகள் ஆகிறார்கள் என்ற கூற்று உண்டு. பரவலாக விவாதிக்கப்படும் பொருளாதார வளர்ச்சி மேல்தட்டு மக்களை மேலும் உயர வைக்கிறதே தவிர ஏழைகளை முன்னேற்றினோமா என்பது சந்தேகமாகவே உள்ளது. நமது நாட்டில் வறுமைக் கோட்டிற்குக் கீழ் வாழும் குடும்பங்கள் நிறையவே இருக்கின்றன. அதிலும் பெண்களின் பாடு மிகவும் பரிதாபமானது. நியாயமான வட்டியில் ஒரு சிறு தொகை கடன் கிடைத்தால் அவர்களே சுயமாக தொழில் முனைய முடியும். காந்திகிராமப் பல்கலைக் கழகம் போன்ற அமைப்புகள் சுய உதவிக் குழுக்களை உருவாக்க பெரும் தூண்டுதலாக இருக்கின்றன.

ஆனால் கடன் கொடுக்க யாரும் இல்லை. கண்ணியமாக உழைத்து வாங்கிய கடனைப் பொறுப்போடு திரும்பச் செலுத்துவதில் ஆண்களை விட பெண்களே சிறந்தவர்கள். ஒரு பெண் பொருளாதாரத் தன்னிறைவு அடைந்தால் அந்தக் குடும்பத்தின் குழந்தைகள் கெளரவமான கல்வி, சுகாதரமான வாழ்க்கை ஆகியவற்றைப் பெற முடியும். ஆரோக்கியமான அடுத்த தலைமுறை உருவாகும். வறுமையும், ஏற்றத்தாழ்வும் ஒழிந்தாலன்றி குற்றங்களும், தீவிரவாதமும் குறையாது.

வங்கிகள் நேரடியாக கிராமம் கிராமமாகச் சென்று குறுங்கடன் வழங்குவதில் சிரமம் இருக்கலாம். சொகுசாக இருந்து பழக்கப்பட்ட வங்கி ஊழியர்கள் அலைவதற்கு முகம் சுழிக்கலாம். அது போக நிறையச் செலவுகளும் ஏற்படும். அதற்காகவே மைக்ரோ ·பைனான்ஸ் இன்ஸ்டிடூஷன் (MFI) என்ற தனி அமைப்புகள் அமைத்து அவற்றை சுய உதவிக் குழுவோடு இணைப்பதற்கு ரிசர்வ் வங்கி வழி செய்திருக்கிறது. சாதாரண வங்கி அலுவலுக்கு அப்பால் கூட்டுறவுக் கட்டமைப்புப் போல இந்த இரு அமைப்புகளும் தன்னார்வத்துடன் இயங்கி பணத்தேவை உடையவர்களைக் கண்டறிந்து உதவ இயலும். இந்தியாவில் சுய உதவிக் குழுக்கள் குறுங்கடன்கள் மூலம் பயன் அடைந்த நிகழ்வுகள் பல உள்ளன. இருந்தாலும் நமது மக்கள் தொகையோடு ஒப்பிடுகையில் இது போதுமானதாக இல்லை. அது தவிர இந்த முறையில் வழங்கபட்ட கடனை வசூலிக்க ஆந்திராவில் மேற்கொள்ளப்பட்ட வற்புறுத்தல்கள் கடும் விமர்சனத்திற்கு உள்ளானது என்பதையும் கவனிக்க வேண்டியிருக்கிறது.

பல வருடங்களுக்கு முன்னர் முகமது யூனுசுக்கு நோபெல் பரிசு தந்திருக்க வேண்டுமென முன்னாள் அமெரிக்க அதிபர் பில் கிளிங்டன் சொன்னார். அதற்கு யூனுஸ், "கிளிங்டன் எனது நண்பர். நண்பர்கள் ஒருவரை ஒருவர் புகழ்வது இயல்புதான்" என்று தன்னடக்கத்துடன் பதில் கூறினார்.

இப்போதாவது கிடைத்திருக்கிறதே என்ற திருப்தி ஒரு பக்கம் இருந்தாலும் பொருளாதாரத்திற்கான நோபல் பரிசுதான் அவருக்கு வழங்கியிருக்க வேண்டும் என்று கருதுவது இயல்பு. ஆனால், "சமுதாயத்தின் அனைத்துத் தரப்பு மக்களும் வறுமையில் இருந்து விடுபட்டால் ஒழிய நீடித்த அமைதியை ஏற்படுத்த முடியாது. அதற்குக் குறுங்கடனின் பங்களிப்பு முக்கியமானது. அந்த முயற்சியைக் கெளரவிக்கும் விதமாகத்தான் அமைதிக்கான பரிசு" என்று நோபெல் கமிட்டி தன்னிலை விளக்கம் அளித்துள்ளது.

இந்தக் கெளரவம் முகமது யூனுஸ் என்ற தனிமனிதனுக்கோ அவரது வங்கிக்கோ பெருமை சேர்ப்பதை விட, 'மைக்ரோ கிரெடிட்' கோட்பாடு ஏற்படுத்தும் பொருளாதார, சமூக மாற்றங்களை உலகம் திரும்பிப் பார்ப்பதற்கான வாய்ப்பாகவும், மூன்றாம் உலக நாடுகள், ஏன் முன்னேறிய நாடுகளே கூட, இதில் இருந்து கற்றுக் கொள்ளும் வாய்ப்பாகவும் அமையுமானால் மகிழ்ச்சி. இதை நாம் சொல்லவில்லை. 66 வயதாகும் யூனுஸ் சொல்கிறார்.

நமது வங்கிகளுக்கு, அதிலும் அரசு வங்கிகளுக்கு இது எட்ட வேண்டும். அநியாய வட்டிக் கொடுமைகளில் இருந்து சாதாரண மக்களைக் காக்க வேண்டும். அதே போல கடன் தள்ளுபடி செய்வதை விட மக்களுக்கு மேலும் கடன் வழங்கி எத்தனை ஆண்டுகள் ஆனாலும் பரவாயில்லை அவர்கள் திருப்பிச் செலுத்துவதற்கான ஊக்கம் அளித்துக் காத்திருக்கும் துணிச்சல் உள்ள அரசும் வேண்டும். அடிக்கடி வெள்ளத்திலும், புயலிலும் சிதறும் ஒரு சிறு நிலப்பரப்பில் இருந்து முகமது யூனுஸ் என்ற தனிமனிதன் செய்ததை பல பெருமைகளுக்குச் சொந்தக்காரர்களான நம்மால் செய்ய முடியாதா என்ன?

Wednesday, June 28, 2006

ரியல் மியூச்சுவல் 'ஃபண்ட்'கள்!!

குப்புசாமி செல்லமுத்து

ஷேர் மார்க்க்ட்டில் முதலீடு செய்வதை விட ரியல் எஸ்டேட் சொத்துக்களில் முதலீடு செய்வது பாதுகாப்பானது என்கிற நம்பிக்கை எல்லோருக்கும் இருப்பதாக அறிகிறோம்.

பங்குச் சந்தையில் ஆயிரம் ரூபாய் இருந்தால் கூட ஏதாவது வாங்க முடியும். ஆனால் ரியல் எஸ்டேட் என்று நினைக்கவே சில இலட்சங்கள் ஆகும். இந்தப் பிரச்சினைகளுக்கான ஒரு தீர்வு என ரியல் எஸ்டேட் மியூச்சுவல் நிதித் திட்டங்கள் அமையும் என எதிர்பார்க்கலாம்.

சரியாக நினைவில்லை. இன்றும் கூட இது போன்ற திட்டங்கள் இயங்கி வருகின்றன. குறைந்த பட்ச முதலீடாகப் பல இலட்சங்கள் வேண்டுமென்கிறன விதிமுறைகள் இருக்கின்றன. ஆகவே, பெரும் சீமான்களுக்காக அவை அமைந்திருக்கின்றன.

இந்தியப் பத்திரப் பரிவர்த்தனை வாரியம் (Securities and Exchange board of India - SEBI) சமீபத்தில் சிறு முதலீட்டாளர்களும் பங்கு கொள்ளும் வகையில் சீர்திருத்தங்களைக் கொண்டு வந்துள்ளது. சராசரி பரஸ்பர நிதித்திட்டங்கள் போலப் பொதுமக்கள் அனைவரும் பங்குபெறும் வகையில் பணம் திரட்ட செபி அனுமத்துள்ளது. மிக முக்கியமான சீர்திருத்தமாகக் கருதப்படுகிறது இம்முடிவு.

இவ்வாறு வரவிருக்கும் திட்டங்கள் எந்த மாதிரி கட்டமைப்புப் பணீகளில் முதலீடு செய்ய வேண்டும் என்றும் செபி வரையறுக்கிறது. கட்டிடம், கட்டுமானம், தொழிற்பூங்காக்கள் போன்ற பெருமுதலீடு தேவைப்படும் project போன்றவற்றில் நேரடியாக அல்லது அது போன்ற செயலில் ஈடுபடும் நிறுவனங்களில் பங்குகளின் மூலம் மறைமுகமாகவோ இப்பணம் பாய்ச்சப்படலாம்.

எப்போது வேண்டுமானாலும் திரும்பப்பெறுகிற open-ended வழிமுறைகள் இவற்றில் இருக்காது. நீண்ட காலத்திற்கு முதல் அடைத்து வைக்க வேண்டிய கட்டாயம் இருப்பதால் இந்த ஏற்பாடு. அதே வேளை, அவை பங்குச் சந்தையில் பங்குகளைப் போல விற்க இயலுகிற ETF (Exchange Traded Fund) திட்டங்களாக இருக்குமென எதிர்பார்க்கலாம். நிதி நிர்வாக நிறுவனம் தினந்தோறும் நிகரச் சொத்து மதிப்பைக் கணக்கிட்டுத் தெரிவிகக் வேண்டும் எனவும் செபி வலியுறுத்தியுள்ளது.

அளவற்ற உள்கட்டுமானத் தேவை இருக்கிற நமது நாட்டில், அவற்றை பூர்த்தி செய்ய வெளிநாட்டு முதலீடுகளை முழுக்க முழுக்க நம்ப வேண்டிய தேவையை மேற்சொன்ன நடவடிக்கை ஓரளவு தணிக்கும் என எதிர்பார்க்கலாம்.

Friday, June 23, 2006

ஜகா வாங்கும் கம்பெனிகள்..

- குப்புசாமி செல்லமுத்து

சற்றே பழைய (4-5 நாட்கள்) செய்தி..

பங்குச்சந்தையின் பின்னடைவு காரணமாக இரண்டு நிறுவங்களின் IPO வெளியீடுகள் முழுதுமாக விற்கப்படாததால், அந்த நிறுவனங்கள் அதனைத் திரும்பப் பெற்றுக் கொண்டுள்ளன. அவை புளூபிளாஸ்ட் இன்டஸ்ட்ரீஸ் மற்றும் விக்னேஸ்வரா எக்ஸ்போர்ட் லிமிடேட்.

விக்னேஸ்வரா எக்ஸ்போர்ட் லிமிடேட் தனது விலைப் பட்டையை ரூ121-140 என்கிற அளவில் இருந்து ரூ110-124 என்கிற அளவாகக் குறைத்தது. அப்படி இருந்தும் 89% மட்டுமே விண்ணப்பங்கள் வந்தனவாம். இதனால் விரக்தியடைந்த நிறுவனம் வெளியீட்டு முடிவில் இருந்து பின்வாங்குகிறது. சுமார் 55-60 கோடி ரூபாய் திரட்ட உத்தேசித்திருந்தார்கள் இவர்கள்.

அதே கதிதான் புளூபிளாஸ்ட் 'இன்டஸ்ட்ரீஸ்'க்கும். இவர்கள் திரட்டத் திட்டமிட்டிருந்தது ரூ30 கோடி. IPO திட்டம் தகர்ந்த பின்னர் வேறு வழிமுறைகளில் (கடன் பத்திரங்கள்) தனது விரிவாக்கத்திற்குத் தேவையான ரூ32 கோடியைத் திரட்டத் திட்டமிட்டுள்ளது கம்பெனி.

ரிலையன்ஸ் பெட்ரோலியம் IPO விற்கு முதலீட்டாளர்கள் விண்ணப்பித்த தொகை ஒரு இலட்சம் கோடிக்கும் மேல். இரண்டே மாத இடை வெளிக்குப் பின் ரூ30 கோடி வெளியீடுகள் கூடத் திணறுகின்றன.

தயாராக இருக்கும் DLF, MCX மற்றும் மின் நிதி நிறுவனம் (Power Finance corporation) ஆகியவற்றின் முதல் பொது வெளியீடுகள் ஆர்வத்துடன் கவனிக்கப்படுகின்றன. ஏனென்றால், இவை வளரும் துறைகளில் முக்கியமான நிறுவனங்கள்...

Sunday, June 18, 2006

நான் அடிக்கும் சிக்சர்(6)..

-குப்புசாமி செல்லமுத்து

தனது 'ஆறு' பதிவில் பொன்ஸ்.. என்னை அழைத்திருந்தார். தனக்குப் பிடித்த ஆறு விஷயங்களை விவரித்தும், விரும்பும் ஆறு பதிவர்களை இதே போல அழைத்தும் எழுதவேண்டும் என்பது ஆட்டத்தின் விதிமுறை.

  • ஸ்ரீதேவி சிரிப்பு முதல், நமீதா இடுப்புவரை இரசித்த பெண்கள்...
  • கொழாப்புட்டு முதல் கோழிக்கறி வரை சுவைத்த உணவுகள்....
  • அமராவதி முதல் ஆம்ஸ்டெல் நதிவரை பார்த்த இடங்கள்...

பதிவு போட ஆசை தான். இருப்பினும் வேறு அறுவரை அழைப்பது என்பது இயலாத காரியமாகப் படுகிறதாகையாலும், விளையாடத்தெரியாத ஆட்டத்தில் கலந்துகொள்ளக்கூடாது என்ற பாதுகாப்பு உணர்ச்சி காரணமாகவும், விதிமுறைகளைச் சற்று மாற்றி நானே ஒரு தனியாட்டம் போட முடிவு செய்து விட்டேன். பொன்ஸ் பொறுத்துக் கொள்வாராக.

நான் இரசித்த, இன்னும் தொடர்ந்து இரசிக்கின்ற ஆறு முதலீட்டாளர்களை இந்தப் பதிவில் இரு சிறு அறிமுகம் செய்துவிடுவது சுலபம் எனப் பட்டதால், அது தான் ஆட்டத்தின் ரூல்ஸ்.

1. வாரன் பஃபட் (warren Buffett)

பஞ்ச் டலயாக் : Risk comes from not knowing what you're doing

பிறப்பு : 1930, ஒமாஹா, நெப்ராஸ்கா மாகாணம், அமெரிக்கா

* நடிப்புக்கு சிவாஜி என்றால், முதலீட்டிற்கு வாரன்.
* அவரது 'பிராண்ட்' முத்திரையைக் குத்தி எதை எழுதினாலும் விற்றுத் தீர்ந்து விடுவது வாடிக்கை.
* இவர் 1965 ஆம் ஆண்டு அப்போது நலிந்திருந்த Berkshire Hathway நிறுவனத்தைக் கையில் எடுத்த சமயத்தில் அதன் பங்குகளை பத்தாயிரம் ரூபாய்க்கு வாங்கியிருந்தால், இன்றைய மதிப்பு சுமார் 50 மில்லியன் (5 கோடி). அதே 1965 இல் அதே பத்தாயிரத்தை S&P குறியீட்டில் முதலிட்டிருந்தால் அது வெறும் ஐந்து இலட்சமாகத் தான் வளர்ந்திருக்கும்.
* 40 பில்லியன் டாலருக்கும் அதிகமான சொத்துச் சேர்த்து வைத்திருந்தாலும் தான் இறந்த பின் அதன் பெரும்பகுதி அனாதைகளுக்குப் போய்ச் சேருமாறு உயில் எழுதியிருக்கிறார்.
* ஒமாஹாவின் முனிவர் (Oracle of Omaha) எனப் பலராலும் செல்லமாக அழைக்கப்படுபவர்.
* 40 ஆண்டுகளுக்கு முன் முப்பதாயிரம் டாலருக்கு வாங்கிய அதே வீட்டில் இன்னும் வசித்து வருகிறார்.
* ஒழுக்கம், கட்டுப்பாடு, பகுத்தறிதல், பொறுமை ஆகியவற்றைப் போதிப்பதோடு நில்லாமல், கடைபிடித்துக் காட்டியவர்.
* 1990 களின் இறுதியில் சகட்டுமேனிக்கு ஏறிய 'டெக் & டாட் காம்' கம்பெனிகளைத் தவிர்த்த வெகு சில முதலீட்டாளர்களில் தலையாயவர்.
* ஆங்கிலத்தில் வேடிக்கையாகச் சொல்வார்கள். You might be an atheist; but when it comes to investing Warren is your god
* பங்குதாரகளுக்கு அனுப்பும் ஆண்டறிக்கையில் இவர் எழுதும் கருத்துக்கள், நேரு இந்திராவிற்கு எழுதிய கடிதங்களின் அளவிற்குப் பிரபலம்.


2. ஜார்ஜ் சோரஸ் (George Soros)

பஞ்ச் டயலாக்: "It's not whether you're right or wrong that's important, but how much money you make when you're right and how much you lose when you're wrong."

பிறப்பு : 1930, புடாபெஸ்ட், ஹங்கேரி

* சினிமாவில் வரும் கதாநாயகனைப் போல ஆரம்பித்தது இவர் வாழ்க்கை.
* டவுசர் போட்ட காலத்தில் ஹிட்லரின் இனவெறிப் படைகளுக்குப் பயந்து பதுங்கு குழியில் ஒளிந்து வாழ்ந்த ஹங்கேரி யூதச் சிறுவன் ஜார்ஜ்.
* இங்கிலந்தில் அகதியாகத் தஞ்சம் புகுந்து, அங்கே பட்டம் பெற்றுப் பின்னர் அமெரிக்கா வந்தவர்.
* வாரன் பஃபட் பேட்டிங் திராவிட் பாணி என்றால், ஜார்ஜுக்கு சேவாக் பாணி.

* 'விலை இறங்கும் முன் விற்க வேண்டும்' எனப் பலர் நினைப்பர். ஆனால் சோரஸ் விற்றதால் மட்டுமே விலை இறங்கிய காலமெல்லாம் உண்டு.
* ஷேர் மார்க்கெட் தவிர்த்து, நாணயம், தங்கம் என இவர் தொடதே இடமே இல்லை.
* ஜான் மேஜர் ஆட்சிக்காலத்தில் ஒரே நாளில் பிடிட்டிஷ் நாணயமான 'பவுண்ட்' ஐ விற்று ஒரு பில்லியன் டாலர் (ரூ4,500 கோடி) எடுத்தவர்.
* இவர் சொன்ன ஒரேயொரு வார்த்தைக்காக ரஷ்யப் பங்குச் சந்தை ஒரு மணி நேரத்தில் 12% சரிந்தது எனக் கூறுவார்கள்.
* சோரஸ் ஆரம்பித்த குவாண்டம் நிதியில் (quantum fund) 1969 ஆம் ஆண்டு ஒரு ரூபாய் இட்டிருந்தால் 1994 இல் அது 1,500 ரூபாயாகப் பெருகியிருக்கும்.


3. பீட்டர் லிஞ்ச் (Peter Lynch)

பஞ்ச் டயலாக்: Go for a business that any idiot can run - because sooner or later, any idiot probably is going to run it.
பிறப்பு : 1944 அமெரிக்கா

* 1978 இல் இவரது Fidelity Magellan Fund நிதியில் ஒரு ரூபாய் முதலீடு செய்தவர்களுக்கு 1990 இல் அது 700 ரூபாயாகத் திரும்பக் கிடைத்திருக்கும்.
* 46 வயதில் ஓய்வு தாமாக விரும்பி ஓய்வு பெற்ற மனிதர்.
* உலகின் மிகப் புகழ் மிக்க மியூச்சுவல் ஃபண்ட் நிர்வாகிகளில் ஒருவர்
* அப்போதைக்கு எது சிறப்பாக இருக்கிறதோ அதில் முதலீடு செய்து காலத்திற்குத் தக மாற்றிக் கொள்வதால் இவரைப் 'பச்சோந்தி' என்று கூடக் குறிப்பிடுவார்கள்.
* இவர் எழுதிய One upon Wall street புத்தகம் பற்றித் தெரியாதவர்கள் மிகக் குறைவு.

4. ஜான் டெம்பிள்டன் (John Templeton)

பஞ்ச் டயலாக்: The time of maximum pessimism is the best time to buy and the time of maximum optimism is the best time to sell

பிறப்பு : 1912 டென்னிசி, அமெரிக்கா

* டெம்பிள்டன் குழுமத்தைத் துவங்கியவர்.
* உலக மியூச்சுவல் ஃபண்ட்களில் தந்தை என அறியப்படுபவர்.
* உலகப்போர் நடந்த சமயத்தில் வங்கியில் எவ்வளவு கடன் கிடக்குமோ அவ்வளவு கடன் வாங்கி, ஒரு டாலருக்குக் குறைவாக விற்ற அத்தனை ஷேர்களையும் வாங்கிய இருபது(கள்) வயதுத் துணிச்சல்காரர்.
* நான்கு வருடத்தில் அது நான்கு மடங்கானது அதன் பின்னர் சரித்திரமாகிப் போன சங்கதி.
* இவரிடத்தில் 65 ஆயிரம் டாலர் கொடுத்துவைத்த லெராய் என்பவர், நாற்பது வருடத்திற்குப் பின் 3.7 கோடி டாலராகத் திருப்பிப் பெற்றாராம்.


5. ராகேஷ் ஜுஞ்சுன்வாலா

பிறப்பு: 1960, மும்பை, இந்தியா

* படித்தது CA, வெளிநாடு சென்று ஆடிட்டர் வேலை பார்க்காமல், 1985 ஆம் ஆண்டு ரூ5,000 த்துடன் மும்பைப் பங்குச் சந்தையில் நுழைந்தவர்.
* ஐந்தாயிரம் இன்று பல ஆயிரம் கோடிகளைத் தாண்டி நிற்கிறது.
இருந்தாலும் உண்மையான சொத்து மதிப்பினை மீடியாவிற்குச் சொல்வதில் இவருக்கு விருப்பம் இல்லை.
* இவர் கால்பதித்த போது 150 புள்ளிகளில் இருந்த சென்செக்ஸ் இன்று 10,000 புள்ளிகளில், கிட்டத்தட்ட 70 மடங்கு உயர்ந்திருக்கிறது. ஆனால், அண்ணாச்சி பல ஆயிரம் மடங்கு தன் பணத்தைப் பெருக்கியுள்ளார்.
* BSE சந்தையில் நடந்த குண்டு வெடிப்பில் உயிரிழந்த சமோசா விற்பவரை இன்னும் நினைத்துப் பார்க்கிறார்.
* இந்தியாவில் பங்கு முதலீட்டைப் புரிந்து கொண்டு சாதிக்க நினைக்கும் இளைஞர்களுக்கு ராகேஷ் முன் மாதிரி எனச் சொல்லலாம்.


6. நீயோ, நானோ??

பெஞ்சமின் கிரகாம் போன்ற சிலர் இன்னும் இருந்தாலும், ஆறாவது யார் ரசிக்கப்படவேண்டும்? நம்மில் ஒருவர்..

Tuesday, June 13, 2006

30% சரிவு சாத்தியமா??

-குப்புசாமி செல்லமுத்து

இதே பதிவு ஆங்கிலத்திலும்..

எல்லா பதிவுகளிலும் disclaimer போட்டு நெகட்டிவ் மேசேஜ் மட்டுமே நான் சொல்வதாக நண்பர் ஒருவர் குறைபட்டுக் கொண்டார். இருந்தாலும்...30% சரிவு சாத்தியமா??

இன்வெஸ்ட்மென்ட் வாத்தியார் மார்க் ·பேபர் கொஞ்ச நாளுக்கு முன்னாடி இந்தியா ஷேர் மார்க்கெட் 30% குறையும்னு சொன்னாரு. இன்னொன்னு கூடச் சொல்லிருக்காரு அந்த ஆளு. அதாவது அக்டோபர் வரைக்கும் யாரும் ஷேர் மார்க்கெட் பக்கம் வராமே, லீவு போட்டுட்டுப் போகச் சொல்லிருக்கார்.

சரீ.. எதோ பெரிய மனுசன்..அவரு சொல்றத ஆராயறத விட்டுட்டு, நம்ம ரேஞ்சுக்கு ஒரு கால்குலேசன் போடலாமா? 30% சரிவு சாத்தியமா? இதே கேள்விய ஒரு மாசம் முந்தி யார்கிட்டயாவது கேட்டிருந்தா செருப்பால அடிச்சுருப்பாங்க. ஆனா இன்னிக்கு அது உண்மையாகிருச்சு. சென்செக்ஸ் 12,600 ல இருந்து 9,000 வந்துருச்சு. கிட்டத்தட்ட 30% கொறஞ்சுதா?? அத்த வுடுப்பா..இதுக்கு மேல (சாரி கீழ) கொறையுமா? ஹி..ஹி.. காலம் தான் பதில் சொல்லனும் அதுக்கு..

ஒரு நிறுவனம் பங்கு PE விகிதம் 25 என்ற அளவிலே பரிவர்த்தனை செய்யப்பட்டு வருவதாக வைத்துக்கொள்வோம். அவர்களின் பிசினஸ் சறுக்குவதால் அல்லது பொதுவாக சந்தை சரிவதனால், அதனை சந்தையின் அங்கத்தினர் PE விகிதம் 17 என்கிற அளவில் மறுமதிப்பீடு செய்வது என்பது நிகழக்கூடியது தான். அதாகப்பட்டது -32%. அதன் பின் அந்த நிறுவனம், அதன் துறை, தேசத்தின் பொருளாதாரம் முதலிய காரணங்களால் (மட்டுமல்லாது) மேலும் பாதிக்கப்படலாம்.

இன்று (13-ஜூன்-06) சென்செக்ஸ் சுமார் 9,000 என்ற அளவில் முடிவடைந்துள்ளது. சில நிபுணர்கள் மும்பைப் பங்குச் சந்தைக் குறியீட்டு எண்ணின் உண்மையான மதிப்பு 6000 முதல் 7000 வரை எங்கோ ஒரு புள்ளி எனக் கருத்துக் கூறுவதாக அறிகிறோம். இதனை மேலும் நோக்கும் முன், ஒரு விஷயத்தைத் தொட்டுப் பார்ப்பது நலம். பெரும்பாலான நிறுவனங்களின் இன்றைய (அல்லது கடந்த சில நாள்) விலை, அவை சென்செக்ஸ் 6,000 இல் இருந்த போது கிடைத்த அதே அளவிற்கு வீழ்ந்துள்ளது. என்னதான் குறியீடு 9,000 த்தில் ஊசலாடினாலும் ஆழமாகக் காலை விட்டுத் துழாவினால், பாதிப்பு அதனை விடப் பெரிதாகத் தட்டுப்படுகிறது.

கிட்டத்தட்ட எல்லா சிறு முதலீட்டாளர்களும் தங்கள் போர்ட்போலியோ(portfolio) மதிப்பில் 40 முதல் 60% வரை சராசரியாக தொலைத்திருக்கின்றனர். குறியீடு அடைந்த சரிவை விட இது அதிகமே. சென்செக்ஸ் என்பது ஒட்டு மொத்த சந்தையின் நிலையைத் துல்லியமாக வெளிக்காட்டும் அளவீடில்லை என்றும் எண்ணத் தோன்றுகிறது.

ஒன்று மட்டும் என்னால் ஜீரணிக்க முடியவில்லை. அது என்னவென்றால், இன்று 7,000/6,000 என இலக்குச் சொல்லும் பலரும் சில வாரங்களுக்கு முன் 15,000/17,000 என இலக்குச் சொன்னார்கள். அன்றைய கூற்று, "இந்தியாவின் பொருளாதாரம் மிக வலுவாக உள்ளது. நிறுவனங்கள் திறமையாகச் செயல்படுகின்றன. இளவயது மக்கள் சக்தி அதற்கு மேலும் வலுச் சேர்க்கிறது. பிற நாடுகளை விட சற்றே விலை கூடுதலாக இருந்தாலும், இங்கே கிடைக்கும் சரக்கின் தரம் அதிகம் என்பதனால் அது நியாயப்படுத்தப் பட்டதே. நீண்ட கால அளவிலே, விலைகள் கவர்ச்சிகரமாகத் தான் உள்ளன"

ஒரு மாதத்தில் பெரிதாய் (சிறிய மாறுதல்கள் உண்டு) ஒன்றும் மாறிவிடவில்லை என்றாலும், இன்றைய கூற்று, "பிற நாடுகளை விட இந்தியச் சந்தை காஸ்ட்லி. அரசின் ஏற்றுமதி-இறக்குமதி முரண்பாடு, பட்ஜெட் பற்றாக்குறை, கம்யூனிஸ்டுகள் அட்டகாசம், ஊழல் மிகுந்த அரசு இயந்திரம், முதிர்ச்சியற்ற பங்குச் சந்தை.......இன்னும் சிலதுகள்"

Friday, June 09, 2006

எரியும் பங்குச் சந்தை!!

- குப்புசாமி செல்லமுத்து

மே மாதம் 5 ஆம் தேதி "எரியும் பங்குச் சந்தையும் எண்ணெய் வார்க்கும் மியூச்சுவல் ஃபண்ட்களும்" என்ற தலைப்பில் எழுதப்பட்ட ஒரு பதிவு, தலைப்பு நீளமாக இருந்தமையால் பிரசுரிக்கப்படாமல் அழிந்து விட்டது. அதே சரக்கு மீள் பதிவாக மீண்டுமொரு முறை இங்கே தலைப்பு மாறி வந்துள்ளது. I thought it is appropriate to re-publish this now just after reading, "mutual funds had been net sellers to the tune of Rs.500 redemption pressure". ஒரு மாதத்திற்கு முந்தையது போலவே இன்றும் இக்கட்டுரை பொருந்துமென்பதே எனது எண்ணம். சரி....கீழே வாசிப்போம்..
------------------------------------------------------------------

பாமரன் முதல் ப.சிதம்பரம் வரையில் அனைவரது பேச்சிலும் அடிக்கடி அடிபடுவது பங்குச்சந்தையும், பங்குசார் பரஸ்பர நிதிகளும் (equity mutual funds) தான் என்றால் அது மிகையல்ல.

பங்கு முதலீடு என்றாலே அஞ்சி ஓடிய பல்லாயிரக்கணக்கான நடுத்தர வர்க்கத்து மக்களையும், அவர்தம் காசையும் திரும்பக் கையைப் பிடித்து அழைத்து வந்திருப்பன பரஸ்பர நிதி நிறுவனங்கள் தான். அதற்காக ஒரு ஸ்பெஷல் வந்தனம். இதுவரை இந்த நிறுவனங்கள் நமது நாட்டிலும், உலகின் ஏனைய பிற தேசங்களிலும் ஆற்றியுள்ள பணி பொற்றுதலுக்கு உரியது.

"மியூச்சுவல் ஃபண்ல போன வருசந்தான் பத்தாயிரம் பொட்டேன். இப்போ இருபது ஆயிரம் ஆகிடுச்சு. நீயும் உன்னோட பி.எஃப், பேங்க் பேலன்ஸ் எல்லாத்தையும் எடுத்து மியூச்சுவல் ஃபண்ல போட்ரு. கவலையே இல்ல. போட்ட பணம் கம்மியெல்லாம் ஆகாது. ஆனா ஷேர்ல மட்டும் போடாதே, அது ரொம்ப ரிஸ்க்" எனப் பல பேர் அவர்களுக்குத் தெரிந்த சில பேருக்கு உபதேசம் - நம் எதிரி தேசத்தை விடவும் அபாயகரமான தேசம் - செய்வதை என் காது கூடக் கேட்டிருக்கிறேன். பலமுறை கேட்ட இது போன்ற ஆபத்தான அறிவுரைகளின் விளைவே இந்தக் கட்டுரை.

"நான் இறக்கப்போகும் இடம் எது என்று முன் கூட்டியே தெரிந்தால், அந்த இடத்ததுக்குப் போவதைத் தவிர்த்து விடுவேன். எனக்கு மரணமே இருக்காது", என்று யாரோ சொன்னதாக நினைவு. புதிய மொழிகளைப் பயிலும் சமயங்களில் அவற்றிலுள்ள கெட்ட வார்த்தைகளை முதலில் அறிந்து வைத்துக்கொள்வது பலரது வாடிக்கை. அப்படித்தான் பங்கு வர்த்தகமும். அதிலுள்ள வசீகரமான அம்சங்களை கண்டு ஈர்க்கப்படும் முன், பின் வரக்கூடிய பிரச்சினைகளையும் தெரிந்து வைத்துக்கொள்வது விவேகம். அட அவ்வளவு ஏங்க... விலைமாதர் வீட்டுக்குச் செல்பவர்களுக்கு, அங்கே கிடைக்கும் சுகத்தை மாத்திரம் நினைத்து மதியிழக்காமல், ஆணுறை எடுத்துச் செல்லச் சொல்லி வலியுறுத்துகிறது சமூகம். மியூச்சுவல் ஃபண்டில் பணம் போடுபவர்களுக்கு மட்டும் அத்தகைய விழிப்புணர்வு கிடைக்கக்கூடாதென்பது சாபமா?

"என்ன மேன் நீ? நாமா இன்வெஸ்ட் பண்ணினாத்தான் வம்பு. திறமையான மியூச்சுவல் ஃபண்ட் மூலமா பண்ணா என்ன தப்பு? காரை நாம ஒட்டுறதுக்குப் பதிலா டிரைவர் வச்சு ஓட்ற மாதிரி தானே?" இது என்னுடன் வேலை செய்யும் ஒருவர் எங்கோ படித்து விட்டுச் செய்த வாதம். இந்த வாதத்திற்குப் பதிலளிக்கும் முன் நாம் சற்று அலச வேண்டியது கொஞ்சம் இருக்கிறது.

எதிர்பார்ப்புகளைச் சரியாகக் கையாண்டாலே ஏமாற்றங்களைத் தவிர்த்து விட முடியும். கடந்த இரண்டு மூன்று ஆண்டு காலத்தில் இந்தியப் பங்குகள் எட்டிய வளர்ச்சியை மட்டும் கணக்கில் கொண்டு வருடந்தோறும் 40 - 45% வளர்ச்சியை ஈட்டி விட முடியும் என்ற எண்ணத்தை உருவாக்கிக் கொள்வது ஆரோக்கியமானதல்ல.

சற்றே பின்னோக்கிப் பார்த்தால், பல பரஸ்பர நிதிகளின் நிகர சொத்து மதிப்பு (net asset value) 2001-02 சமயத்தில் ஓராண்டிலேயே 30% குறைந்ததுண்டு. முதலீட்டின் மதிப்பு 33% குறைந்தால், நீங்கள் போட்ட காசை எடுக்க மறுபடியும் 50% அதிகரிக்கும் வரை காத்திருக்க வேண்டியிருக்கும். ரூ.100 இல் மூன்றில் ஒரு பங்கு குறைந்தால் ரூ.66.66 ஆகி விடும். மீண்டும் அது ரூ.100 ஆக மாற, தற்போதைய 66.66 இல் பாதியை - அதாவது 33.33 - சம்பாதிக்க வேண்டியதாகிறது. அதே போல 50% நஷ்டத்தை சரி செய்ய அது இரு மடங்கா சம்பாதிக்க வேண்டும். 100 இல் பாதியை இழந்தால் அது 50 ஆகிவிடும். 50 மீண்டும் 100 ஆக அதை இரட்டிக்க வேண்டும்.

இந்த நாட்காட்டி வருடத்தில் - பொருளாதாரத்தில், நிதியாண்டு (financial year ஏப்ரல் முதல் மார்ச் வரை) மற்றும் நாட்காட்டி ஆண்டு (calender year - ஜனவரி முதல் டிசம்பர் வரை) இரண்டும் ஒன்றல்ல. யாராவது வெறுமனே ஒரு வருடத்தைக் குறிப்பிட்டால் குழப்பங்கள் நேரலாம். அதனாலாயே இவ்வாறு தெளிவாகச் சொல்லியாக வேண்டியிருக்கிறது - பல ஆயிரக்கணக்கான ரூபாய்கள் புதிய நிதித் திட்டங்களின் (new fund offers எனப் படும் NFO) வாயிலாகத் திரட்டப்பட்டு இருக்கன்றன. வரலாறு காணாத வசூலாகும் இந்தத் தொகை. இந்தியப் பங்குகளின் விலை பாதுகாப்பான எல்லையைத் தாண்டி விற்று வருவதாகப் பல நிபுணர்களிம் விவாதித்து வரும் சமயத்தில் இது நடந்திருகிகிறது என்பது தான் வேடிக்கையே.

சமீபதிதில் பரஸ்பர நிதிகள் ஈட்டித்தந்த வியத்தகு இலாபம் பலரையும் ஈர்த்திருக்கிறது. தேவாமிர்தம் போன்ற அரிய வாய்ப்பை நழுவ விடக்கூடாதென்று பலரும் புற்றீசலாய்ப் பறந்து வரும் FPO க்களில் பணத்தைக் கொட்டுவது வாடிக்கையாகி விட்டது. நிதி நிறுவனங்கள் இவ்வாறு வசூலிக்கப்படும் அளவுக்கதிகமான பணத்தை அதிக விலையாக இருந்தாலும் சரி என்று பங்குகளில் தான் போட்டாக வேண்டிய கட்டாயத்திற்குள்ளாகிறார்கள் (left with few choices - all of them being bad). எல்லா நிதிகளும் இப்படிப் போட்டி போட்டு வாங்குவதால் விலை மேலும் அதிகரிக்காமல் என்ன செய்யும்? மீண்டும் விலையேற்றம், மீண்டும் FPO என இடை விடாத சுழற்சி.

இன்னுமொன்று கூறுகிறேன் கேளுங்கள். சந்தையின் உச்சியில் திரட்டப்பட்ட பணம் முழுவதுமாக முதலீடு செய்யப்படாது. சில மாதங்களில் சந்தை எப்படியும் சரியும் என்ற எதிர்பார்ப்பில் நிதி நிர்வாகிகள் பணத்தின் கணிசமான பகுதியை அப்படியே வைத்திருப்பர். கம்மியான மறுபடியும் வாங்கிக்கலாம்ங்கற நெனப்புல. நினைப்பது வேறு நடப்பது வேறு என்று தான் பெரும்பாலும் முடியும். நெடு நாள் ஏற்ற இறக்கமின்றி சந்தை நிலவினாலோ அல்லது மேலும் அதிகரித்தாலோ முதலீடு செய்யப்படாமல் இருக்கும் தொகை எந்த பயனையும் தருவதில்லை. இதனால் கூட பரஸ்பர நிதிகளால் தனி நபர் முதலீட்டாளர் அளவுக்கு வளர்ச்சியை அடைய வைக்க முடியுமா என்பது சந்தேகமே.

பொருளாதார, அரசியல், பருவ மழை, தனிப்பட்ட நிறுவனங்களின் செயல்பாடு முதலிய காரணங்களால் சந்தை ஒரு கால கட்டத்தில் வீழ்ந்தே தீரும். இத்தகு வீழ்ச்சி சில நாட்களிலிருந்து பல வருடங்கள் வரை நீடிக்கலாம். தரமான நிறுவனங்களில் பங்குகள் வாங்கி வைக்கத் தோதான விலையில் கிடைக்கும் காலமும் இது தான். ஆனால் அது மறுபடியும் மீண்டு வர நீண்ட காலம் பிடிக்கலாம். சரிவை ஒரு எல்லை வரை தாங்கிக் கொண்ட மக்க்ள் நேரப்போக்கில் தங்கள் பணத்தைத் திரும்பப் பெற ஆரம்பிப்பர். இவர்கட்கு பணத்தைத் தர நிதி நிர்வாகி சில பங்குகளை விற்றாக வேண்டிய கட்டாயத்திற்கு உள்ளாவார். விற்கிற காரணத்தால் விலை மேலும் சரியும், மேலும் பலர் பணத்தைத் திரும்பப் பெற ஆரம்பிப்பர், மேலும் விற்றல், மேலும் சரிவு என இங்கும் ஒரு சுழற்சி. பகுத்தறிந்து நோக்கினால் அதிகமான பணத்தை முதலீடு செய்யும் நேரம் இது தான். மக்களின் மந்தை மனோபாவமும் (herd psychology) பல்லாயிரக்கணக்கான நபர்களால் உருவான பங்குச் சந்தையில் நம்மை விட விவரம் தெரிந்தவர்களை விட நமக்கு என்ன தெரிந்து விடப்போகிறது எனும் சிந்தனையும் தான் இவ்வாறான தவறுகளுக்கெல்லம் விதை.

விதை மட்டுமல்ல, தவறுகளுக்கான விடையும் நம்மிடம் நமக்குள்ளேயே தான் ஒளிந்திருக்கும். அதைக் கண்டறியுங்கள்.


"காரை நாம ஒட்டுறதுக்குப் பதிலா டிரைவர் வச்சு ஓட்ற மாதிரி தானே?" என்ற கேள்விக்கு இப்போது பதில் சொல்கிறேன். பரஸ்பர நிதி நிர்வாகியை ஓட்டுனர் எனக் கொள்வதில் தவறில்லை. ஆனால், எந்தச் சாலையில் பயணிக்க வேண்டும்? எங்கெ போக வேண்டும்? என்ன காரில் போக வேண்டும்? ராங் சைடில் ஓட்டுனர் போனால் பரவாயில்லையா? போன்ற விஷயங்களைத் தீர்மானிப்பது நீங்கள் தான். ஓட்டுனர் இல்லை. அவருக்கு சம்பளம் தான் குறி. நீங்கள் எக்கேடு கெட்டால் என்ன?

நிதி நிறுவனம் தான் நிர்வாகம் செய்யும் தொகையில் 2% அதற்கான ஊதியமாக எடுத்துக்கொள்வது இயல்பு. சுமார் பத்து பேரை மட்டும் கொண்டு பத்தாயிரம் கோடியை நிர்விகிக்கும் போது அவர்கள் எடுத்துக்கொள்ளும் தொகை இருநூறு கோடி. தான் கையாளும் தொகை தான் முதன்மைக் குறியாக இருக்குமே தவிர, பெற்றுத்தரும் இலாபமாக இருக்க முடியாது. ஆகவே காளன்களாய் புடைக்கும் புது நிதித் திட்டங்கள் ஆயிரமாயிரம் கோடிகளை அள்ளுவதில் வியப்பில்லை.

ஆட்சியாளர்கள் போலவே இவர்களது வருவாயும் - செயல்திறனுக்கேற்ப இல்லாமல் - நிலையானதாக இருக்க வைப்பதே இவர்கள் விருப்பம். தங்கள் திறமையின் மீது முழு நம்பிக்கை உடையவர்களாக நிதி நிர்வாகி இருப்பதாக வைத்துக் கொள்வோம். நிரந்தரமான சதவிகித ஊதியத்தை நிர்ப்பந்திக்காமல் செயல்திறனுக்கேற்ற ஊதியத் திட்டத்தை அறிமுகப்படுத்தலாமே!! நீங்கள் 20% இலாபம் பெற்றுத்தந்தால் 2% எடுத்துக் கொள்ளுங்கள். 40% இலாபமா? 4% அள்ளுங்கள். நிர்வகிக்கும் தொகை குறைந்தாலோ அல்லது அதே நிலையில் இருந்தாலோ உங்களுக்கு ஒன்றும் கிடையாது. தங்கள் திறமையில் முழு நம்பிக்கை உடைய நிர்வாகிகளும், நிறுவனங்களும் இதற்கு ஒப்புக்கொள்வதில் என்ன தயக்கம்? சுய நம்பிக்கையற்ற உங்களை நம்பிப் பணம் போடச்சொல்லி நடுத்தர வர்க்கத்தினர் தூண்டிலிடப்படுவது எனக்கு நியாயமாகப் படவில்லை.

நன்பர்களே!! அடுத்த முறை பரஸ்பர நிதி விற்பனைப் பிரதிநிதி புதிய திட்டத்தை விற்க முயன்றால் இரையாகி விடாதீர்கள்.

மியூச்சுவல் ஃபண்டின் வண்டவாளத்தை அறியப் பங்குத் தரகர்கள் அவர்களைப் பற்றி என்ன சொல்கிறார்கள் எனக் கேட்டுப் பாருங்கள். பங்குத் தரகர்களின் வண்டவாளத்தை அறிய?? அதற்கு இன்னொரு கட்டுரையல்ல, புத்தகமே எழுத வேண்டும்.

ஆக.. உங்கள் செயல்கட்கும் அவற்றினால் உண்டாகும் விளைவுகட்கும் நீங்கள் எடுக்கும் முடிவு தான் தளமாக அமைய வேண்டுமே தவிர பிறரது அறிவுரையோ தூண்டுதலோ அல்ல. யாரோ சொல்வதால் மட்டும் எதிலும் முதலீடு செய்ய வேண்டாம். யாரும் சொல்லவில்லை என்பதற்காக எதிலும் முதலீடு செய்யாமலும் இருக்க வேண்டாம்.

Tuesday, June 06, 2006

பங்குச் சந்தை சரிவுக்கான(??) காரணங்கள்!!

- குப்புசாமி செல்லமுத்து

கிரிக்கெட் மேட்ச் ஜெயிக்கும் போது ஆட்டக்காரர்கள் செய்யும் தவறுகள் அனைத்தும் மறக்கப்படுகின்றன. அதே சமயத்தில் அணி தோல்வியைத் தழுவும் போது, சிறப்பான ஆட்டம் கூட விமர்சிக்கப் படுகிறது. அதே போலத் தான் பங்குவிலையும்.. ஏறும் போது இறங்கும் போதும் அதற்குக் காரணம் கற்பிப்பதற்காத்தான் மிகப் பெரிய கூட்டம் கழுத்தில் 'டை'யைக் கட்டிக் கொண்டு சி.என்.பி.சி.யில் இரைச்சலைக் கிளப்புகிறது.

நிதியமைச்சர் ப.சிதம்பரம் தினசரிப் பங்கு விலைகளைக் கண்காணித்து அறிக்கை விடுவது பேரவலம். அவருக்கு இதனை விட முக்கியப் பொறுப்புகள் இருக்குமெனக் கருதுகிறேன். விலை உயரும் போது மார்தட்டும் சந்தைகள் (BSE & NSE), செபி, அரசு, அந்தந்த நிறுவனங்கள் எல்லாம், விலை சரியும் போது வேறு காரணங்களைத் தேடுகின்றனர். அதுவும் ஒரு அவலம்.

"இன்னிக்கு ரத்தம் பாக்காம விட மாட்டாங்க போல இருக்கே!!" இப்படித்தான் சிறிய, பெரிய அளவில் முதலீடு செய்திருக்கும் அனைவரும் தினந்தோறும் புலம்புவது. சமீபத்தில் இந்தியப் பங்குச்சந்தை கண்ட வரலாறு காணாத சரிவுக்கான சில காரணங்கள் ஊடகங்கள் வாயிலாகப் பரவியிருப்பதைப் பெரும்பாலானோர் அறிவர். இருப்பினும் இன்னொரு முறை அவற்றில் சிலதை ஆராய்வோம்.

"அமெரிக்காவில் வட்டி வீதம் 25% அடிப்படைப் புள்ளிகள் அதிகரித்தது. அதனால் உலக முதலீட்டாளர்கள் வளரும் நாடுகளில் செய்திருந்த முதலீட்டைத் திரும்பப் பெற்று, அமெரிக்க அரசின் கடன் பத்திரத்தில் இட்டு வைக்க விழைந்ததின் விளைவு தான் இந்தச் சரிவு." இந்தக் கூற்றில் உண்மை இருந்தாலும், 0.25% (100 அடிப்படைப் புள்ளி என்பது 1% ஆகும்) வட்டிவீதம் அதிகரித்தது தான் இதற்குக் காரணம் எனச் சொல்லிட இயலாது. அவர்கள் தொடர்ந்து 16 தடவை வட்டி வீதத்தை 0.25% உயர்த்தி வந்துள்ளனர். அதன் அடிப்படையில், இந்தியா முதலிய தேசங்களில் இருந்து பணம் படிப்படியாகத் தான் வெளியேறியிருக்கும்..பொருள்>> பங்குவிலை கொஞ்சம் கொஞ்சமாக பல மாத இடைவெளியில் இறங்கியிருக்குமேயொழிய, இப்போது நடந்தது போல அல்ல.

கடந்த மூன்று வருடங்களைப் பின்னோக்கிப் பார்த்தால் சென்செக்ஸ் 81.9%, 40.5% மற்றும் 55.7% என்ற அளவில் வளர்ந்துள்ளதை அறியலாம். மூன்றாண்டு முதலீடு 377%மும், இரண்டாண்டு முதலீடு 197%மும், ஓராண்டு முதலீடு 81.9%மும் வளர்ந்துள்ளது. இவ்வளவு உயர்ந்த ஒரு சரக்கு 20% சறுக்கியது பெரிய சரிவாகத் தெரியவில்லை. சென்செக்ஸில் அங்கம் வகிக்கும் 30 நிறுவனங்களின் ஒட்டு மொத்த வளர்ச்சி கடந்த ஒரு ஆண்டில் 25% த்தை விடச் சற்றே குறைவு. அதன் அடிப்படையில் சென்செக்ஸ் நியாயமாக அடைந்திருக்க வேண்டிய ஏற்றமும் அதே அளவில் இருந்திருக்க வேண்டியது அவசியமாகிறது. 80% ஐ விட அதிகமாக விலை உயர்ந்ததால், குறைந்த விலைக்கு வாங்கியவர்கள் லாபத்தை அள்ளுவது எதிர்பார்க்கக்கூடியது தான். அப்படி அவர்கள் ஒட்டு மொத்தமாக விற்றது தான் சரிவு..

இடது சாரிகள், அரசின் தாராளமயமாக்கல் முடிவுகளில் அதிக நாட்டாமைத்தனத் தாக்கத்தை உண்டு செய்வதான இன்னொரு கருத்து. அட, அது ஒரு வாரத்தில் மட்டும் தெரிந்த திடீர் ரகசியமா என்ன? ஊரறிந்த ஒரு உண்மையல்லவா அது? இடது சாரிகள் அங்கம் வகிக்கும் ஒரு அரசு முதலாளித்துவத்தைப் பெருகச் செய்வதில் உள்ள சிக்கல்கள் அறியப்பட்டது தானே? அப்படியானால், விலை இந்த அளவிற்கு ஏறியே இருக்கக் கூடாதே!!!

முதல் நாள் 400 புள்ளிகள் தொலைந்து போன போது, "manufactured crisis" என மத்திய நேரடி வரி வாரியத்தின் சுற்றறிக்கை குறித்துக் கருத்துச் சொல்லி, அதேல்லாம் வதந்தி எனத் தெளிவுபடுத்தினார் மாண்பு மிகு நிதியமைச்சர் ப.சிதம்பரம். அப்படிப்பட்ட manufactured crisis தான் சரிவுக்குக் காரணம் என வைத்துக் கொண்டால், அவரது தெளிவாக்கத்திற்குப் பின் சந்தை மேலேறி வந்திருக்க வேண்டுமே?

சென்ற ஒரு வருடத்தில் நிகழ்ந்த கிடுகிடு வளர்ச்சிக்கு அந்நிய முதலீட்டு நிறுவனங்களை மட்டும் குற்றம் சாட்ட முடியாது. ஆயிரக்கணக்கான கோடிகளை புது நிதி வெளியீடுகள் (NFO) மூலமாகத் திரட்டிய பரஸ்பர நிதி நிறுவனங்கள், அநியாய விலைக்குப் பங்குகளை IPO மூலம் வெளியிட்ட பேராசை முதலாளுகள், சீக்கிரம் பணம் சம்பாதிக்கும் ஆசையில் உள்ளே நுழைந்த சிறு முதலீட்டாளர்கள், அவர்தம் அறியாமையைப் பயன்படுத்தி இரத்தம் உறிஞ்சிய தரகர்கள், ஆலோசகர்கள், பரஸ்பர நிதி விற்பனையாளர்கள், விலைகளைச் செயற்கையாக ஏற்றிப் பிடிக்கும் சில விஷம அங்கத்தினர் என அனைவரும் இதற்குப் பொறுப்பு.

பிறரது ஆலோசனையின் பேரிலோ அல்லது சுய முடிவின் அடிப்படையிலோ நாம் முதலீடுகளைச் செய்து விட்டு அரசாங்கம் விலையச் சரியாமல் பாதுகாக்க வேண்டும் என எதிர்பார்ப்பது அறிவீனம் மட்டுமில்லாது பேராசையும் கூட. Warren buffett once said, "Stock market is somewhat like a god. He rewards when you do good things. But, unlike real god he does not forgive on mistakes; rather punishes hard".

போனது போகட்டும்.. பிரேதப் பரிசோதனை மாதிரி பிணத்தை திரும்பத் திரும்ப அறுத்து அசிங்கப் பட வேண்டாம். தவறுகள் சொல்லித் தரும் பாடம் விலை மதிப்பற்றது. சமீபத்தில் செய்த சில தவறுகளை மறுபடியும் செய்யாமல் பார்த்துக் கொள்வோமாக.

நீண்ட கால அடிப்படையில் வளமான எதிர்காலம் கொண்ட ஒரு நிறுவனத்தில் நீங்கள் முதலீடு செய்திருந்தால் கவலைப்படத் தேவையில்லை. பத்து வருடத்தில் நான்கு மடங்காக அது ஏறுமென்றால், தற்காலிக 20% சரிவு குறித்து அதிகமாகக் கவலையுறவேண்டிய அவசியம் இல்லை. ஒரு வருடத்திற்கு விலை உயராவிட்டாலும் (அல்லது சரிந்து கொண்டே இருந்தாலும்), நீங்கள் வாங்கியிருக்கும் கம்பெனி சிறந்த முறையில் தொழில் செய்து, அதனைப் பெருக்கி வருமானால், உங்களுக்கென்ன கவலை?

பங்கு வாங்கி அடுத்த வாரத்திற்குள் விற்று பணம் சம்பாதிக்கும் ஆசையில் சில இலட்சங்களைக் கடன் வாங்கியிருந்தால் தான் சிக்கல்.

இது போன்ற தருணங்களில் கவனமாக இருக்க வேண்டிய சில தெளிவான குறிப்புகளை இன்னொரு பதிவில் விவாதிக்கலாம்.வளம் பெறுவோம்.

Thursday, June 01, 2006

NAV மேட்டரும் சாப்ட்வேர் ஆசாமியும்!!

-குப்புசாமி செல்லமுத்து

"டேய், எவனப் பாத்தாலும் நாவ் நாவ் னு சொல்லிட்டுத் திரியறானுகளே, என்ன எழவுடா அது" கணியப்பன் (கணிணியப்பனின் சுருக்கம்) கேள்வி.

"நாவ் இல்லடா அது. NAVனு சொல்லனும். என்.ஏ.வி. ஒரு வாட்டிச் சொல்லு பாக்கலாம்" காசப்பன் பதில்.

"அடங்குடா டே. நீ SAP ஐ சாப் சாப் னு சொல்லிக் கொலை பண்றியே. நான் கண்டுக்கிட்டனா?"

"சரீ சரீ...ரிலாக்ஸ். உனக்கு இப்போ NAV மேட்டர் தெரியனும் அவ்ளோ தானே? அடிப்படையில இருந்து உனக்கு விளக்கணும்டா"

"ம்..ம்"

கதை சொல்ல ஆரம்பிக்கிறார் நம்ம காசப்பன்.

"உங்க சாப்ட்வேர் கம்பெனியில பத்து பேர் இருக்கீங்கன்னு வச்சுக்கோ. உன்னை மாதிரியே அவங்களுக்கும் ஷேர்ல இன்வெஸ்ட் பண்ண ஆசை"

"எங்கூட இருக்குற எவன்டா ஷேர்ல இன்வெஸ்ட் பண்றான்? அவனவன் ECRல (பைக் பின் சீட்டுல பொண்ணுங்கள வச்சு) சுத்தறதுக்கே டைம் போதலைன்னு பொலம்புறானுக"

"உன் ஆதங்கம் எனக்குப் புரியுதுடா. அதப் பத்தி அப்புறம் பேசிக்கலாம். நான் சொல்றதை இப்போ ஒழுங்கா கேக்கறியா இல்லியா?"

"ம்"

"உங்களுக்கு டைம் இல்லததாலையும், ஷேர் பத்தி விவரம் தெரியாததாலையும் வேற யார் கிட்டயேவது பணத்தக் குடுத்து மேனேஜ் பண்ணலாம்னு ஐடியா பண்றீங்க. ஆளுக்கு 10,000 ரூபா போட்டதால் ஒரு லட்சம் ஆகுது மொத்த அமவுண்ட். என்னோட திறமை மேல நம்பிக்கை வச்சு அந்தப் பணத்தை இன்வெஸ்ட் பண்ணச் சொல்லி என் கிட்ட hand over பண்றீங்க."

"மாப்ள, அங்க சுத்தி இங்க சுத்தி மேட்டருக்கு வந்துட்ட பாத்தியா?"

"சும்மா ஒரு பேச்சுக்குத்தான்டா. அந்தப் பணத்த நான் சின்ன சின்ன யூனிட்டா பிரிச்சு வச்சுக்கறேன். அதாவது 10,000 யூனிட்டா டிவைட் பண்ணின பின்னாடித் தான் முதலீடு பண்ணவே ஆரம்பிப்பேன். ஒரு லட்சத்தை 10,000 யூனிட்டா பிரிச்சா ஒவ்வொரு யூனிட்டோட மதிப்பு என்ன?"

"ம்.. பத்து ரூபா"

"கரெக்ட். அது தான் NAV. Net Asset Value. அதாவது ஒரு யூனிட்டோட நிகர சொத்து மதிப்பு. ஒரு மியூச்சுவல் ஃபண்ட் முதன் முதலா ஆரம்பிக்கும் போது NAV ரூ.10 தான் இருக்கும். அந்தப் பணத்தை அப்படியே நான் ஷேர்ல முதலீடு பண்றேன். ஷேர் விலை ஏற ஏற நம்ம முதலீட்டு மதிப்பும் ஏறும். ஒரு வாரத்துல நம்ம முதலீடு 1,10,000 ஆகுதுன்னு வச்சுக்கோ. அப்போ NAV என்ன?"

"1,10,000/10000 எவ்வளவு? 11 ரூபா. டேய்... அப்போ இன்வெஸ்ட் பண்ணிய பிறகு விலை குறைஞ்சா NAV கம்மி ஆகுமா?"

"ஒரு லட்சம் போட்டது 95 ஆயிரம் ஆனா, NAV ரூ.9.50 ஆகும்ல. சாப்ட்வேர் என்ஜினியர் மாதிரியாடா கேக்குறே நீ?"

"நாங்கல்லாம் எப்படா காசோட மதிப்ப பாத்திருக்கோம்? சரி.. நீ சொல்றதப் பாத்தா மியூச்சுவல் ஃபண்ட் ரொம்ப சேஃப் அப்படீன்னெல்லாம் சொல்லிக்க முடியாது போல இருக்கு"

"உண்மை தான். ஆனா நீயே முதலீடு செய்யறதுக்குப் பதிலா, ஒரு திறமையான ஆள் - என்னை மாதிரி - கிட்ட குடுத்து முதலீடு செய்யறீங்கல்ல.. அதனால முட்டாள் தனமான முடிவு எடுத்து கண்ட கழுதைக் கம்பெனி ஷேர் வாங்கறத அவாய்ட் பண்ணிறலாம்"

"மாப்ள.. நீ ரொம்ப நல்லவன்டா!!!" கைப்புள்ள ஸ்டைலில் ·பீல் பண்ணினான் கணியப்பன்.

"ஹாஹாஹா.. அதுக்குத் தான் அந்த ஒரு லட்சத்துல 2 ஆயிரம் நான் எடுத்துக்கப் போறனே. Fund Management Fees மச்சி fees"

$%^$^(&^()*()*^
"என்னை விடுடா நான் போறேன்.." கணி எஸ்கேப்.

"டேய் டேய்..எங்கடா போறே. சொல்லிட்டுப் போ..."

"ம்ம்ம்.. என் பைக்கை விக்கப் போறேன். பின்னாடி சீட் காலியாவே வச்சு வண்டி ஓட்டறதுக்கு எதுக்குடா பைக்"

சாப்ட்வேர் ஆசாமி எப்படியோ mutual fund மேனேஜரான காசப்பனிடம் இருந்து தப்பிவிட்டான். அட.. இவன் போனா என்ன. அதான் கழுத்துல ID கார்டு தொங்கப் போட்டுக்கிட்டு நிறையப் பேர் அலையறானுகளே!!!!

Saturday, May 27, 2006

நிறுவனத்தின் உண்மையான (பங்கு) மதிப்பு

-குப்புசாமி செல்லமுத்து


பொருளாதாரத் துறையில் அடியெடுத்து வைக்கும் ஒவ்வொருவரும் அறிந்து கொள்ள வேண்டிய முதல் பாடம் பணத்தின் உண்மையான மதிப்பை அறிந்து கொள்வது தான். காலம் பொன் போன்றது; அதன் மதிப்பை அறியாமல் கால விரயம் செய்பவர்கள் சமுதாயப் பிணி. பணமும், காலமும் தராசில் நிறுக்கப் பட்டால் இரண்டும் ஒரு நிறை, ஒரு எடை.


பங்குகள் வாங்கும் போது விலையைத் தான் பார்க்கிறோமே தவிர, வாங்குகின்ற தொழிலின் மதிப்பைப் பார்ப்பதேயில்லை. 'அதெல்லாம் எப்படிப் பாக்கறது?' கேள்வி எழலாம். உலகளாவிய நியதி ஒன்று சொல்கிறேன். ஒரு நிறுவனத்தின் பங்கு விலை, அது இன்று முதல் உலகம் (அல்லது அந்த நிறுவனம்) அழியும் வரை ஈட்டித் தரும் லாபத்தின் தற்போதைய மதிப்பின் கூட்டுத் தொகைக்குச் சமம். முதல் முறை வாசிக்கும் போது புரிவதற்குச் சற்று கடினமாக இருக்கலாம். மேற்கொண்டு படித்துவிட்டு, பதிவின் இறுதியில் இன்னோர் தடவை திருப்பி வாசித்தால் புரிவது உறுதி.


அதற்கு முன் தற்போதைய மதிப்பைப் பற்றிய ஒரு சிறு பார்வை.இன்றைய நூறு ரூபாய் நாளைய நூறு ரூபாயை விடப் பெரிது. சுமார் 5% பணவீக்கத்தைக் கணக்கில் எடுத்துப் பார்த்தால், அடுத்த வருடம் கிடைக்கும் ரூ100, இன்றைய ரூ95 க்குச் சமம். இது தான் வருங்காலப் பணத்தின் தற்போதைய மதிப்பு (present value of future cash). ஐந்து ஆண்டுகளுக்குத் தொடர்ந்து ரூ100 சம்பாதிக்கிறோம் எனில், அந்த சம்பாத்தியத்தின் தற்போதைய மொத்த மதிப்பு ரூ429.82.




"நூறு ரூவா குடு. 5 வருசத்துல அதத் திருப்பித்தரேன்" என யாராவது கேட்டா, "சாரி. 77 ரூவா முப்பத்தெட்டுக் காசுக்கு மேல குடுக்க முடியாது"ன்னு சொல்லிருங்க.


சரி, தற்போதைய மதிப்பு (PV - Present value) பற்றிப் பார்த்தோம். ஒரு தொழிலில் முதலீடு செய்யும் போது எங்கனம் இதை பயன்படுத்துவது என ஒரு எளிய உதாரணம் கொண்டு ஆராயலாம்.


திரு.காசப்பன் கார் ஒன்றை, ஓட்டுனர் வைத்து வாடகைக்கு விட்டுச் சம்பாதித்து வருகிறார். ரொம்பப் பழைய காராகையால் இன்னும் மூன்று வருடம் தான் ஓடும். அதற்கு மேல் அதைப் பேரிச்சம் பழத்துக்குத் தான் போடவேண்டும். சும்மா ஜோக்குக்காகச் சொன்னாலும், மூன்று வருடத்தில் விற்றால் ஒன்றரை இலட்சம் கிடைக்கும். அதற்கு மேல் வண்டி ஓடாது என வைத்துக் கொள்வோம். சீசனுக்குத் தகுந்த மாதிரி வருடா வருடம் டிரைவர் சம்பளம், போலீஸ் மாமூல், அரசுக்கான வரி இவையெல்லாம் போக கிடைக்கும் இலாபத்தையும் கீழே கொடுத்துள்ளோம். நம் கணக்கில் பணவீக்க வீதம் 5% என்பதாகக் கொள்வோம்.


முதலாம் ஆண்டு முடிவில்:
கார் வாடகையில் கிடைத்த இலாபம் = ரூ60,000
அதன் தற்போதைய மதிப்பு = ரூ57,000

இரண்டாமாண்டு முடிவில்:
கார் வாடகையில் கிடைத்த இலாபம் = ரூ50,000
அதன் தற்போதைய மதிப்பு = ரூ45,125


மூன்றாமாண்டு முடிவில்:
கார் வாடகையில் கிடைத்த இலாபம் = ரூ60,000
கார் விற்ற காசு = ரூ1,50,000
மொத்தப் பணம் = ரூ2,10,000
அதன் தற்போதைய மதிப்பு = ரூ1,80.048.80

மூன்று வருடத்திலும் கிடைக்கும் மொத்தப் பணத்தின் நிகர மதிப்பு = 57,000 + 45,125 + 1,80.048.80 = ரூ2,82,173.8


இதிலிருந்து நமக்குத் தெரிவது என்னவென்றால், காசப்பனிடம் இருந்து கார் பிசினஸை நீங்கள் வாங்கினால், இரண்டு இலட்சத்து என்பதாயிரத்துக்கு மேல் கொடுப்பது புத்திசாலித்தனமல்ல. அதே ஒரு நிறுவனமாக இருந்து அதில் 1000 பங்குகள் இருந்தால், பங்கு ஒன்றுக்கு 282 ரூபாய் தான் அதிகபட்ச விலை. சந்தையில் 400 ரூபாய்க்கு அவை விற்பனையானால், நீங்கள் வாங்க வேண்டிய கட்டாயம் இல்லை.


இப்பதிவின் ஆரம்பத்தின் சொன்ன உலக நியதியை மீண்டுமொரு முறை வாசிக்கலாமா? "ஒரு நிறுவனத்தின் பங்கு விலை, அது இன்று முதல் உலகம் (அல்லது அந்த நிறுவனம்) அழியும் வரை ஈட்டித் தரும் லாபத்தின் தற்போதைய மதிப்பின் கூட்டுத் தொகைக்குச் சமம்."


தற்போதைய பணமதிப்புத் தத்துவம் வாழ்வின் எல்லா இடங்களிலும் கையாளப்படலாம். பங்கு முதலீடு, கடன் கொடுத்தல், ஆராய்ச்சியில் அதிகப் படியான பணத்தை விரயமாக்குதல், கடன் வாங்கிப் மேல் படிப்புப் படித்தல், வங்கி வைப்பீட்டுத் திட்டத்தில் பணம் போடுதல் என எல்லாவற்றிலும்.. அட அவ்வளவு ஏங்க, மாமனார் வரதட்சினை இந்த வருசத்துக்குப் பதிலா அடுத்த வருசம் தருவதாச் சொன்னாக் கூட ஏமாந்துராதீங்க.


வளம் பெறுவோம்.


பி.கு:

1. பணவீக்கம் 5% என்பது கணக்கிட எளிதான ஒரு கற்பனை. நிஜ வாழ்வில் இதை விடக் குறைவாகவோ, அதிகமாகவோ அது இருக்கலாம்.

2. காசப்பன் கார் தொழிலில் (3 வருடமும்) கிடைக்கும் வருவாய் எளிதாக முன் கூட்டியே நிர்ணயம் செய்தோம். நடைமுறையில் அது சாத்தியமல்ல. ஒரு தொழில் சிறக்குமா சிறக்காதா, எவ்வளவு வருவாய் ஈட்டித் தரும் என்பதெல்லாம் அறுதியிட்டுக் கூற முடியாத விஷயங்கள். பங்குச் சந்தையில் விற்று, வாங்கும் எவரும் தத்தமது எதிர்பார்ப்புகளின் அடிப்படையிலேயே விலையை நிர்ணயிப்பார்கள் (இதுவும் ஒரு கற்பனையா??)

3. சுலபமாக கணக்குப் போட ஏதுவாக, கார் வாடகைக்கு விடும் தொழிலின் ஆயுட்காலம் 3 ஆண்டுகள் எனக் கொண்டோம். மூன்று வருடத்தில் மண்டையைப் போடும் நிறுவனங்கள் அதிகமாக இருப்பதில்லை என்பது ஆறுதல்

4. வரதட்சனை குறித்தான வரிகள் நகைச்சுவைக்காக மட்டுமே.

Thursday, May 25, 2006

டெக்கான் ஏர்லைன்ஸ் IPO

-குப்புசாமி செல்லமுத்து

படிக்க நேர்ந்த ஒரு செய்தியைப் பகிரவே இந்தப் பதிவு.

மலிவு விலை வானூர்திச் சேவை நிறுவனமான டெக்கான் ஏர்லைன்ஸ், முதல் பொது வெளியீடு (IPO - Initial Public Offer) விடுவதைச் சிலர் அறிந்திருக்கக் கூடும். ஆரம்பத்தில் மே 18 முதல் 23 வரை அதன் கால அளவாக நிர்ணயிக்கப்பட்டு இருந்தது. விலை எல்லை (price band) ரூ150-175 ஆக இருந்தது.

கடந்த ஒரு வாரமாகப் பங்குச்சந்தையில் நிலவும் பீதி காரணமாக சொற்ப எண்ணிக்கையிலேயே டெக்கான் நிறுவனத்திற்கு விண்ணப்பங்கள் வந்தன. எப்படியாவது விற்பனையை முடித்துவிட்டால் போதுமென்கிற போக்கில் வெளியீட்டின் இறுதித் தேதியை மே 26 வரை நீடித்திருக்கிறார்கள். அதே போல விலைப் பட்டையும் ரூ146-175 ஆகத் தளர்த்தப் பட்டுள்ளது. ஆன போதும் இவ்வெளியீடு முழுமையாக விற்றுத் தீருமா எனத் தெரியவில்லை. விண்ணப்பங்கள் சீண்டிவாரின்றிக் கிடப்பதைச் செய்தியில் காணுங்கள்.

சில துணைச் செய்திகள்:
  1. என்ன தான் மலிவு விலையில் விமானச் சேவை செய்தாலும், நிறுவனம் மிகுந்த கடனில் இருக்கிறது.
  2. விஜய் மல்லையாவின் கிங்ஃபிஷர் ஏர்லைன்ஸ் கடும் போட்டியை உருவாக்குகிறது.
  3. தற்போது இந்தியப் பங்குச் சந்தையில் விற்பனையாகும் ஒரே நிறுவனமான ஜெட் ஏர்லைன்ஸ் ஒன்றரை ஆண்டுகளுக்கு முன் 1,100 ரூபாய் IPO வில் வெளிவந்தது. நேற்றைய (மே-24) நிலவரப்படி அதன் விலை ரூ.750.
  4. தொலைபேசி நிறுவனங்கள் போலவே விமானச் சேவை நிறுவனங்களும் கடும் போட்டியைச் சமாளிக்க வேண்டி இருப்பதால், இலாபத்தின் பெரும் பகுதியை வாடிக்கையாளர்களுக்கே தர வேண்டியிருக்கிறது. பிசினஸ் வளர்ந்தாலும், பங்குதாரருக்குக் கிட்டும் இலாபம் கிடுகிடுவென உயரும் என்றெல்லாம் சொல்லிவிட முடியாது.
பி.கு: இது எனது தனிப்பட்ட பார்வை தானே ஒழிய, பிறரது கருத்தை மாற்றுவது இந்தப் பதிவின் நோக்கமல்ல. சுய ஆய்வின் அடிப்படையில் முடிவுகள் எடுக்கப்பட வேண்டும் என்பதே எமது அவா.

Monday, May 22, 2006

SENSEX 10,000 மேலும் கீழும்-வாங்கலாமா?

குப்புசாமி செல்லமுத்து

21 மே 2006 அன்று Business Line பொருளாதாரத் தினசரியில் வந்த ஒரு கேலிச்சித்திரம் என்னை வெகுவாகக் கவர்ந்தது. உடைந்ததில் கட்டு போடப்பட்ட கை கழுத்தில் தொட்டிலாடிய படி வரும் முதலீட்டு அறிவுரையாளர் (investment advisor) ஒருவர் தன் உதவியாளரைப் பார்த்துச் சொல்வதாக அமைந்திருந்தது அது.

"ஆமாய்யா.. சென்செக்ஸ் முதன் முதலா 10,000 போனப்ப ஸ்வீட் குடுத்தானே அதே ஆளு தான். இப்போ இப்படிப் பண்ணிட்டான்"

அருமையான மெசேஜ் சொல்கிறது இந்தக் கார்ட்டூன். சந்தை 9,000 புள்ளியில் இருந்து 10,000 புள்ளியைத் தொட்ட போது குதூகலித்தவர்கள் இப்போது அதே 10,000 இல் புலம்புவது ஏன்? அப்போதைக்கும் இப்போதைக்கும் மூன்று மாத இடைவெளி தான். இதில் பெரிதாக வருத்தப்பட ஒன்றுமே இல்லை.

"கம்மியா வாங்கினவங்களுக்கு வேணா இந்தத் தத்துவம் எல்லாம் சொல்லிக்க. எங்களை மாதிரி 12,000 க்கு மேல sensex இருக்கும் போது வாங்கினவங்க வலி உனக்கெல்லாம் எங்கே தெரியப்போகுது" என அங்கலாய்க்கலாம் சிலர். அடிப்படையை அலசிப் பார்த்தால் ஒரு பெரிய பிரச்சினையாக இதைச் சொல்லவே முடியாது.

பத்து இலட்சம் ரூபாய்க்கு ஒரு வீடு வாங்குகிறீர்கள். அதன் மதிப்பை நிர்ணயம் செய்யும் போது, குடிநீர் வசதி, சாலை வசதி, நகருக்கு அருகாமை, பாதுகாப்பு போன்ற பல அம்சங்களையும் ஆராய்வீர்கள். உங்களது வரையறையின் படி அதன் மதிப்பு கொடுக்கும் காசுக்குத் தகுந்தது தான் என் உறுதிப்படுத்துய பின்னர் தான் முதலீடு நிகழும். அதே போன்றதொரு பக்கத்து வீட்டின் உரிமையாளர் அதை 9 இலட்சத்திற்கு வேறு யாருக்கோ விற்கிறார். அதனால் உங்களுக்கு என்ன வந்தது? இன்னுமொரு வீடு அதே 9 இலட்சம் விலைக்கு உங்களுக்குத் தேவைப்பட்டால் கொடுக்கவும் தயாராக உள்ளார் அந்த நபர். இது மகிழ்ச்சியளிக்கும் செய்தி தானே? 10 இலட்சம் மதிப்புள்ள வீடு 9 இலட்சத்திற்குக் கிடைக்கிறதே!!

வேறு எவரோ தன் பங்குகளைக் குறைந்த விலைக்கு விற்பது இதே போலத் தான். ரூ.100 உள்ளடக்க மதிப்புள்ள நிறுவனத்தின் பங்கை நீங்கள் வாங்கிய முடிவின் தெளிவு, பிறர் அதனை வேறேதோ விலைக்குப் பரிமாறும் போது மாறாதல்லவா? பிறகென்ன? உண்மையைச் சொல்லப் போனால் பங்குச் சந்தைச் சரிவுகள் மேளதாளத்துடன் வரவேற்கப்பட வேண்டும். 100 மதிப்புள்ள சொத்து (பங்குகள் நிறுவனத்தின் ஒரு சிறிய பகுதியின் உரிமையை நிலை நாட்டும் உரிமை அல்லது சொத்துப் பத்திரம்) 80 க்கோ 75 க்கோ கிடைக்கும் போது சந்தோசப் படாமல் சும்மா ·பீல் பண்ணிக்கிட்டு... ஒரு வேளை தற்சமயம் வாங்குகிறவர்கள் உங்களை விட குறைந்த பணத்தில் அதே அளவுள்ள சொத்தை வாங்க வசதி ஏற்படுகிறது. கொஞ்சம் வேதனையாகத் தான் இருக்கும். இந்த நிலவரம் எல்லாம் தெரியாமலே இருந்திருந்தால் பிரச்சினை இருந்திருக்காதல்லவா? அப்படி நினைத்துக் கொள்ள வேண்டியது தானே?

"நான் எங்கய்யா வாங்கினேன்? எல்லாம் கூட வேல செய்றவன், ஷேர் மார்க்கெட் புரோக்கர் இந்த மாதிரி ஆளுங்க சொல்லி வாங்கினது தான்" எனச் சொல்கிற ஆளாக நீங்கள் இருந்தால் 'சாரி'. புரோக்கர் சொல்வதால் மட்டுமே கல்யாணம் செய்யாதவர்கள், வீடு வாங்காதவர்கள், பங்கு மட்டும் வாங்குவது ஏன்? ஆறாம் அறிவு படைத்த நாம் இவ்வாறு செய்யத் தேவையில்லையல்லவா?

பங்குச் சரிவுகளை நான் எப்படிப் பார்க்கிறேன் என்றால்.. ஏற்கனவே ஒரு பதிவில் எழுதிய 'தள்ளுபடி விற்பனை' போலத்தான். "அதெல்லாம் சரி, ஆனால் இப்போது பார்த்து கையில் காசு இல்லை" என்று வருந்தினால் சுய நிதி நிர்வாகத்தை மேம்படுத்திக் கொள்ள ஒரு சந்தர்ப்பமாக இதைப் பயன் படுத்திக் கொள்ளலாம்.

மன உளைச்சலும், நிறையப் பணமும் சம்பந்தப்பட்ட அம்சம் என்பதால் பங்குச் சந்தைச் சரிவுகள் தூக்கமற்ற இரவுகளைத் தரவல்லவை. சற்றுக் கடினமாகத்தான் இருக்கும். என்னென்ன தவறு செய்தோம், அதை எப்பவித் தவிர்த்திருக்கலாம் எனக் காலப் போக்கில் பின்னோக்கிப் பார்த்து அவற்றில் இருந்து கற்றுக் கொள்வது அவசியமாகிறது. இவ்வாறு கற்கும் பாடத்தின் பயன்பாடு அதே தவறை மீண்டுமொரு தடவை செய்ய நேரும் போது கிடைக்கும் விழிப்புணர்வில் தான் தெரியும்.

20% வரை(யாவது) குறைகின்ற தனது முதலீட்டைத் தாங்கிக் கொள்கிற மனபலம் அற்றவர்கள் நேரடியாகவும், மியூச்சுவல் ·பண்ட் மூலம் மறைமுகவாகவும் பங்குகளில் முதலீடு செய்வது உகந்ததல்ல. அஞ்சலகச் சேமிப்புத் திட்டம், வைப்பு நிதித்திட்டம் என குறைவாக வருவாய் வந்தாலும் முதலீட்டின் மதிப்பு சரியாத ஆவணங்கள் தான் உங்களுக்கு அகந்தவை.

"sensex 13,000 இல்லாட்டி 15,000 போன உடனே வித்துட்டு காசு பாக்கலாம்னு தான் போன வாரம் வாங்கினேன்" என்று சில பேர் சொன்னார்கள். இவர்கள் முதலீட்டாளர்கள் அல்ல. ஒரு குறிப்பிட்ட தொலிழில் பங்கெடுத்து அதில் வரும் நல்லது கெட்டதைப் பகிர்ந்து கொள்ளும் நோக்கமில்லாமல், பிறர் இதை விட அதிகமாக வாங்கினால் போதுமென்ற மனதுடன் நடந்து கொள்பவர்கள் இவர்கள். சூதாடிகள்/வியாபரிகள்/வர்த்தகர்கள் (speculators/traders) தானே ஒழிய இவர்களில் யாருமே முதலீட்டாளர்கள் இல்லை. Short term investor எனும் சொல்லே தவறானது. Any one who has a short term vision is only a speculator and not an investor. மூன்று மாதம் முதலீடு செய்யும் ஆசையில் வருபவனின் அறியாமையப் பயன்படுத்திக் கொள்ளவே மியூச்சுவல் ·பண்ட் ஏஜென்டுகளும், பங்குத் தரகர்களும் இருக்கிறார்கள்.

"சூப்பர்.. இப்ப நல்லா கம்மி ஆகிருக்கு. ஒரு இலட்சம் கடன் பெற்று ஷேர் வாங்கிட்டு அடுத்த வாரம் ஏறும் போது வித்துடலாம்னு இருக்கேன்" சில பேர் இது போல இருக்கிறார்கள். உங்கள் அதிர்ஷ்டம் நன்றாக இருந்தால் ராசிக்காரர் தான் நீங்கள். இருப்பினும் இதுவும் மோசமான அணுகுமுறை. முதலீட்டாளர் முகமூடியிட்டுச் சூதாடுகிறீர்கள்.

அப்ப என்ன தான் பண்ணலாம்னு ஐடியா? ஆர அமர யோசித்த பின்னர், முதலீடு செய்ய ஒதுக்க முடிந்த பகுதியை (மட்டும்) வீழ்ந்திருக்கும் தரமான நிறுவனங்களின் பங்குகளை நீண்ட கால அடிப்படையில் வாங்கலாம். சரவணா ஸ்டோர்ல தள்ளுபடி சேல்ஸ் போட்டால் மட்டும் முந்தியடிக்கும் நாம் Dalal street இல் கிடைக்கும் தள்ளுபடியையும் பயன்படுத்திக் கொள்ளலாம். அனைத்து பொருட்களையும் குறைந்த விலைக்கு வாங்கும் நாம் பங்குகள் குறையும் போது அச்சப் படுகிறோம்; அதிகமாகும் போது வாங்க ஆசைப்படுகிறொம். இத்தனை வல்லுனர்கள் நிறைந்த பங்குக் கட்டமைப்பில் குறியீடு சரிகிறதென்றால் அதற்குக் காரணம் இருக்கும்; நாம் ஒதுங்கியிருப்பதே நலம் என்பன போன்ற எண்ணங்களைத் தூக்கிக் கூடையில் போட்டு விடலாம்.

I wish you a very happy shopping in NSE & BSE. தள்ளுபடி என்பதால் மட்டும் கிடப்பதை எல்லாம் வாங்கிவிடாதீர்கள். தேவையான, காசுக்குத் தகுந்த மதிப்புள்ள பங்குகளை மட்டும் வாங்குங்கள். 'திருவாளர்.சந்தை' மிகுந்த மனக் கவலையில் இருக்கிறார். அது தானே நாம் கேட்பது?

வளம் பெறுவோம்!!

பி.கு: பங்குச் சந்தைக் குறியீட்டு எண் சரியும் போது சோகமடையத் தேவையில்லை என்பதை விவரிப்பதே இதன் நோக்கம். மற்றபடி இதற்குக் கீழ் குறையாது அல்லது மேலே நிச்சயமாக ஏறும் என்பன போன்ற பரிந்துரைகள் இங்கே செய்யப்படவில்லை. கிடைக்கும் வாய்ப்புகளை தத்தம் தேவைக்கு ஏற்றவாறு பயன்படுத்திக் கொள்வோமாக!!

Sunday, May 21, 2006

ராகுல் திராவிட் - பங்கு முதலீட்டுத் தத்துவம்


குப்புசாமி செல்லமுத்து

இந்திய கிரிக்கெட் அணியின் கேப்டன் ராகுல் திராவிட் ஒரு கனவு நாயகன். எண்ணற்ற இளம் பெண்களுக்கு மாத்திரம் அல்ல, வளர்ந்து வரும் வீரர்கள், ரசிகர்கள், வர்ணனையாளர்கள் என அனைவருக்குமே ராகுல் ஒரு ரோல் மாடல். இந்தியன் ஓவர்சீஸ் வங்கியில் பணியாற்றும் நண்பரது நண்பர் ஒருவர், தான் இந்தியன் சிமெண்ட் நிறுவனத்திற்காக கிரிக்கெட் ஆடிய போது திராவிட் உடனான தன் நினைவுகளைப் பகிர்ந்து கொண்டார்.

"இன்னமும் அப்படியே தான் இருக்கான். மத்த பிளேயர்ஸ் பத்தி தப்பாப் பேச மாட்டான். அவன் உண்டு அவன் கேம் உண்டுன்னு இருப்பான். கிரிக்கெட் பத்தி தான் அவன் நெனப்பெல்லாம். வெரி டெடிகேட்டேட் ஃபெல்லோ. அந்த குவாலிட்டி தான் இப்ப இவ்வளவு தூரம் கொண்டு போய் விட்டுருக்கு"

பங்கு முதலீட்டாளர் என்ற வகையில் நாம் இந்த நாயகனிடம் கற்றுக் கொள்ள வேண்டியது ஏராளம். மகேந்திர சிங் தோனி, வீரேந்திர சேவாக் போல பரவசம், படுவேகம், அசுரத்தனமான அட்டாக் என எதையும் திராவிட்டிடம் காண இயலாது. இருப்பினும் மிக மிக வெற்றிகரமான பேட்ஸ்மேன் ராகுல். டெஸ்ட் போட்டிகளில் எதிரணிப் பந்து வீச்சாளர்களை அயரச் செய்து, களைப்படைந்த பின் வரும் நல்ல பந்துக்காகக் காத்திருக்க அவன் வெட்கப்படுவதே இல்லை.

டெஸ்ட் கிரிக்கெட் ஐந்து நாட்களுக்கு மட்டுமே ஆடப்படுவது. ஆனால் பங்கு முதலீடு ஆயுட்காலத்திற்கும் ஆடுகிற ஆட்டம். நாள் தோறும் காணும் பங்கு விலை 'ஆஃப் ஸ்டம்ப்' க்கு வெளியே வீசப்படும் பந்து போல. அடித்துத்தான் ஆகவேண்டும் எனப் பந்து நம்மைக் கட்டாயப் படுத்துவது இல்லை.

பெளலர்கள் களைப்படைந்து மோசமான பந்தோ அல்லது 'ஃபுல் டாஸோ' வீசும் போது சக்தி அனைத்தையும் ஒருசேரத் திரட்டி நடு மட்டையில் விளாசி அடித்து பவுண்டரியோ, சிக்ஸரோ சேர்த்துக் கொள்வது திராவிட் இன் வழக்கம். அந்த வகையில் நாம் எல்லாம் அதிர்ஷ்டசாலிகள். அவர் ஒரு பந்தில் அதிக பட்சமாக 6 ரன் தான் அடிக்க முடியும். நாமோ நமது சக்தி, பணபலம், மனபலம் இவற்றிற்கு ஏற்றவாறு எத்தனை கோடிகளை வேண்டுமானாலும் திரட்டி அடிக்கலாம். அதன் பின் மீண்டுமொரு 'ஃபுல் டாஸ்' பந்துக்காகக் காத்திருக்கலாம்.

ஒரு பந்தையோ அல்லது தொடர்ச்சியாக ஒரு ஓவரையோ ஆடாமல் விட்டாலும் பங்குச் சந்தையில் நீங்கள் விக்கெட் இழப்பதில்லை. தவறாக ஆடி கேட்ச் கொடுத்தால் ஒழிய யாரும் உங்களை அவுட் ஆக்க முடியாது.

லட்டு மாதிரி ஒரு பந்தைத் தவற விட்டாலும் பரவாயில்லை. காத்திருக்கலாம். ஆனால் அதைத் தவற விட்ட ஆத்திரத்தில் அடுத்த பந்திலேயே (யார்க்கர்) சிக்ஸ்ர் அடிக்க நினைக்காதீர்கள்.

ராகுல் பேட்டிங் போல முதலீடு செய்வது மிகச் சுலபம். ரசிகர்கள் சேவாக் இடம் எதிர்பார்ப்பது போல உங்களிடம் எதிர்பார்ப்பது இல்லை. பெரும்பாலும் எல்லா பரஸ்பர நிதி (mutual fund) நிறுவன நிர்வாகிகளுக்கு இந்தச் சுதந்திரம் இருப்பதாகத் தோன்றவில்லை. பந்துக்குப் பந்து, ஓவருக்கு ஓவர் இவர்கள் சக ஆட்டக்காரருடன் ஒப்பிடப் படுகிறார்கள். ரசிகர் கூட்டமும், அவர்கள் மேல் பந்தயம் கட்டியவர்களும் ஒவ்வொரு பந்திலும் சிக்ஸர் எதிர்பார்க்கிறார்கள்.

ஆக ராகுலாக இருப்பதில் அதிகச் சிரமம் இல்லை. அதே சமயத்தில் சுலபமும் இல்லை. உணர்ச்சியைக் கட்டுப் படுத்திக் கொண்டு நல்ல முதலீட்டு வாய்ப்பு வரும் வரை காத்திருப்பது பல பேருக்கு இயலாத காரியம். மறு முனையில் இன்னொரு பேட்ஸ்மேன் அடித்து ஆடினால் தானும் அடித்துத் தான் ஆகவேண்டும் என நினைக்கக் கூடாது. நம் எதிரி வேறு யாரும் இல்லை; நமக்குள் தான் இருக்கிறான்.

லாவகமாக வரும் பந்துகளில் அடிக்காமல் 'கட்டை' வைப்பது தவறு. ராகுல் இந்தத் தவறை அடிக்கடி செய்வதாகத் தெரியவில்லை. ஒரு ரன், இரண்டு ரன் கூட எடுக்க நினைக்கதீர்கள்.. go for the maximum.

சில சமயங்களில் 'நோ-பால்' பந்து ·புல்-டாஸ் ஆக அமைவது உண்டு. அதையெல்லாம் தவறவிட்டால் என்ன சொல்வது?

நீங்கள் ஆட்டமிழக்கும் பந்து (பங்கு) எது என்பது ஒரு வேளை உங்களுக்குத் தெரியாமல் இருக்கலாம். நிச்சயமாக அடித்து ஆடக்கூடிய பந்து எது என அடையாளம் காணச் சிரமம் இருக்காது. அதில் மட்டும் கவனம் செலுத்தினால் போதும்.

எவ்வளவு மோசமாக ஆடுகளமாக இருந்தாலும், ஐந்து நாள் போட்டியில் சுலபமாக ஆடக்கூடிய பந்துகள் ஐந்தையாவது எதிர் நோக்கலாம். அதே பாணியில், அவ்வளவு மோசமான பொருளாதாரச் சூழலிலும் ஒரு ஆண்டில் குறைந்த பட்சம் ஐந்து 'லட்டு' மாதிரி முதலீட்டு வாய்ப்புகளைப் பெறுவது நிச்சயம்.

"அது வரைக்கும் என்னால வெயிட் பண்ண முடியாது. ஐ வில் பிளே எவரி டெலிவரி" என தினம் தினம் வாங்கி விற்று உழன்று கொண்டிருந்தால், loose delivery கிடைக்கும் தருணத்தில் அடிப்பதற்குத் திராணி இல்லாமல் போய் விடும்.

சில சமங்களில் reverse sweep மாதிரியான அசாதாரண அடிகளை அடித்தாலும் பரவாயில்லை. ஆனால் அது நிச்சயமான ரன் பெற்றுத்தரும் எனத் தெரிந்திருக்க வேண்டும். அதுபோலத் தான் futures & options எனப்படும் 'தருவி'கள் (derivatives).

"டெய்லி டெரிவேட்டிவ் டிரேடிங் பண்ணாதீங்க அய்யா!! ஏன்னா நான் எவெரி பால் ரிவர்ஸ் ஸ்வீப் ஆடறது இல்லை" என்கிறார் திராவிட். கேட்கிறதா???

வளம் பெறுவோம்.

Thursday, May 18, 2006

திருடர்கள் ஜாக்கிரதை

குப்புசாமி செல்லமுத்து

"நாய்கள் ஜாக்கிரதை" மாதிரி திருடர்கள் ஜாக்கிரதை எனத் தலைப்பிட்டது பிழையில்லை. ஆனால் இங்கே சுட்டிக் காட்டப் படும் சமூகம் இந்தத் தலைப்பை நியாயப்படுத்துவது போல நடப்பது தான் பிழை.

தன் மகளுக்கு மாப்பிள்ளை தேடும் தகப்பன் ஒவ்வொறு முறையும் ஜோசியக்காரனால் கொடுமைக்கு உள்ளாகிறான். எங்கே ஜாதகம் பொருந்தி அவர்களுக்குப் பிடித்துப் போய் திருமணம் நடந்தால், அடுத்த முறை நம்மிடம் வர மாட்டாரோ என்பதே அவனது நோக்கம். அதனால் தான் பெரும்பாலான ஜாதகங்கள் பொருந்தாமல் போவதும், தோஷங்கள் அதிகரிப்பதும். இங்கே வாடிக்கையாளனாகிய தகப்பனின் நலனும், விறபனையாளனான ஜோசியக்காரனின் நலனும் வேறுபடுகின்றன.

முடி நிறைய வெட்டி விட்டால் நெடு நாள் கடைக்கு வரமாட்டீர்கள் என்பதால் லேசாக வெட்டி விடுவது சவரக் கடைகாரரின் இயல்பு. சில பேர் மொட்டை மட்டுமே போடுவது இவர்களுக்கு இடைஞ்சல் தான். இங்கும் கூட வாடிக்கையாளனின் நலனும், சேவகனின் நலனும் எதிர்மறையானவை.

மதுபானக் கடைகள் தனியார் மயமாக இருந்த போது கிடைத்த வாடிக்கையாளர் சேவை அரசு மயமானவுடன் கிடைப்பதில்லை. நீ குடித்தாலும் குடிக்காவிட்டாலும் அரசாங்கம் அவனுக்கு ஊதியம் கொடுக்கிறது. அதே ஆள் இதே கடை தனியார் இடம் இருந்தால் இப்படித்தானா இருப்பான்? வியாபாரமானால் தான் முதலாளி சம்பளம் தருவார். ஊழியர் நலன், முதலாளி நலன், வாடிக்கையாளர் நலன் என மூன்றும் இங்கே ஒரே கோட்டில் அமைய வேண்டும்.

Incentive based bias என்று ஆங்கிலத்தில் இதைச் சொல்வார்கள். எல்லா நேரத்திலும், எல்லாரையும் நேரடியாகவும், மறைமுகமாகவும் இயங்கச் செய்வது இது. தலையணை மந்திரம் கூட இப்படித் தான். ஓட்டுக் கேட்கும் அரசியல்வாதி, இடு ஒதுக்கீட்டுக்கு எதிராகப் போராடும் மாணவன் என அனைவருக்கும் incentive based bias தான் உந்து சக்தி.

'ஜாக்கிரதை' என்று நாம் எச்சரித்த அந்தச் சமூகம் எது என இப்போது சொல்ல வேண்டும். பரஸ்பர நிதி விற்பனைப் பிரதிநிதிகள்(mutual fund sales rep) இவர்கள்.
நீங்கள் செய்யும் முதலீட்டில் வசூலிப்படும் நுழைவுக் கட்டணமான (entry load) 2.5% த்தின் பெரும் பகுதி இந்த விற்பனையாளர்களுக்குத் தான் போகிறது. 100 ரூபாய் நீங்கள் முதலீடு செய்தால் இவருக்குக் கொடுத்தது போக ரூ.97.50 தான் நிகர முதலீடு. அது போக நிதி நிர்வாக நிறுவனம் தனியாக வருடந்தோறும் 2.5% எடுத்துக் கொள்ளும். அதாவது 5% வீணாகவே போகிறது. முதலீடு 10% வளர்ந்தால் அது அடைந்திருக்கும் நியாயமான வளர்ச்சி 15%. சாதாரணமாகத் தெரியும் இந்த 5% முப்பது ஆண்டுகளும் நீடித்தால் என்ன ஆகும்?

100 ரூபாய் 15% அளவில் வளர்ந்து 30 ஆண்டு முடிவில் கிடைப்பது = ரூ.6621
100 ரூபாய் 10% அளவில் வளர்ந்து 30 ஆண்டு முடிவில் கிடைப்பது = ரூ.1744
நீங்கள் சம்பாதிப்பதை விட இவர்கள் கிட்டத்தட்ட 4 மடங்கு சம்பாதிக்கிறார்கள். அதாவது உங்களது வருவாயில் ஐந்தில் நான்கு பகுதி இவர்களுக்கே போகிறது. இதைத் தான் சிறு துளி பெரு வெள்ளம் என முன்னோர் சொன்னார்களோ என்னவோ.

ஒரே ஒரு நிதித் திட்டத்தில் மட்டும் தொடர்ந்து நீடித்தால், முதல் வருடம் தான் 5% செலவு; மற்ற வருடங்களில் நாம் விற்பனைப் பிரதிநிதிகளுக்கு அழுவதில்லை. ஆனால் பலரையும் ஒரு திட்டத்திலிருந்து இன்னொரு திட்டத்திற்கு மாற்ற ஒரு கூட்டமே இருக்கிறது. இவர்கள் அறிவுரையாளர்கள் (financial advisors). பரஸ்பர நிதி நிறுவனங்கள் விற்பனையாளருக்குப் பணம் கொடுக்கின்றன; விற்பனையாளர் அறிவுரையாளருக்குப் பணம் கொடுக்கிறார். பல சமயங்களில் விற்பனையாளரும் அறிவுரையாளரும் ஒரே ஆளாக அமைவதுண்டு.

என் நண்பர் ஒருவரது உறவுக்காரப் பையன் ஒருவன் பரஸ்பர நிதி விற்பனைப் பிரதிநிதியாக இருக்கிறான்.

"ஒரு லட்சம் எங்கிட்ட குடுத்துருங்க. மாசத்துக்கு 2 தடவை அப்போதைக்குப் பிரபலமா இருக்குற ஃபண்டுல பணத்தை மாத்தி மாத்தி ஸ்விட்ச் பண்ணிட்டே இருக்க வேண்டியது என் பொறுப்பு. ஒரே ஃபண்டுல அப்படியே போட்டு வச்சா ஏறாது" இது அவன் சொன்னது. இந்தத் துறை பற்றி நான் அறிவிலியாக இருப்பேன் என நினைத்து இருக்கக் கூடும்.

"நீயே அப்படி ஸ்விட்ச் பண்ணி, உன் பணத்தை மல்டிபிளை பண்ணிக்கலாமே? எதுக்கு இந்தப் பொழப்பு?" என்றும் ஒவ்வொரு முறை புதிய திட்டத்திற்குத் தாவும் போதும் அவனுக்கு எவ்வளவு கிடைக்கும் என்றும் கேட்டேன். என்ன பதில் கிடைத்திருக்கும் என நீங்களே கற்பனை செய்து கொள்ளலாம்.

மூன்று மாதத்திற்கு நிதித் திட்டங்கள் எல்லாம் அதே நிலையில் இருப்பதாக வைத்து ஒரு உருவகம்......

வாரம் 1:
கையிலிருக்கும் பணம் ரூ.100
திட்டம் 1 இல் முதலீடு செய்ய நுழைவுக் கட்டணம் ரூ.2.5
மீதமிருக்கும் பண முதலீடு ரூ.97.50

வாரம் 3:
திட்டம் 1 இல் முதலீடு ரூ.97.50
அதிலிருந்து வெளியேறக் கட்டணம் (exit load) = 2.5% of ரூ.97.50 = ரூ.2.44
கையிலிருக்கும் பணம் ரூ.97.50 - 2.44 = ரூ.95.06
திட்டம் 2 இல் முதலீடு செய்ய நுழைவுக் கட்டணம் = 2.5% of ரூ95.06 = ரூ.2.38
மீதமிருக்கும் பண முதலீடு ரூ.92.68

இப்படியே போனால் 13 வது வாரத்தில் (சுமார் 3 மாதம்) உங்கள் முதலீடு ரூ.72 ஆகக் குறைந்திருக்கும். முதல் திட்டத்தில் மட்டும் விட்டு வைத்திருந்தால் ரூ.97.50 ஆகவும் நீங்களே முதலீடு செய்திருந்தால் ரூ.100 ஆகவும் இருந்திருக்கும்.

இந்தக் கணக்கை அவனிடம் நான் சொன்ன போது, அவன் அதை ரசிக்கவில்லை. எதிர் பார்த்தது தான்.

முதலீடுகள் கொள்கையைப் போல, மனைவியைப் போல இருக்க வேண்டும். கவனமாக ஒருமுறை தேர்ந்தெடுத்தாலே போதும்; அடிக்கடி மாற்றத் தேவையில்லை.

உங்களுக்குத் தெரிந்த யாராவது பரஸ்பர நிதித் திட்டத்தை விற்க முயன்றால், மறுப்பதற்குத் தயங்க வேண்டியதில்லை. "இதனால் உங்களுக்கு என்ன கிடைக்கும்" எனத் திருப்பிக் கேளுங்கள்.

Consumers buy products; investor choose investments. You better be an investor.

திருடர்களிடன் ஜாக்கிரதையா இருப்பது நமது பொறுப்பு!!

வளம் பெறுவோம்.

Tuesday, May 16, 2006

கோடைத் தள்ளுபடி @ Dalal Street

குப்புசாமி செல்லமுத்து

கடந்த 3-4 தினங்களில் மும்பைப் பங்குச் சந்தையின் குறியீட்டு எண் SENSEX கிட்டத்தட்ட 1000 புள்ளிகள் குறைந்திருக்கிறது. தொலைக்காட்சி ஊடகங்கள் இதை ஏதோ 'இழவு' செய்தி போல மிகைப் படுத்திக் காட்டி வருகின்றன.
  • பங்குச் சந்தை மூன்றாம் நாளாகத் தொடர்ந்து வீழ்ச்சி
  • பங்குகள் சரிவு - 400 புள்ளிகள் இறக்கம்
  • அந்நிய முதலீட்டாளர்கள் இந்தியாவின் மீது கொண்டிருந்த நாட்டம் தளர்வு

இது போன்ற செய்திகளைக் கேட்டுப் பதட்டப்படத் தேவையில்லை.
இதே மீடியாக்கள் ஒரு வாரம் முன்பு வரை 'இந்தியப் பங்குகள் இன்னும் கவர்ச்சிகரமாகத்தான் உள்ளன' என்றும் 'இந்த வருட முடிவிற்குள் SENSEX 15,000 புள்ளிகளை எட்டிவிடும்' என்றும் ஜோதிடம் சொல்லின. அதே மீடியாக்கள் இப்போது பங்குகள் குறையும் போது ஒப்பாரியும், ஓலமும் இட்டு வருகின்றன.

காலிலே கத்தியைக் கட்டி நடக்கும் சேவற்சண்டையைப் பார்த்த படி ஆர்ப்பரிப்பவர்களுக்கும் இவர்களுக்கும் பெரிய வேறுபாடு இல்லை. சண்டையிடுவதும், காயப்படுவதும் சேவல்கள் தான்; இவர்கள் அல்ல.

பங்கு முதலீட்டின் குரு என (இவர்கள் கூற்றுப் படி) கருதப்படும் மார்க் ஃபேபர் (Mark Faber) இந்தியா உட்பட வளரும் நாடுகளின் பங்குகள் 30% வரை குறையச் சாத்தியம் இருப்பதாகக் கூறியுள்ளார். இதே குரு சில வாரங்களுக்கு முன், "என் நெற்றிப் பொட்டில் துப்பாக்கியை வைத்து அமெரிக்கா மற்றும் இந்தியப் பங்குகள் இதில் எதை வாங்குவாய் என்று யாராவது கேட்டால், இந்தியப் பங்குகள் எனக் கூற எனக்கு எந்த விதத் தயக்கமும் இருக்காது" என்று சொன்னார். இப்போது என்ன மாறி விட்டது?

இவர்கள் எழுப்புவது இரைச்சல். பங்குகள் ஏறும் போதும் இறங்கும் போதும் அதற்காகக் காரணம் கற்பித்து நியாயப் படுத்துவது தான் தலையாய பணி இம்மாந்தர்கட்கு.

சரி... பங்குகள் திருத்தமும், சரிவும் (correction & crash) அடையும் போது என்ன செய்ய வேண்டும்? அது தனிப்பட்ட நபர்களைப் பொறுத்தது. ஆனாலும், புத்திசாலி முதலீட்டாளர் எனும் கற்பனைத் தொலைக்காட்சியில் வரும் செய்தியைப் பாருங்கள்.

"பங்குச் சந்தையின் முன் ஒரு பெரிய பேனர் தொங்க விடப் பட்டுள்ளது. அதில் இன்று பங்குகள் 450 புள்ளி தள்ளுபடியில் விற்பனை ஆவதாக எழுதப் பட்டுள்ளது. தி.நகர் ரங்கநாதன் street போல dalal street முழுதும் அலை மோதும் மக்கள் கூட்டம். அனைவர் முகத்திலும் திருவிழாக் களை. தள்ளுபடியில் பங்குகள் விற்கப்படும் செய்தி நாடு முழுதும் பரவிக் குடிகளை மகிழ்ச்சியில் ஆழ்த்துகிறது. அடுத்த வாரத்திலும் இதே தள்ளுபடி இருக்கும் என நிபுணர்கள் கூறுகின்றனர். இந்தியப் பங்குகள் இன்னும் 30% குறையும் என மார்க் ஃபேபர் சொன்னது கேட்டு ஏக குஷியில் முதலீட்டாளர்கள் இருக்கிறார்கள். கையில் 'மைக்'குடனும், முகத்தில் உற்சாகத்துடனும் செய்திகளைச் சேகரித்துத் தருகிறார் செய்தியாளர்."

கற்பனை செய்து பார்க்க நன்றாக இருக்கிறதா?

மற்றோர் விற்கும் போது வாங்குவதும், வாங்கும் போது விற்பதும் தான் சாமர்த்தியமான முதலீட்டாளருக்கு அழகு. மந்தைக் கூட்டத்திலிருந்து வேறுபடுவது தான் இந்தத் துறையில் வெற்றி பெற்ற அனைவரிடமும் நாம் காணும் பண்பு.

ஆனால், இதைச் சொல்வது எவ்வளவு எளிதோ, அதே அளவு அரிது அதைக் கடைபிடிப்பது. மிகுந்த மனோதிடம், பொறுமை, விவேகம், தேவையான சமயத்தில் அசாத்திய வேகம் என நிறையப் பக்குவங்கள் தேவை.

கொஞ்சம் சைக்காலஜி, கொஞ்சம் எக்கனாமிக்ஸ், கொஞ்சம் கணக்கு, கொஞ்சம் பொது அறிவு ....... ஒன்றாகச் சேர்த்தால் பங்குச் சந்தையில் நீங்களும் ஒரு 'லார்ட்' தான்.!!

வளம் பெறுவோம்.

Sunday, May 14, 2006

கலைஞரும் தளபதியும் - அடுத்த கட்டம்

குப்புசாமி செல்லமுத்து

தன் மகன் ஸ்டாலினுடன் முதல் வரிசையில் மேடை மீது அமர்ந்திருந்தார் கருணாநிதி. பார்வையாளர் பகுதியில் முதல் வரிசையில் இருந்த சிதம்பரம் தன் மகன் கார்த்திக்கை இரண்டாவது வரிசையில் உட்காரச் செய்ததே பெரிய விஷயம் எனப்பட்டது. ஜெயலலிதாவை பெண் பெரியார் என்று வெட்கமின்றி வர்ணித்த வீரமணி கூட வந்திருந்தார். அவருக்கு இரண்டு இருக்கை தள்ளி ஈ.வி.கே.எஸ்.இளங்கோவன் உட்கார்ந்திருந்தார்.

சனிக்கிழமை (13-மே-2006) அன்று சென்னை நேரு விளையாட்டு அரங்கத்தில் நடந்த தி.மு.க அரசின் பதவிப் பிரமாண நிகழ்ச்சி தான் இது. நேரில் கண்டு வந்த ஒருவரது பிரதிபலிப்பு!! What justice does this write-up do for this blog on stock market? well.... probably no justice. ஆனாலும் கை அரித்ததன் விளைவால் எழுதப்பட்டது.

"ஏய்.. அங்கே பாரு கவிஞர் வைரமுத்து" கார்த்திக் சிதம்பரத்திற்கு இரண்டு வரிசை பின்னால் இருந்த கவிஞரைச் தன் சகாக்களுக்கு சுட்டிக் காட்டிக் கொண்டிருந்தார் ஒரு கழகக் கண்மணி.

"நம்ம எம்.எல்.ஏ வந்துட்டார் பாரு. சும்மா எள வயசு; அநேகமா மந்திரி சபையிலேயே அவருக்குத் தான் சின்ன வயசுன்னு நினைக்கிறேன்." இப்படிக் குதூகலப் பட்டவர் என்னை உள்ளே அழைத்துப் போனவர். மனைவி, மகன், மகள், பெற்றோர் என குடும்பமாய் வந்திருந்தார் அந்த எம்.எல்.ஏ. நம்மைப் போலவே நடுத்தர வர்க்கத்து மனிதன் என்பதைப் பார்த்தவுடனே சொல்லிவிடலாம். மாபெரும் சபைதனில் தன் மகன் மண்ணாளும் மந்திரியாகப் போவதை காணவந்த அவரது தாய் தந்தையர் முகத்தில் பரவசம். எனக்கே சில நிமிடங்கள் அந்தப் பரவசம் பற்றிக் கொண்டது உண்மை. தொகுதி மக்கள் எந்த நேரத்திலும் தொடர்பு கொள்ளக் கூடிய ஆள் என்பதைப் பலரும் கூறக் கேட்டிருக்கிறேன்.

"உலகத் தமிழர் வாழ்க! அறிஞர் அண்ணா வாழ்க! தந்தை பெரியார் வாழ்க! தமிழினத் தலைவர் கலைஞர் வாழ்க" உணர்ச்சி பொங்க அடித்தொண்டையில் இருந்து கூவிக்கொண்டிருந்தார் ஒரு காக்கிச் சட்டை மனிதர். காசுக்கோ, பிரியாணிக்கோ, பாட்டிலுக்கோ கத்துபவராகத் தெரியவில்லை; உணர்வோடு கலந்திருந்தது அந்தக் கூவல். ஆட்டோ ஓட்டுனராக இருக்க வேண்டும் என நினைத்துக் கொண்டேன். (எல்லாக் கட்சியிலும் இது போன்ற தொண்டர்கள் இருக்கத்தான் செய்கிறார்கள்) சமீப காலமாக இராமேஸ்வரத்தில் ஈழத்தமிழர் வருகை அதுகரித்திருப்பதாகச் செய்தியைப் பார்க்கிறோம். தமிழினத் தலைவர் ஆட்சிக்கு வந்து விட்டார்; ஆனால் உலகத்தமிழர் நிலை? இலங்கையில் மட்டும் இருந்த தமிழர்களை உலகெங்கும் சிதறி ஓடச் செய்து உலகத்தமிழராக ஆக்கிய சிங்கள அரசுக்கு, தமிழத்தலைவர் விடுக்கும் செய்தி என்ன? காஷ்மீர் பிரச்சினை, காவிரிப் பிரச்சினை, ஈழத்தமிழர் பிரச்சினை என தீர்வு காணப்படாமல் பிரச்ச்சினைகள் இருக்கும் வரை தான் அரசியலும், அரசியல்வாதிகளும்!!

"இத்தன நாளு ஒரு தி.மு.க பங்சன்ல ஒன்னுல கூட பத்து போலீஸ்காரனுக்கு மேல இருக்க மாட்டானுக. இன்னிக்குப் பார் எத்தனை பேருனு" எனக்குப் பின் சீட்டிலிருந்து யாரோ அப்செர்வ் செய்தார்கள். பத்து என்கிற அவரது எண்ணிக்கை மிகைப்(குறை)படுத்தப் பட்டதாக இருக்க வேண்டும். பதவியேற்பு விழா என்பது கட்சி விழா அல்ல, அரசு விழா என்பதை நான் எப்படி அவருக்குச் சொல்வேன்? வாழ்க பகுத்தறிவு.

"இந்தக் கூட்டத்துல வந்து உக்கார வைகோவுக்கு குடுத்து வக்கல" என்றொரு கமெண்ட். கூட்டத்துல உட்கார வச்சதால தான் வைகோ போனார் என்பது உண்மையல்லவா?

முதல்வராகப் பதிவியேற்றதும் தனது இருக்கைக்கு மீண்டும் செல்ல தயாநிதியின் தயவு கலைஞருக்குத் தேவைப்பட்டது. இந்த வயதிலும் பெரியவர் தமிழகம் முழுவதும் சுற்றுப்பயணம் மேற்கொண்டு எப்படிப் பிரச்சாரம் செய்தார் என்பது வியப்பில் தான் ஆழ்த்தியது. அவரது பேச்சு, எழுத்து, சிந்தனை இவற்றில் காணப்பட்ட தெளிவு குறைந்த பாடில்லை. அதெல்லாம் சரி.. நடக்கவே முடியாத ஒருவர் எப்படி ஆட்சியை நடத்தப் போகிறார்? ஜோதிபாசு போல, காமராசர் போல விலகிக் கொண்டிருக்கலாமே? (அமெரிக்காவைப் போல்) இரு முறைக்கு மேல் எவரும் முதல்வராகக் கூடாது என்ற சட்டம் கொண்டு வந்தால் என்ன? கலைஞருக்குச் சாதகமாச் சிந்தித்தால், எம்.ஜி.ஆர். கூடத் தான் முதல்வராயிருந்த கடைசிக் காலத்தை மருந்துவமனையில் மட்டுமே கழித்தார். வாஜ்பாய் கூட நடக்க முடியாமல் தான் இருந்தார்; ஆனாலும் பிரதமர் தானே?

ஆறு மாதகாலம் ஒப்பேற்றிய பின்னர் முதுமையைக் காரணங்காட்டி கலைஞர் விலகிக் கொள்ளக்கூடும். தான் வாழும் காலத்திலேயே ஸ்டாலினை முதல்வராக்கிட வேண்டுமென்பது அவரது அவாவாக இருக்கும். நேரு, இந்திரா என யாருமே இதைச் செய்து பார்க்கவில்லை. தேவகெளடாவைத் தவிர?

சில பத்தாண்டுகளாக கட்சியில் பணியாற்றிய ஸ்டாலின் சென்ற முறையே (1996) அமைச்சராக ஆக்கப் பட்டிருக்க வேண்டும் என்பது என் கருத்து. அதற்கேற்ற துணிச்சல் கருணாநிதியிடம் அன்று இல்லை. இம்முறை தளபதி பதவியேற்ற போது அரங்கில் பலத்த கைதட்டல், விசில்!! தொண்டர்கள் அவரை ஏற்றுக்கொண்டது போலத் தான் தோன்றியது. அல்லது ஸ்டாலினை ஏற்றுக்கொண்டவர்களை மட்டும் கட்சி ஏற்றுக்கொண்டதா?

தி.மு.க. வில் பேராசிரியர், ஆற்காட்டார் என பெயரளவிலாவது கட்டுக்கோப்பான இயக்கம் இருப்பது போலத் தெரிகிறது. அந்த வகையில் அ.தி.மு.க.வை விட இவர்கள் ஒரு படி மேல்.

குடும்ப அரசியலை (குறிப்பாக ஸ்டாலினை) ஏற்றுக் கொள்ளாத வீரபாண்டி ஆறுமுகம் மற்றும் என்.கே.கே.பெரியசாமி இருவரும் தங்கள் வாரிசுகள் மூலம் அந்த சுகத்தை அனுபவிக்க ஆரம்பித்திருக்கும் நேரம் இது. இனி எதிர்ப்பு எழாது என் நம்பலாம். கலைஞர் என்றுமே ராஜதந்திரி தான்.

எத்தனை ஆண்டுகள் தளபதி இளைஞர் அணித் தலைவராகவே (இளைஞராகவே எனப் பொருள் கொள்க) இருப்பார் என்ற கேள்வியை நானே கொண்டிருந்தேன்; ஒன்றரை ஆண்டு முன் ஒரு கல்லூரி வளாகத்தில் ஜாக்கிங் செய்ய வந்திருந்த அவரைக் காணும் முன். பேரப்பிள்ளை பெற்றவர் என்று தோற்றத்தைக் கொண்டு யாரும் சொல்லிவிட முடியாது. கமலுக்குக் கூட வயதாகி விட்டது; ஆனால் ஸ்டாலினுக்கு இல்லை.

பதவியேற்ற அத்தனை பேரும் கரகரப்புக் குரல்காரர்கள் தான். மென்மையாகவும், நளினமாகவும் அதே சமயத்தில் தெளிவாகவும் பெசக்கூடிய (சிதம்பரம் போல articulate) மனிதர்கள் கழகத்தில் இல்லை. உணர்ச்சியை தொட்டுப் பேசத்தான் பேச்சாளர்கள் அதிகம் இருக்கிறார்களே தவிர அறிவைத் தொட்டுப் பேச யாரும் இருப்பதாகத் தெரியவில்லை.

கலைஞருக்குக் கலைத்துறையியின் மேல் வருத்தம் இருப்பதாகத் தெரிகிறது. திருட்டு வி.சி.டி. முன் போல் கிடைக்குமா? அரிசியெல்லாம் 2 ரூபாய்க்கு தற்றீங்க. வி.சி.டி.யும் அப்படியே குடுத்தா நல்லா இருக்கும்.

வெளியே வரும் போது அரங்கத்திலிருந்து, ரிப்பன் கட்டிடம் வரை போலீஸ்காரர்களை எல்லாம் சென்னைத் தமிழில் கலாய்த்துக் கொண்டே வந்தார் ஒரு பெண். தன் தலைவனை ஆட்சி பீடத்தில் அமர்த்தியதில் அவருக்குச் சந்தோசம்.

காமராசரும், காங்கிரசும் தோற்கடிக்கப்பட்டவுடன் இரண்டு கழகங்களும் மாறி மாறி (அண்ணா காலம் முதல்) ஆண்டதில் தமிழகம் என்ன முன்னேற்றம் கண்டிருக்கிறது என வியக்கவேண்டியிருக்கிறது. அரசை நம்பி யாரும் இல்லை; நமது உழைப்பே போதும் என்கிறதாக மாறிப் போனது நம் மன நிலை. திருப்பூர் நகரம் சிறந்த எடுத்துக்காட்டு. "கால் நூற்றாண்டுக்கும் மேலாக, பேசிப்பேசியே நம்மை முட்டாளாக்கி வைத்திருக்கிறார்கள். இதை இனி மெலும் அனுமதித்தால் உலகில் உன்னையும் என்னையும் போல் முட்டாள் எவனுமில்லை" நெய்வேலியில் பாரதிராஜா சொன்னது நினைவு வருகிறது. அதே தான் எமது கருத்தும். "பாரதிராஜா ஜெயலலிதா கிட்ட காசு வாங்கிட்டுத் தான் இப்படிப் பேசுகிறார்" என சன் டி.வியில் குதித்த சரத்குமாரும், ராதிகாவும் இப்போது எதை வாங்கிக்கொண்டு அந்தப் பக்கம் போனார்கள்?

Thursday, May 11, 2006

மதிப்போ மதிப்பு; பங்கு மதிப்பு!!

குப்புசாமி செல்லமுத்து

பங்கு வர்த்தகம் செய்யும் போது அதன் உண்மையான மதிப்பு (value) என்ன என்பதே தெரியாமல் இருப்பது முட்டாள் தனம். இருந்தாலும் நிறையப் பேர் மதிப்பீடு என்னும் கோட்பாட்டையே மறந்து '10 மணிக்கு வாங்கி, 12 மணிக்கு விற்பதை' வழக்கமாகக் கொண்டுள்ளனர். 'ஆன் லைன்' டிரேடிங் என்ற கொடிய கொசுவின் வாயிலாகப் பலரையும் பாதித்திருக்கிறது இந்த நோய்.

ஒரு தொழிலில் ஈடுபடுவதற்கு (முதலிடுவதற்கு) முன், அதிலிருந்து எவ்வளவு இலாபம் கிடைக்கும் என்பதைத் தெரிந்து கொள்ள வேண்டும். அது பெட்டிக் கடையாக இருந்தாலும் சரி; பெட்ரோல் சுத்திகரிக்கும் ஆலையாக இருந்தாலும் சரி.

A என்றொரு கம்பெனி இருப்பதாக வைத்துக் கொள்வோம். அதில் மொத்தம் 1000 பங்குகள் இருக்கின்றன. அந்தக் கம்பெனியின் ஆண்டு லாபம் (செலவு, கடனுக்கான வட்டி மற்றும் அரசாங்கத்திற்குச் செலுத்தும் வரி போக மீதம் கிடைக்கும் தொகை) ரூ10,000. ஆயிரம் பங்குளின் லாபம் பத்தாயிரம் என்றால், ஒரு பங்கு ஈட்டித் தந்த லாபம் எவ்வளவு? பத்து ரூபாய். அதைத் தான் EPS - Earnings per Share- என்று ஆங்கிலத்தில் குறிப்பிடுவர்.

"நல்ல லாபமா இருக்கே. ஒரு பங்குக்குப் பத்து ரூபாயா!!" என யாரும் வியக்க வேண்டாம். நல்ல லாபமா இல்லையா என்பதை, அதற்கு என்ன விலை கொடுக்கிறோம் என்பதைப் பொறுத்தே சொல்ல முடியும். மேலே குறிப்பிட்ட நிறுவனம் A இன் பங்கு ஒன்று ரூ.850 க்கு வியாபாரமாகி வருகிறது என்றால் அதை நீங்கள் வாங்குவீர்களா? அதாவது ஒரு ஆண்டு கழித்து 10 ரூபாய் கிடைக்க ரூ850 தரச் சம்மதிப்பீர்களா? அப்படியே செய்தாலும் அது 1.18% வருமானத்தைத் தான் ஈட்டித்தரும்.

(10 / 850) X 100 = 1.18%

இதே நிறுவனத்தின் பங்கு ரூ.120 க்கு வியாபாரமாகிறது என்று வைத்துக் கொள்வோம். அப்போதாவது வாங்குவீர்களா? அப்படி நீங்கள் செய்தால் நீங்கள் இட்டு வைக்கும் 120 ரூபாய் முதலீடு 10 ரூபாயைச் சம்பாதிக்கும்; அதாவது 8.33%. வங்கியில் கிடைக்கும் வட்டியை விட இது அதிகமாக இருந்தால் இந்த விலையில் வாங்குவதைச் சாதகமாகவே கருதலாம்.

இந்த மாதிரியான கணக்குகளைச் சுலபமாக்க நமக்குக் கிடைத்த உபகரணம் தான் PE விகிதம். Price Earning ratio என்பதே அது. Price (விலை) க்கும் Earning (லாபம்) க்கும் உள்ள விகிதமே PE.

PE = Price / Earning அதாவது விலை/லாபம்

ஒரு ஒற்றைப் பங்கின் விலையை, அது ஈட்டித்தரும் லாபத்தால் (EPS) வகுக்கவேண்டும்.

நமது உதாரணத்தின் படி PE = 120/10 = 12

இதை எப்படியெல்லாம் சொல்கிறார்கள் பாருங்கள்.

  • கம்பெனி A இன் பங்கு PE விகிதம் 12 இல் வியாபாரமாகிறது.
  • கம்பெனி A இன் விலை அதன் லாபத்தின் 12 மடங்காக உள்ளது.

இப்படியெல்லாம் எங்காவது கேட்கவோ, படிக்கவோ நேர்ந்தால் இனி மேல் குழப்பமடையத் தேவையில்லை.

சரி.. PE விகிதத்தை எங்கனம் நமக்குச் சாதகமாகப் பயன்படுத்திக் கொள்வது? இதுகாறும் நாம் கொண்ட அலசலின் படி, குறைவான PE விகிதம் என்றால் நமக்கு அதிக லாபம் கிடைக்கும் சாத்தியக் கூறு அதிகமாகவும், அதிகமான PE விகிதம் என்றால் நமக்குக் குறைந்த லாபம் கிடைக்கும் சாத்தியக் கூறு அதிகமாகவும் இருப்பதை அறிகிறோம். பங்கு முதலீட்டாளர் ஒருவர் தெரிந்து கொள்ள வேண்டிய அடிப்படை விஷயங்களில் இது தலையாயது.

ஒரு நிறுவனத்தின் பங்குகளை அதன் PE விகிதத்தின் அடிப்படையில் மட்டுமே எவரும் வாங்குவது இல்லை. நிர்வாகத் திறமை, தொலிழின் வளர்ச்சி வாய்ப்பு, அதன் வசமிருக்கும் அசையும் & அசையாத சொத்துக்களின் மதிப்பு, ஈவுத்தொகை வரலாறு (dividend history) போன்ற பற்பல காரணிகள் கருத்தில் கொள்ளாப்பட்டே முதலீட்டு முடிவுகள் எடுக்கப் படுகின்றன.
என்ன தான் மற்ற அளவுகோள்கள் மூலம் முடிவு எடுப்பது நடைமுறையில் இருந்தாலும், PE விகிதத்தின் அடிப்படையிலான பங்கு மதிப்பீடு பற்றித் தெரியாமல் முதலீடு செய்வதென்பது, மாலைக் கண் வியாதி படைத்த கவுண்டமணி 'சின்னத்தம்பி' படத்தில் இரவில் T.V.S. 50 ஓட்டிச் செல்வதற்குச் சமம்.

வளம் வெறுவோம்.

Tuesday, May 09, 2006

IPO தில்லுமுல்லு!!

குப்புசாமி செல்லமுத்து

உயர் நிலைப் பள்ளியில் நான் படித்துக் கொண்டிருந்த போது எங்கள் பண்ணை வீட்டிற்குச் சாண எரிவாயுச் சாதனம் அமைத்திருந்தோம். சமையல் எரிபொருள் தேவையை இது பூர்த்தி செய்ததால், பொது விநியோகத்தில் வழங்கப்பட்ட மண்ணெண்ணெயின் தேவை இல்லாமல் போனது. இதே மாதிரி வேறு பல குடியானவக் குடும்பங்கள் எமது குக்கிராமத்தில் இருந்தன.
மேற்குறிப்பிட்ட உபகரணம் இல்லாதோர் எங்கள் குடும்ப அட்டையில் கிடைக்கும் மண்ணெண்ணெயைத் தங்கள் தேவைக்குப் பயன்படுத்தினர். வீட்டு உபயோகத்திற்காக இவ்வாறு அனுசரித்துப் போவது ஒன்றும் பெரிய குற்றமில்லை.

ஆனால், இதுவே பேராசை பிடித்த பெரும் மளிகை வணிகர் நூற்றுகணக்கான போலி குடும்ப அட்டைகளின் மூலம் அத்தியாவசியப் பொருட்களைக் குறைந்த விலைக்கு வாங்கி தனது கடையில் அதிக விலைக்கு விற்றால், அது குற்றம் மட்டுமல்லாது மன்னிக்க முடியாத துரோகமுமாகும்.

சமீபத்தில் வெளிச்சத்துக்கு வந்த ஐ.பி.ஓ (IPO - Initial Public Offer) ஊழல் நம் ரேசன் கார்டு எடுத்துக்காடிலிருந்து அதிகம் வேறுபட்டதல்ல.

ஒவ்வொறு IPO விலும் சிறு முதலீட்டாளர்களுக்கு (retail investor என்பதைச் சில்லரை முதலீட்டாளர் என்று தமிழ்ப்படுத்தினால் அவ்வளவு நல்லா இருக்காது) 35% ஒதுக்கப்பட வேண்டும் என்பது நியதி. ஒரு நிறுவனம் ரூ.1000 கோடிக்குப் பங்குகளை வெளியிடுகிறதென்றால், அதில் ரூ.350 கோடி சிறு முதலீட்டாளர்களுக்குப் போய்ச்சேரும். ஆனால் இந்த பிரிவில் வருபவர்கள் (நம்மைப் போன்றோர்) அதிகபட்சமாக ஒரு இலட்சம் ரூபாய் மதிப்பிலான பங்குகளைத் தான் விண்ணப்பிக்க முடியும்.

ஒரு செல்வந்தர் ரூ.50 இலட்சத்திற்கு IPO வில் வாங்க விரும்புகிறார் என்று வைத்துக்கொள்வோம். அவரால் சிறு முதலீட்டாளர் பிரிவில் விண்ணப்பிக்க முடியாது என்பதால் பொதுப் பிரிவில் தான் விண்ணப்பிக்க வேண்டும். அதில் கிடைக்கும் ஒதுக்கீடு (quota) ஒட்டு மொத்த சிறு முதலீட்டாளர் ஒதுக்கீட்டில் மூன்றில் ஒரு பகுதி தான். நமது உதாரணத்தின் படி ரூ.1000 கோடி வெளியிட்டில் இவர்களுக்கு ரூ.117 கோடி தான். மீதமெல்லம் வெளி நாட்டு நிறுவன முதலீட்டாளர்களுக்கும் (FII - Foreign Institutional Investors), பரஸ்பர நிதிகளுக்கும் (mutual funds) மற்றும் அங்கீகரிக்கப்பட்ட -உள் நாட்டு- நிறுவன முதலீட்டாளர்களுக்கும் (Qualified Institutional Investors) போய்ச் சேரும்.

"சரி.. போனா என்ன? இவரு கோட்டாவுல தான் 117 கோடி இருக்குல்ல?" அப்டீன்னு கேக்காதீங்க. ஏன்னா, இவர விடப் பெரிய பணத்திமிங்கலமெல்லாம் இந்தக் கோட்டவுல தான் அப்ளை பண்ணுவாங்க. அவுங்க மொத்த அப்ளிகேசனே பல ஆயிரம் கோடியத் தாண்டிரும். அதனால விகிதாச்சார அடிப்படைல ஷேர் அலாட் ஆகும் போது, நம்மாளோட 50 லட்சம் அப்ளிகேசனுக்கு 2 லட்சத்துக்குத் தான் ஷேர் கிடைக்கும். (இது ஒரு உதாரணம் தான். இதை விட அதிகமாகவோ, குறைவாகவோ கிடைக்க வாய்ப்புகள் உண்டு)

ஆனால் சிறு முதலீட்டாளர்களுக்கோ ஒரு இலட்ச ரூபாய் விண்ணப்பத்திலேயே ஐம்பதாயிரத்துக்குப் பங்குகள் ஒதுக்கப்படக் கூடும்.
நமது செல்வச் சீமானுக்கு ஒரு யோசனை சொல்லலாமா? அவரே 50 இலட்சத்தையும் போடுவதற்குப் பதிலாக 50 சிறு முதலீட்டாளர்களைத் தேடிப் பிடித்து ஆளுக்கொரு இலட்சமாக அவர்கள் பேரில் விண்ணப்பித்தால், மொத்தம் 25 இலட்ச மதிப்புள்ள பங்குகள் கிடைக்குமல்லவா? தானே மொத்தமாக விண்ணப்பிக்கும் தறுவாயில் 2 இலட்சத்துக்குத் தானே கிடைக்கும்?

நமது பினாமி ஐடியா நன்றாகத்தான் இருக்கிறது. ஆனால் எதற்காக ஒவ்வொரு IPO வின் போதும் இந்தப் பெரிய மனிதர் 50 சொற்ப மனிதர்களிம் கையேந்த வேண்டும்? அதற்குப் பதிலாக, 50 போலி டீமேட் (demat) கணக்குகளைத் துவக்கிக் காரியத்தை முடித்துக்கொள்ளலாமே!!!
அது தான் நடந்திருக்கிறது. 'ரூப்பால் பன்ச்சல்' என்ற அம்மையார் ஒரே முகவரியில் இருந்து 5000 க்கும் மேற்பட்ட டீமேட் கணக்குகளைத் துவக்கி யெஸ் வங்கி (YES bank) மற்றும் ஐ.டி.எ·.சி. (IDFC) நிறுவனங்களின் IPO வெளியீட்டின் பொது விளையாடியிருக்கிறார். இதனால் பல (பன்மை) கோடி ரூபாய் அநியாய இலாபம் பார்த்திருக்கிறார்.

"அது எப்படிங்க முடியும்? ஒரு டீமேட் அக்கவுண்ட் ஆரம்பிக்கவே போட்டோ, அட்ரஸ் புரூ·ப், PAN நம்பர் எல்லாம் கேக்கறாங்க. 5000 பேருக்கு எப்படி முடியும்?" எவருக்கும் எழக் கூடிய கேள்வி தான் இது.

மளிகைக் கடைக்காரருக்கு எப்படி அரசாங்க அதிகாரிகள் துணையுடன் போலிக் குடும்ப அட்டை வாங்க முடிந்ததோ, அதே மாதிரி தான் இதுவும். போலி டீமேட் கணக்குத் துவக்க அந்தந்த அதிகாரிகளின் துணையில்லாமல் எப்படியும் முடிந்திருக்காது.

மிக நீண்ட விசாரணைக்குப் பின் ஏப்ரல்-26 அன்று வெளியிட்ட தன் தீர்ப்பில் செபி (Securities and Exchange Board of India - SEBI ஐ தமிழில் 'இந்தியப் பத்திர மற்றும் பரிவர்த்தனை வாரியம்' எனலாம்) கார்வி (Karvy), இந்தியா புல்ஸ் (India bulls) இன்னும் அது போன்ற சில அமைப்புகளையும் தடை செய்தது. பின்பு நீதி மன்றத் தலையீட்டால் அது சற்று தளர்த்தப்பட்டது வேறு விஷயம். இந்த நிறுவனங்கள் தான் போலிக் கணக்கு ஓப்பன் செய்து கொடுத்தவர்கள்.

லஞ்சம் கொடுத்து அக்கவுண்ட் ஓப்பன் பண்றது சரி. ஐந்தாயிரம் பேரின் புகைப்படத்திற்கு என்ன செய்திருப்பார்கள் என்று ஆராய்ந்து பார்த்தோம். நகரின் நெரிசல் மிகுந்த இடத்தில் புகைப் படக் கடை ஆரம்பித்து சில நாட்களுக்கு (கேட்டால் விளம்பரத்திற்காக என்று சொல்லியிருக்கிறார்கள்) இலவசச் சேவை எனும் போது யார் தான் முகத்தைக் காட்டி விட்டுப் போக மாட்டார்கள்? அப்படிச் சேகரித்தது தான் அனைத்து உருவங்களும். உருவங்களுக்கெல்லாம் தனித்தனியே பெயர் சூட்டி, கணக்குத் துவக்கி அழகு பார்த்திருக்கிறார் இந்த அம்மையார்.

'செபி'யின் அறிக்கை வேறொன்றையும் புலப்படுத்துகிறது. அனைவரும் நினப்பது பொல இன்று நேற்று நடப்பதல்ல இந்த ஊழல். ஜுன் 2003 ல் வெளிவந்த மாருதி நிறுவனத்தின் IPO விலும் இந்த கோல்மால் நடந்திருப்பதாகச் சொல்லியிருக்கிறார் நல்ல தீர்ப்பு வழங்க முயற்சித்திருக்கும் நாட்டாமை 'செபி'.

சரி. இது யார் குற்றம்? பணத்தாசை கொண்ட ரூப்பால் போன்ற ஒரு சிலர் செய்த தவறுக்காகத் தண்டிக்கப் பட வேண்டுமென்கிற வாதங்கள் நியாயமானவை. ஆனால், இந்தக் குற்றப் பட்டியல் நீளமானது.
  • ஆயிரக்கணக்கான பொலிக் டீமேட் கணக்குகளைத் தொடக்க ஒத்துழைத்த DP நிறுவனங்கள்
  • வாடிக்கையாளர் யாரென்றே தெரியாமல் (KYC - know your customer விதி மீறல்) சேமிப்புக் கணக்கு ஏற்படுத்திய வங்கிகள்
  • ஒரே முகவரியில் இருந்து இத்தனை ஆயிரம் விண்ணப்பங்கள் வருமா என்றல்லாம் ஆராயாத IPO நடத்திய அமைப்புகள்
  • இத்தனையும் கண்டும் காணாமல் இத்தனை காலம் குறட்டை விட்டுத் தூங்கிய பெரியண்ணன் 'செபி'


என அத்தனை பேரும் இதற்கு ஒட்டு மொத்தப் பொறுப்பேற்க வேண்டும்.


"பங்குச் சந்தை ஊழல் மிகுந்த இடம். அங்கு நடப்பது முதலீடல்ல; சூதாட்டம் தான்" என்பது போன்ற எண்ணங்களில் இருந்து விடுபட்டுச் சிறு முதலீட்டாளர்கள் மறுபடியும் திருப்பிப் பார்க்கிற நேரம் இது. அப்படிப்பட்ட வேளையில் நம்பிக்கையைக் குலைக்கும் வகையில் விதி மீறல்களும், ஊழல்களும் நடக்குமானால், இந்த மாபெரும் கட்டமைப்பு தன் செல்வாக்கை நீண்ட காலம் தக்க வைத்துக் கொள்ள முடியாது. இனி மேலாவது IPO வெளியீடகள் ஒளிவு மறைவின்றி, ஊழலின்றி வெளிப்படையாக நடக்கும் என நம்புவோம்.


வளம் பெறுவோம்.

Wednesday, May 03, 2006

அளவிற்கு மீறிய ஆசை

குப்புசாமி செல்லமுத்து

தான் பணியாற்றும் அலுவலகத்தில் இருந்த காலியிடத்தைப் பற்றி எனக்குத் தெரிவிப்பதற்காக நண்பரொருவர் சில தினங்களுக்கு முன் தொலைபேசியில் அழைத்திருந்தார். அந்த செய்தி குறித்து மட்டுமின்றி, வேறு சில விஷயங்களையும் பேசினோம். பரஸ்பர நிதி (mutual fund) வாயிலாக கடந்த ஒரு ஆண்டுக்கும் மேலாக பங்குகளில் தான் செய்திருந்த முதலீட்டின் நிகர சொத்து மதிப்பு (NAV - Net asset value) 100 % க்கும் அதிகமாக உயர்ந்திருப்பதைக் குறிப்பிடார் நண்பர். அது மட்டுமின்றி தற்போது ரூ.2 இலட்சமாக இருக்கும் தனது முதலீட்டை வரும் ஐந்து ஆண்டுகளில் ரூ.50 இலட்சமாக பெருக்குவதே தனது நோக்கம் என்றும் தெரிவித்தார்.

இத்தகு தனிப்பட்ட இலக்கை அலசும் முன் மேலோட்டமாக ஒரு புள்ளி விபரத்தைப் பார்ப்போம். சராசரியை மிஞ்சிய 20% வளர்ச்சியை ஒருவர் எட்டுவாரேயானால், இன்று முதலீடு செய்யப்படும் ரூ.100 ஐந்து ஆண்டுகட்குப் பின் ரூ.248 ஆக உருவெடுத்திருக்கும். மிக அசாத்தியமான - சில பேருக்குச் சாத்தியமான - செயல் இது. இணைக்கப்பட்டுள்ள அட்டவணை 1 இல் உள்ள எண்கள் இதை விளக்கும்.


Photobucket - Video and Image Hosting
முடிவில் கிட்டும் தொகை ஆரம்ப முதலீட்டின் சுமார் 2.5 மடங்கு தான். மேற்ச்சொன்ன ரூ.2 இலட்சம் சுமார் ரூ.5 இலட்சமாக வளர்ந்திருக்கும், நிச்சயமாக ரூ.50 இலட்சமாக அல்ல.

இந்த புள்ளிவிபரங்களை சற்று ஒதுக்கித் தள்ளி விட்டு நண்பரின் இலக்கை எட்டத் தேவையான வருடாந்திர வளர்ச்சி வீதம் (CACR - Compounded Annual Growth Rate) எவ்வளவு என்பதனையும் ஆராய்வோம். அட்டவணை 2 ஐ காணுங்கள்.
Photobucket - Video and Image Hosting

இடை விடாத 90% சராசரி வருடாந்திர வளர்ச்சி நிர்ப்பந்திக்கப்படுகிறது. நம்மில் எத்தனை பேர் இது சாத்தியம் எனக் கருதுவோம்? கடந்த மூன்று வருடங்களாகப் பங்குச் சந்தை அடைந்திருக்கும் வளர்ச்சி பற்றி யாருக்கும் ஐயமில்லை. எந்த அளவுகோளின் அடிப்படையின் படியும் இது 'அபாரம்' அன்றி வேறேதும் இல்லை. ஆனால், இத்தகு performance வருடந்தோறும் திரும்ப நிகழ்த்தப்படுமென நாம் எதிர்பார்க்கலாமா?

கிரிக்கெட் ஆட்டத்திலிருந்து ஒரு ஒப்புமை செய்து பார்ப்போம். ஓரளவு அறிமுகமாகியிருந்த கால்பந்தாட்டக்கார் ஒருவர் வீட்டுக்கு வருகை புரிந்திருந்தார். பள்ளி நாட்களில் இருந்தே (இன்று வரை) அதிகம் கிரிக்கெட் பார்த்திராத (யார் அவர்? இந்தியர் தானா? கொஞ்சம் கூட தேசப்பற்று இல்லாதவரா? என்றெல்லாம் கேட்க வேண்டாம்), அதில் அதிக கவனம் செலுத்தாத நபர் இவர். வந்ததே வந்தார் கிரிக்கெட் மேட்ச் இல்லாத நாளில் வரக்கூடாதா? நாலைந்து பேர் கூடி ஆர்ப்பரித்துக் கொண்டே சேவாக்கின் அதிரடி ஆட்டத்தை ரசித்துக் கொண்டிருந்த போது தான் அவர் என்ட்ரி தந்தார். எங்களால் ரசிக்கப்பட்டது ஒரு நாள் போட்டியின் முதல் 15 ஓவர் ஆட்டம் என்பதைக் குறிப்பிட்டாக வேண்டும். சேவாக் 4 பந்துகளில் தொடர்ந்து 4 பவுன்டரிகளை விளாச, எங்கள் ஆர்ப்பரிப்பும் அதிகரித்தது. கால்பந்தாட்டக்காரும் ஆட்டத்தின் வேகத்தையும் அது தரும் குதூகலத்தையும் வெகுவாக ரசித்தார்.

"அடச்சே.. இப்ப போயா பவர் கட் ஆகனும்..", என்றெங்களைத் திடீரெனப் புலம்ப வைத்தது மின் வாரியம்.

"மேட்ச் தான் இல்ல. மச்சான், 50 ஒவர்ல இந்தியா ஸ்கோர் என்ன வரும் பெட் கட்டுவமா?" என்றது ஒரு குரல். அவ்வாறே எல்லொரும் அஞ்சோ, பத்தோ பெட் கட்டினோம். 240 முதல் 320 வரை ஸ்கோர் வருமென தனி நபர்களின் கணிப்பு இருந்தது. ஆன புட் பால் பிளேயர் என்ன பெட் கட்டினார் தெரியுமா?

மீதமிருக்கும் 40 ஒவருக்கும் கடந்த 4 பந்துகளில் சேவாக் ஆடியது போன்ற - கடந்த 3 ஆண்டுகளில் பங்குச் சந்தை தந்தது போன்ற வருவாய் - ஆட்டத்தை எதிர் பார்த்து இந்திய அணியின் ஸ்கோர் 50 ஒவரில் 960 கூடுதலாக வரும் என்றார் (40 ஓவர் * 6 பந்துகள் * 4 ரன்கள்). இவரது எதிர்பார்ப்பை 'முட்டாள் தனம்' என்பதை விட நளினமான வார்த்தையால் வர்ணிக்க முடியாது. ஆட்ட முடிவில் அணியின் இலக்கைக் கணிக்க குறைந்த பட்சம் கீழ்க்கண்ட காரணிகளையாவது கருத்தில் கொள்வது அவசியம்.
* வீழ்ந்த விக்கெட்கள் மற்றும் ஆட்டமிழந்த ஆட்டக்காரர்கள்
* எதிரணியிலிருக்கும் பந்து வீச்சாளர்கள்
* ஆடுகளத்தின் தன்மை
* ஆட்டத்தின் முக்கியத்துவம்

பங்குச் சந்தையின் போக்கைக் கணிப்பது கூட அது போலப் பல்வேறு காரணிகளைக் கணக்கிட்டுச் செய்ய வேண்டிய பணி. மும்பை பங்குச் சந்தை குறியீட்டு எண் SENSEX 1990 இல் 1000 புள்ளிகளைத் தொட்டு முதல் முறையாக மூன்றிலக்கத்தை ருசி பார்த்தது. இப்போது 12,000 புள்ளியில் உள்ளது. பதினாறு ஆண்டுகால (1990 - 2006) வளர்ச்சி வருடாந்திர வளர்ச்சி வீதத்தில் 16.81% எனக் கணக்கிடலாம். அதிலும் கடந்த மூன்றாண்டுகளைத் தள்ளி விட்டால், வளர்ச்சி வீதம் மிகச்சொற்பமான ஒற்றை இலக்கத்தில் தான் இருந்திருக்கிறது என்பதே உண்மை. இவ்வாறு தான் 'முதலீடு விளையாட்டு' ஆடப்பட்டு வந்திகுக்கிறது; ரன்களும் சேகரிக்கப்பட்டுள்ளன. மோசமான பந்துகளும், பந்து வீச்சாளர்களும் அமையும் போது பழைய கசப்பான நினைவுகளை அகற்றிவிட்டு அடித்து ஆடி எண்ணிக்கையை கூட்டிக்கொள்வதே புத்திசாலித்தனம். ஒன்று மட்டும் நினைவு வையுங்கள். சுலபமாக எண்ணிக்கையை கூட்டுவது என்பது சர்வதேச கிரிக்கெட் ஆட்டத்திலும் சரி, பங்குச் சந்தையிலும் சரி அரிதான காரியம், இயலாத காரியமுமில்லை!!!

முடிவுரை எழுதும் முன், உலகின் அதீத வெற்றிகரமான முதலீட்டாளர் திரு.வாரன் ப·பட் எந்த விகிதத்தில் தன் பணத்தை கூட்டி (பெருக்கி எல்லாம் இல்லை) வந்துள்ளார் எனப் பார்ப்போம். (அட்டவணை பார்க்க)
Photobucket - Video and Image Hosting
வாரனின் பணம் வருடந்தோறும் சராசரியாக 22.43% என்கிற வீதத்தில் வளர்ந்து வந்திருக்கிறது. அமெரிக்க S&P 500 (Standard and Poor 500) குறியீடு இதே கால இடைவெளியில் 11.66% என்னும் வீதத்தில் தான் கூடியுள்ளது. பூவுலகின் தலைசிறந்த பங்கு முதலீட்டாளரே இவ்வளவு தான் நீண்ட கால சாதனையாக செய்து காட்டியுள்ளார் எனும் போது, சராசரிக்கும் அதிகமான எதிர்பார்ப்புகளை வளர்த்துக் கொள்வது நல்லதல்ல என்பது எனது தாழ்மையான எண்ணம். என்னுடைய அறிவிற்கும் (அறிவீனத்திற்கும்), சக்திக்கும் ஏற்ப சராசரியாக 15% இலாபம் ஈட்டுவதை இலக்காக நிர்ணயித்திருக்கிறேன். அதற்காக நிரம்ப உழைக்க வேண்டியிருக்கிறது; படிக்க வேண்டியிருக்கிறது; பகிர்ந்து கொள்ள வேண்டியிருக்கிறது; இன்னும் எத்தனையோ வேண்டியிருக்கிறது.....

அநேகம் பேர் பங்கு வர்த்தகம் (speculation) மற்றும் பங்கு முதலீடு (investment) முதலிய துறைகளில் புதிதாக நுழைந்துள்ளவர்கள். அருகான்மையிலிருக்கும் கடந்த காலத்தை மட்டும் பார்த்துவிட்டு தங்கள் இலக்குகள் நிர்ணயம் செய்யப்படுவதை அனுமதித்தவர்கள் இவர்கள். இந்திய அணி 960 ஒட்டங்களை குவிக்கும் என்று ஆரூடம் சொன்னவரிலிருந்து நாம் வெறுபடுகிறோமா என்று மட்டும் சிந்தித்துக் கொள்ளுங்கள் நண்பர்களே!! ஆசைப் படுவதில் தவறேதுமில்லை. ஆனால் அந்த ஆசையை, இலக்கை நோக்கி இட்டுச் செல்லும் உந்துதலையும், விடாமுயற்சியையும், அது சார்ந்த துறையில் அறிவையும், தொல்வி கண்டு துவழாத மனோதிடத்தையும், நுணுக்கங்களையும், சூட்சமத்தையும் பெருக்கிக்கொள்வது அவசியமாகிறது. இவை பெருகும் தருணத்தில், பணம் கூட மாத்திரமல்ல.... நிச்சயம் பெருகச் செய்யும்!!

பின் குறிப்பு:
இந்த கட்டுரையை ஆங்கிலத்தில் நான் எழுதிய பொழுது  அதை வாசித்து விட்டு மேற்ச்சொன்ன நண்பர் மிகுந்த வருத்தப்பட்டார். 'உள்ளுவதெல்லாம் உயர்வுள்ளல்' என்பதன் அடிப்படையில் தனது இலக்கை எட்ட இயலும் என்பதில் தெளிவாக இருப்பதாகத் தெரிவித்தார். அவரது இலக்கு மற்றும் அதனை எட்டுவதற்கான திட்டமிட்ட உழைப்பு பற்றி விமர்சிக்கவோ, குறைகூறவோ யாம் முயலவில்லை. மாறாக share market is not a place to make easy money என்பதை எடுத்துக்காட்டும் எண்ணத்தின் விளைவே இந்த கட்டுரை.

Tuesday, May 02, 2006

திருவாளர்.சந்தை அவர்கள்

குப்புசாமி செல்லமுத்து

கீழே கண்ட செய்தி ஒன்றும் எனது சொந்தக் கருத்து இல்லை என்பதைத் தெளிவுபடுத்த கடமைப் பட்டுள்ளேன்.

பெஞ்சமின் பிராங்ளின், பங்கு முதலீட்டின் தந்தை எனக் கருதப்படுபவர், ஒரு முறை, தினசரி பங்கு விலையின் எற்ற இறக்கங்களை நமக்குச் சாதகமாக பயன்படுத்திக் கொள்ளப் பின் வரும் மனோனிலையை கடைபிடிக்க அறிவுறுத்தினார்.

"பங்கு விலையின் மூலத்தை நமக்குப் பரிட்சயமான நண்பர் திருவாளர்.சந்தை அவர்களிடம் இருந்து வருவதாகக் கற்பனை செய்வது கொள்வோம். ஒவ்வொரு நாளும் தவறாமல் நம்மிடம் இருக்கும் பங்குகளை அவர் வாங்க விரும்பும் விலையை முன் வைப்பார். அதே பொல அவரிடம் உள்ள பங்குகளை அவர் விற்க விரும்பும் விலையையும் எடுத்து வைப்பார்.

பங்குகளின் நிருவனங்களும், அவற்றின் செயல்பாடுகளும் நிலையானவையாக இருந்தாலும், சந்தை அவர்கள் அவற்றுக்குக் கூறும் விலை நாளுக்கு நாள் (ஏன் நிமிடத்திற்கு நிமிடம் கூட) மாறிக் கொண்டே இருக்கும். நண்பர் அடிக்கடி சஞ்சலப்படும் மனநிலை கொண்டவர்.

சில சமயங்களில் நல்ல மனநிலையில் இருக்கும் பொது, நிறுவனங்களின் நல்ல எதிர் காலம் மட்டுமே அவர் கண்களில் தென் படும். இது போன்ற தருணங்களில் நம்மிடம் இருக்கும் பங்குகளை வாங்க என்ன விலை வேண்டுமானலும் தரத் தயங்க மாட்டார். அவரது பயமெல்லாம் நிறுவனத்தின் செயல்பாடுகளிலிருந்து வரும் இலாபத்தை நாம் அபகரித்து விடுவோம் என்பது மட்டுமே. எப்பாடு பட்டாவது நமது பங்கை கைப்பற்றுவதே அவரது குறிக்கோள்.

வேறு சில தருணங்களில் மிகவும் சோர்வடைந்தவராகக் காட்சியளிப்பார் சந்தை அவர்கள். நிறுவனத்திற்கும், உலகத்திற்கும் மிக மோசமான எதிர் காலம் மட்டுமே இருப்பதாகக் கருதுவார். நமது உடைமைகளை அவரிடம் தள்ளி விட்டு விடுவோம் என்ற அச்சத்தில், மிக மிகக் குறைவான விலைகளையே பங்குகளுக்கு முன் வைப்பார். தனது பங்குகளை எவ்வளவு குறைவான விலையாயினும் பரவயில்லை என்று நம்மிடம் விற்று விட முயல்வார்.

திருவாளர்.சந்தை ஒரு உன்னதமான கொள்கை உடையவர். நாம் அவரை உதாசீனப் படுத்துவதை அலட்சியப் படுத்தாத பண்பு அவருடையது. ஒரு குறிப்பிட்ட நாளில் அவர் குறிப்பிடும் விலை நமக்குச் சரி வரவில்லையெனிலும், அவர் உதாசீனப் படுத்தப்பட்டாலும், அடுத்த நாள் வெறொரு விலையுடன் வந்து நம் முன் காட்சியளிப்பார்.

இவ்வாறான ஒரு நபருடன் தொழில் செய்வது மிக எளிமையானது. நண்பரது மன நிலை குன்றியது போன்ற சமயங்கள் நமக்கு மிக உகந்தவை, பின் வரும் ஒரு செய்தியை மட்டும் மனதில் கொண்டோமேயானால்!!

திருவாளர்.சந்தை நமக்குச் சேவை செய்ய இருக்கும் நபர். ஒரு பொழுதும் அவர் நம்மை வழி நடத்த அனுமதிக்கக் கூடாது. அவரது முட்டாள் தனமான அனுகுமுறையைக் கண்டு அவரை அலட்சியப் படுத்தவும் செய்யலாம். அல்லது நமது நன்மைக்காகப் பயன்படுத்திக் கொள்ளவும் செய்யலாம். அவருடைய வழி நடத்துதலின் படி நடத்தல் சமங்களில் அபாயகரமாக அமையும்.

உண்மையை சொல்லப் போனால், ஒரு நிறுவனத்தையும் அதன் தொழில் முறையும் சந்தையை விட நாம் நன்கு புரிந்து கொள்வோம் என்று கூறி விட முடியாது. அது போன்ற நேரங்களில், நாம் ஆட்டத்தில் கலந்து கொள்ளாமல் தூர நின்று வேடிக்கை பார்ப்பது புத்திசாலித்தனம்"

பணவீக்கம்!!

குப்புசாமி செல்லமுத்து

"இந்தியர்கள் வலிமையுள்ளவர்களாக மாறி வருகிறார்கள். சில ஆண்டுகளுக்கு முன் ரூ.200 மதிப்புள்ள மளிகை பொருட்களை தூக்கி வர இரண்டு திடகாத்திரமான வாலிபர்களை தேட வேண்டி இருந்தது. ஆனால், இன்றோ 5 வயது சிறுவன் அதே இரு மதிப்புள்ள பொருட்களை தூக்கி வர இயல்கிறது."

மேற்கூறிய துணுக்கிலிருந்து நாம் அறிவது என்ன? காலப்போக்கில் நாமும் நம் சந்ததியினரும் உடல் வலிமையில் மெருகேறியிருக்கிறோமா? அல்லது யாரின் கட்டுப்பாட்டிலும் இல்லாமல் விலைவாசி விண்ணை நோக்கி நகர்கிறதா? அல்லது யாரோ தங்களுடைய நகைச்சுவை உணர்ச்சியை வெளிப்படுத்தும் முயற்சியில் வெளியிட்ட துணுக்கா? சற்றே யோசித்து பார்க்கும் பொது நகைச்சுவை இல்லை என்பதை உணர்வதோடு மட்டும் இல்லாது ஆழமாக சிந்திக்க வேண்டிய விஷயம் என்பதும் புலனாகிறது. 'விலைவாசி என்னும் விஷயம் நாம் விரும்பினாலும் விரும்பாவிட்டாலும் ஏறத்தான் செய்யும். இதில் நகைச்சுவை என்ன வேண்டி கிடக்கிறது?' என்று யாரோ முனகும் குரல் காதில் விழாமல் இல்லை.

கண் கூடாக நாம் காணும் இத்தகு விலைவாசி உயர்வு பொருளாதார நிபுணர்களால் அவ்வளவு எளிதாக அலட்சியப் படுத்திவிடக் கூடிய ஒரு அம்சம் அல்ல. இதை அந்த மெதைகள் 'பணவீக்கம்' என்று பந்தாவாகக் குறிப்பிடுகின்றனர். உலகெங்கும் பெரும்பாலான வல்லுனர்களால் அடிக்கடி விவாதிக்கப்படும் இந்த பணவீக்கம் பற்றி மேலொட்டமாக எடுத்தியம்பும் முயற்சியே இந்தக் கட்டுரை!

பணவீக்க விகிதம் அனைத்து நாடுகளிலும் சதவிகித்தில் (%) குறிப்பிடப் படுகிறது. இவ்வாண்டுப் பணவீக்க விகிதம் 5% என்று மேதாவித்தனமாக யாரேனும் பேசுவார்களேயானால், சென்ற ஆண்டை விட இந்த ஆண்டு பொருட்களின் விலை 5 % அதிகரித்துள்ளது என்பதே அதன் பொருள். உதாரணமாக, பொன வருஷம் ரூ.100 க்கு வாங்கிய ஒரு பொருளை இவ்வாண்டு வாங்க ரூ. 105 செலவிட வேண்டி இருக்கும். நம்மில் எத்தனை பேருக்கு பத்து ரூபாய்க்கு பெட்ரோல் வாங்கிய தினங்கள் நினைவிருக்கின்றன? எனில் இப்போது எதற்காக ஐந்து மடங்கு பணம் செலுத்துகிறோம்? 'எனக்கு தெரியும். ஏன்னா பணவீக்கம் அதிகமாயிருச்சு' என ஒலிக்கும் ஓசை கேட்கிறது. உண்மை என்னவென்றால், பணவீக்கம் ஏறியதால் விலை ஏறவில்லை; மாறாக விலை ஏறியதால் தான் பணவீக்கம் அதிகரித்துள்ளது. பல அத்தியாவசிய பொருட்களின் ஒட்டுமொத்த விலை குறியீட்டு எண் ஒவ்வொரு வாரமும், சென்ற ஆண்டின் இதே காலத்துடன் ஒப்பிடப்பட்டு, இந்த வாரத்தின் பணவீக்கம் எந்த அளவில் உள்ளது என நிர்ணயிக்கப்படுகிறது. இந்த மகத்தான பணியை இந்திய ரிசர்வ் வங்கி (RBI) செவ்வனே ஆற்றி வருகின்றது.

பணவீக்க விகிதம் ஒரு குறிப்பிட்ட தேசத்தையும் அதன் குடிமக்களையும் எங்கனம் பாதிக்கிறது என்பதை நாம் தெரிந்து கொள்வது அவசியம் அல்லவா? சுருக்கமாக அதை சுட்டிக்காட்டாவிடில் இக்கட்டுரை முழுமை பெறாது என்பதில் தெளிவாகவே உள்ளோம்.

பணவீக்கமும் வட்டி விகிதமும்:
மெகா சீரியல் கருப்பு வெள்ளை தொலைக்காட்சியில் பார்த்து உங்கள் மேல் வெறுப்பிலிருக்கும் மனைவியை சமாதானப்படுத்த கலர் டி.வி. வாங்க முடிவு செய்து ஐந்தாறு கடைகளில் விசாரித்து அதன் விலை ரூ.10,000 என அறிகிறீர்கள். இத்தகு தருணத்தில் உயிர் நண்பர் ஒருவர் குடும்பச் சிக்கலின் காரணமாகப் பத்தாயிரம் வேண்டும் என்றும், அதனை ஒரு வருஷத்தில் வட்டியுடன் திருப்பி தருவதாகவும் உறுதி அளிக்கிறார். கலர் டி.வி. வாங்கும் எண்ணத்தை அடுத்த ஆண்டுக்கு ஒத்தி வைத்து விட்டு (மனைவி சம்மதத்துடன்), நண்பருக்கு உதவ முடிவு செய்கிறீர்கள். அடுத்த ஆண்டு பண வீக்கம் 5% இருக்கும் என எங்கோ படித்தது நினைவு வர, டி.வி. விலை ரூ.10,500 (5 % அதிகம்) உயருமென மதிப்டுகிறீர்கள். பணவீக்கம் காரணமாக இதே பொருளை அடுத்த ஆண்டு வாங்க ரூ.500 கூடுதலாக செலவிட நேரிடும். உங்களுக்கும் பாதகமின்றி, உங்கள் நண்பருக்கும் பாதகமின்றி இருவரும் லாப நஷ்டமின்றி இருக்க, நண்பர் குறைந்தபட்சம் பணவீக்கத்தை ஈடுகட்டும் அளவிற்காவது வட்டி தர வெண்டும் (அதாவது ரூ. 500). பணவீக்கத்தை விட குறைவான வட்டியை நீங்கள் ஒப்புக்கொள்வது நிச்சயம் அறிவார்ந்த செயலாகாது.

இதிலிருந்து வட்டி விகிதம் பணவீக்கத்துடன் எவ்வாறு பயணிக்கிறது என அறிந்தோம். பணவீக்கம் அதிகமானால் வட்டி வீதமும் அதிகரிக்கும்; பணவீக்கம் குறைந்தால் வட்டி வீதமும் குறையும். இது உலக நியதி.

நீங்கள் பணியாற்றும் நிறுவனத்தில் உங்கள் சம்பளம் 2% அதிகரிக்கப்பட்டுள்ளது. இது 6% பணவீக்கம் உள்ள ஆண்டில் நிகழ்கிறது. மற்றுமோர் ஆண்டு முதலாளி உங்கள் சம்பளத்தை 2% குறைக்கிறார் (-2% அதிகரிப்பு). இப்போது பணவீக்கம் 0% ஆக உள்ளது. குறிப்பிட்ட இந்த இரண்டு ஆண்டுகளில் எந்த ஆண்டு உங்களை மகிழ்ச்சியிலும், சோகத்திலும் ஆழ்த்தும்? மனோதத்துவ ரீதியாக 2% அதிகரிப்பு கிட்டிய ஆண்டு உங்களை மகிழ்ச்சியிலும், 2% சம்பள குறைப்பு சோகத்திலும் ஆழ்த்தியிருக்கும். ஆனால் இதனைச் சற்றே உற்று நோக்கினால் சம்பளம் அதிகரிக்கப்பட்ட ஆண்டு, உங்களிடம் இருந்த பணத்தின் வாங்கும் திறன் (purchasing power) ஊதிய அதிகரிப்பு நிகழாத ஆண்டை விட குறைவாகவே இருந்தது என்னும் உண்மை புலனாகும். கைக்கு வரும் காசு கூடுதலாக இருப்பினும், அதனின் மதிப்பு குறைவாகவே இருக்கும் இந்த நிலையை தான் பொருளாதார நிபுணர்கள் 'பண மாயை' (money illusion) எனக் குறிப்பிடுகின்றனர். 25% பணவீக்கம் இருந்த காலத்தில் வங்கிகள் கொடுத்த 12% வட்டியை குதூகலத்துடன் வாங்கியவர்கள், 6% பணவீக்கம் காலத்தில் 6% வட்டியை கண்டு பின் வாங்குவது ஏன்? சிந்தியுங்கள் தோழர்களே!

பணவீக்கம், வட்டி விகிதம் மற்றும் பங்கு சந்தை:
சமீப ஆண்டுகளில் (3-4) அநேகம் பேர் பங்கு சந்தையில் நுழைந்து தங்கள் திறமையை நிரூபிப்பது மட்டுமின்றி, மிகுந்த பணமும் ஈட்டி வருகின்றனர். மும்பை பங்கு சந்தை குறியீட்டு எண் (SENSEX) அபார வளர்ச்சியை இந்தக் கால கட்டத்தில் எட்டியிருப்பதும் அனைவரும் அறிந்தது தான். இதற்கு முதன்மையான காரணியாக இந்தியாவில் மட்டுமின்றி உலகெங்கும் நிலவி வந்த அடி மாட்டு வட்டி வீதத்தை பொருளாதார வல்லுனர்கள் கருதுகின்றனர். கடந்த 10 ஆண்டகளாக ஜப்பானின் வட்டி விகிதம் 0 % ஐ விட சற்றே அதிகமான அளவிலியே இருந்தது குறிப்பிடத் தக்கது.

வங்கி வைப்பீட்டு கணக்குகளிலும், கடன் பத்திரங்களிலும் (debt bond) கிடைக்கும் வருமானம் நிலையானது; எந்த விதமான கவலையும் இன்றிக் கிடைக்ககூடியது. Risk free return என்று இதை ஆங்கிலத்தில் அழைக்கலாம். இதற்கு நேர் மாறாக பங்கு சந்தையில் கிடைக்கும் வருவாய் நிலையற்றது. அதே சமயத்தில் வங்கியில் கிடைக்கும் வட்டியை விட பல மடங்கு இதில் கிடைக்கலாம். ஆனால் யாராலும் இதை உறுதியாக கூற இயலாது. உலகெங்கும் மிகக் குறைந்த வட்டி வீதம் இருந்ததை பார்த்தோம் இல்லையா? இந்த சூழ்நிலையில் நிலையான வருமானம் குறைவாக இருந்த காரணத்தால், அதிக வருவாய் கிடைக்க வேண்டி பங்கு சந்தையை நோக்கி தங்கள் பணத்தை உலகெங்கிலும் உள்ள முதலீட்டாளர்கள் திருப்பினர். நிறைய பணம் உள்ளே வர வர SENSEX வளர்ந்து கொண்டு போனதில் வியப்பில்லை.

பணவீக்கமும் அதன் விளைவாக வட்டி விகிதமும் அதிகரிக்கும் ஒரு சூழலில், நிலையான வருவாயும் அதிகரிக்கும். பாதுகாப்பான நிலையான வருவாய் அதிகரிப்பதன் காரணமாக முதலீட்டாளர் சமுதாயம் பங்கு சந்தையில் இருக்கும் பணத்தின் ஒரு பகுதியை கடன் பத்திரங்களில் பொடுவது எதிர்பார்க்க கூடிய செயல் தான். நம்மைப் போன்ற தனி மனிதர்கள் மட்டுமின்றி, பரஸ்பர நிதி (mutual fund) மற்றும் வெளிநாட்டு நிறுவன முதலீட்டாளர்களும் (foreign institutional investors) இதே செயலை பின்பற்றுவார்கள் என எதிர் பார்க்கலாம். அதிகரித்த வட்டி விகிதத்தினால் பங்கு சந்தைக்கு வரும் பணத்தின் அளவு குறையும். இதனால் பங்குகளின் வளர்ச்சி நாம் ஆசைப் படும் அளவு இருக்காது. ஏறுமுகமான பணவீக்கத்தினால் பங்கு சந்தைக்கு நிகழம் பாதிப்பின் ஒரு கோணம் இது.

பல நிறுவனங்கள் தங்கள் தொழிலை நடத்தக் கடன் வாங்கித்தான் காலம் தள்ளுகின்றன. அதிகரித்த வட்டி விகிதத்தினால் நிறுவனங்களின் வட்டிச் சுமை கூடுகிறது. இலாபத்தில் பெரும் பகுதி வாங்கிய கடனுக்கு வட்டி செலுத்தவே சரியாய்ப் போய் விடுவதால், பங்குதாரர்களுக்கு கடைசியில் மிஞ்சுவது குறைகிறது. இவ்வாறு வெளிடப்படும் நிறுவன முடிவுகள் குறைவான 'அலகு பங்கின் வருவாய்' (EPS - Earlings per Share) என்கிற நிலைக்குத் தள்ளப்படுகின்றன. இதனாலும் பங்குகளின் விலை குறையலாம். எனவே அதிக கடன் வாங்கிக் காலம் தள்ளும் நிறுவனங்களை அதிக பணவீக்க காலங்களில் தவிர்ப்பது உசிதம்.

முடிவிற்கு வந்துவிட்ட இக்கட்டுரையைப் படித்தவர்களிடம் இனி மேல் யாரும் பணவீக்கம் குறித்து பேசி ஏமாற்ற முடியாத அளவு பொருளாதார துறை அறிமுகம் கிடைத்தால் அதை விட மகிழ்ச்சி எமக்கு இருக்க வாய்ப்பில்லை. அது கூடப் பரவாயில்லை. எவரேனும் 'பணவீக்கம்னா... பணத்தை எங்க மாமா பணத்தை அடிச்சுட்டாரு. அதனால அதுக்கு வீங்கிருச்சு' என்று கடி ஜொக் சொன்னால், அதை ஊக்குவிக்காதீர்.

பங்கு வணிகம்

முதல் பதிவு. சோதனை பதிவு